ନୂଆଦିଲ୍ଲୀ,୨୦।୧୨ : ଉପରାଷ୍ଟ୍ରପତି ଜଗଦୀପ ଧନକରଙ୍କୁ ମଙ୍ଗଳବାର ରାଜ୍ୟ ସଭାରେ ନିଜ ଆସନରୁ ଉଠିବାକୁ ପଡିଛି। ସେ ଏମ୍ପିମାନଙ୍କୁ ମନେ ପକାଇବାକୁ କହିଥିଲେ ଯେ ଆମେ ଛୋଟପିଲା ନୁହେଁ। ଭାରତର ସ୍ବାଧୀନତାରେ ଆରଏସଏସର କୌଣସି ଯୋଗଦାନ ନାହିଁ ବୋଲି କଂଗ୍ରେସ ନେତା ମଲିକାର୍ଜୁନ ଖାର୍ଗେଙ୍କ ମନ୍ତବ୍ୟ ନେଇ ଗୃହରେ ଜାରି ରହିଥିବା ହଟ୍ଟଗୋଳକୁ ଉଦ୍ଦେଶ୍ୟରେ ଉପରାଷ୍ଟ୍ରପତି ଏଭଳି କହିଛନ୍ତି। ନିଜ ଆସନରେ ଉଠି ସେ ଛିଡ଼ା ହୋଇ ଗୃହର ମର୍ଯ୍ୟାଦା ରକ୍ଷା କରିବା ଜରୁରୀ ବୋଲି ଗୁରୁତ୍ୱାରୋପ କରିଛନ୍ତି।
ରାଜ୍ୟସଭା ଅଧ୍ୟକ୍ଷ ଜଗଦୀପ ଧନକର ଗୃହରେ କହିଛନ୍ତି ଯେ ଏଭଳି ହଟ୍ଟଗୋଳ କରି ଆମେ ଏକ ଖରାପ ଉଦାହରଣ ସୃଷ୍ଟି କରୁଛୁ। ଗୃହକୁ ନେଇ ଜନସାଧାରଣଙ୍କର ମୋହଭଙ୍ଗ ହେଉଛି।ଏହି ପ୍ରକାର ପ୍ରଦର୍ଶନ ଆମକୁ ବଦନାମ କରୁଛି।
ଆସନରୁ ଉଠି ଶାସକ ଦଳ ଏବଂ ବିରୋଧୀ ଦଳର ବେଞ୍ଚ ଆଡକୁ ହାତ ଦେଖାଇ ସେ ନିଜର ମତ ରଖିବାକୁ ଚେଷ୍ଟା କରିଥିଲେ, କିନ୍ତୁ ଏଥିପାଇଁ ତାଙ୍କୁ ଅନେକ ଥର ’ଗୋଟିଏ ସେକେଣ୍ଡ, ଗୋଟିଏ ସେକେଣ୍ଡ’ କହିବାକୁ ପଡିଥିଲା। ତା’ପରେ ସେ କହିଥିଲେ, ଆସନରୁ ଯାହା କୁହାଯାଉଛି ତାହା ଆପଣମାନେ ଗ୍ରହଣ କରୁନାହାଁନ୍ତି, ଏହା ସମସ୍ତଙ୍କ ପାଇଁ ଉଦ୍ଦିଷ୍ଟ। ଆମ ପାଇଁ ଗୃହର ପରିବେଶ କେତେ ଯନ୍ତ୍ରଣାଦାୟକ ହୋଇଛି ତାହା ଆପଣମାନେ ଜାଣିବା ଜରୁରୀ। ମୋତେ ବିଶ୍ୱାସ କରନ୍ତୁ, ଦେଶର ୧୩୫ କୋଟି ଲୋକ ଆମ ଉପରେ ହସୁଛନ୍ତି । ସେମାନେ ଆଶ୍ଚର୍ଯ୍ୟ ହେଉଛନ୍ତି, ଭାବୁଛନ୍ତି ଯେ ଆମର ରାଜନେତାମାନେ କେଉଁ ସ୍ତରକୁ ଛିଡା ହୋଇଛନ୍ତି।
ଭାଜପା ସଦସ୍ୟମାନେ ବିରୋଧୀଦଳର ନେତା ତଥା କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କ ରାଜସ୍ଥାନ ରାଲିରେ କରିଥିବା ଦାବିକୁ ନେଇ ହଟ୍ଟଗୋଳ ସମୟରେ ସଦସ୍ୟମାନଙ୍କୁ ଅନୁଶାସନ ଶିକ୍ଷା ଦେଇ ଧନକର କହିଥିଲେ, ଏହା ସମ୍ଭବତଃ ଉତ୍ତେଜିତ ଅବସ୍ଥାରେ ଗୃହର ବାହାରେ କିଛି କୁହାଯାଇଥିଲା। ଏପରି ବିବୃତ୍ତିର କୌଣସି ଆଧାର ଅଛି କି ନାହିଁ ତାହା ଅଜଣା।