ନୂଆଦିଲ୍ଲୀ,୧୫ା୮: କେନ୍ଦ୍ର ସରକାର ଆନ୍ଧ୍ର ପ୍ରଦେଶ ଓ ଉତ୍ତର ପ୍ରଦେଶରେ ଥିବା ୧୩ଟି ସୁନାଖଣି ବିକ୍ରି କରିବା ପାଇଁ ମସୁଧା ଚଳାଇଛନ୍ତି। ଗତ ବର୍ଷ ମାଇନିଂ ଆକ୍ଟ, ୨୦୧୫ରେ ସଂଶୋଧନ ଅଣାଯିବା ପରେ ଏବେ ଦେଶର ମୋଟ ଘରୋଇ ଉତ୍ପାଦ (ଜିଡିପି) ଅଭିବୃଦ୍ଧି ପାଇଁ ଏହି ସୁନାଖଣିଗୁଡ଼ିକୁ ନିଲାମ କରିବାକୁ ସରକାର ଲକ୍ଷ୍ୟ ରଖିଥିବା କେତେକ ଜାତୀୟ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି।
ରିପୋର୍ଟ ଅନୁସାରେ ନିଲାମ ହେବାକୁ ଥିବା ସୁନାଖଣିଗୁଡ଼ିକ ମଧ୍ୟରୁ ୧୦ଟି ଆନ୍ଧ୍ରରେ ଥିବାବେଳେ ୩ଟି ୟୁପିରେ ରହିଛି। ଆନ୍ଧ୍ରର ୧୦ ଗୋଲ୍ଡ ବ୍ଲକ୍ ମଧ୍ୟରୁ ୫ଟି ଆସନ୍ତା ୨୬ ତାରିଖରେ ନିଲାମ ହୋଇପାରେ। ଅବଶିଷ୍ଟ ୫ ସୁନାଖଣିକୁ ଅଗଷ୍ଟ ୨୯ରେ ନିଲାମ କରାଯାଇପାରେ ବୋଲି ଏଥିରେ ଦର୍ଶାଯାଇଛି। ଆନ୍ଧ୍ରର ସୁନାଖଣିଗୁଡ଼ିକ ମଧ୍ୟରେ ରହିଛି ରାମଗିରି ନର୍ଥ ବ୍ଲକ୍, ବୋକ୍ସାମ୍ପଲ୍ଲୀ ନର୍ଥ ବ୍ଲକ୍, ବୋକ୍ସାମ୍ପଲ୍ଲୀ ସାଉଥ୍ ବ୍ଲକ୍, ଜାଭାକୁଲା-ଏ ବ୍ଲକ୍, ଜାଭାକୁଲା-ବି ବ୍ଲକ୍, ଜାଭାକୁଲା-ସି ବ୍ଳକ୍, ଜାଭାକୁଲା-ଡି ବ୍ଲକ୍, ଜାଭାକୁଲା-ଇ ବ୍ଲକ୍ ଏବଂ ଜାଭାକୁଲା-ଏଫ୍ ବ୍ଲକ୍। ଏହି ସୁନାଖଣିଗୁଡ଼ିକର ନିଲାମି ପାଇଁ ଗତ ମାର୍ଚ୍ଚରେ ଟେଣ୍ଡର ଆହ୍ବାନ କରାଯାଇଥିଲା। ସେହିପରି ଉତ୍ତର ପ୍ରଦେଶର ସୋନଭଦ୍ରା ସ୍ଥିତ ସୋନାପାହାଡ଼ି ବ୍ଲକ୍ ଓ ବିଅଦଣ୍ଡ ବ୍ଲକ୍ ସମେତ ୩ଟି ଖଣି ମଧ୍ୟ ଚଳିତ ମାସରେ ନିଲାମ କରାଯିବ। କିନ୍ତୁ ଏଥିଲାଗି କୌଣସି ନିର୍ଦ୍ଦିଷ୍ଟ ତାରିଖ ଧାର୍ଯ୍ୟ କରାଯାଇନାହିଁ। ଏହି ୩ ସୁନାଖଣି ନିଲାମ ପାଇଁ ଗତ ମେ’ ୨୧ରେ ଟେଣ୍ଡର ଆହ୍ବାନ କରାଯାଇଥିଲା।
ଖନନ ଆଇନ, ୨୦୧୫ରେ ସଂଶୋଧନ ପରେ ନିଲାମି ଜରିଆରେ ଖଣିଜ ବ୍ଲକ୍ଗୁଡ଼ିକର ଆବଣ୍ଟନ କରାଯାଉଛି। ଅଗଷ୍ଟ ୪ ସୁଦ୍ଧା ରାଜ୍ୟଗୁଡ଼ିକ ପକ୍ଷରୁ ମୋଟ ୧୯୯ ଖଣିଜ ବ୍ଲକ୍ ନିଲାମ କରାଯାଇଥିଲା। ଗତ ଆର୍ଥିକବର୍ଷରେ ୪୫ ଖଣିଜ ବ୍ଲକ୍କୁ ନିଲାମି ପାଇଁ ରଖାଯାଇଥିଲା। କେନ୍ଦ୍ର ଓ ରାଜ୍ୟ ସରକାରଗୁଡ଼ିକ ଏଥିରୁ ପର୍ଯ୍ୟାପ୍ତ ରାଜସ୍ବ ପାଉଥିବା କହିଥିଲେ। ଖଣି ମନ୍ତ୍ରଣାଳୟ ୨୦୧୫ର ଆଇନରେ ସଂଶୋଧନ ଲାଗି ମିନେରାଲ୍ସ (ଏଭିଡେନ୍ସ ଅଫ୍ ମିନେରାଲ କଣ୍ଟେଣ୍ଟ୍ସ) ସେକେଣ୍ଡ ଆମେଣ୍ଡମେଣ୍ଟ ରୁଲସ୍-୨୦୨୧, ମିନେରାଲ (ଅକ୍ସନ) ଫୋର୍ଥ ଆମେଣ୍ଡମେଣ୍ଟ ରୁଲ୍ସ-୨୦୨୧ ଉପରେ ବିଜ୍ଞପ୍ତି ଜାରି କରିଥିଲା। ଖଣି ନିଲାମି ନିୟମରେ ସଂଶୋଧନ ଫଳରେ ବ୍ଲକ୍ଗୁଡ଼ିକୁ ବିକ୍ରି ପ୍ରକ୍ରିୟାରେ ପ୍ରତିଦ୍ୱନ୍ଦ୍ୱିତା ବୃଦ୍ଧି ପାଇବ ବୋଲି ପୂର୍ବରୁ ଖଣି ମନ୍ତ୍ରଣାଳୟ ପକ୍ଷରୁ ମଧ୍ୟ କୁହାଯାଇଥିଲା। ରାଜ୍ୟଗୁଡ଼ିକ, ଶିଳ୍ପ ସଂଘ, ଖନନକାରୀ, ଅନ୍ୟ ପକ୍ଷ ଓ ଜନସାଧାରଣଙ୍କ ସହ ବିଚାରବିମର୍ଶ ପରେ ଏହି ସଂଶୋଧନ ଅଣାଯାଇଥିଲା।