ଭୁବନେଶ୍ୱର,୯।୭(ସୂର୍ଯ୍ୟକାନ୍ତ ବେହେରା)ଏକ କମ୍ପାନୀର କ୍ୟୁଆର୍ କୋଡ୍କୁ ଚଞ୍ଚକତା କରି ୧୪ କୋଟି ଟଙ୍କା ଠକିନେବା ମାମଲାରେ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ଉତ୍ତର ପ୍ରଦେଶ ନୋଏଡାର କରଣ କୁମାର ସିଂହଙ୍କୁ ଗିରଫ କରିବାରେ ସଫଳ ହୋଇଛି। କରଣ ହେଉଛନ୍ତି ପେ’ ୱାନ୍ ଡିଜିଟାଲ ସର୍ଭିସେସ୍ ସଂସ୍ଥାର ଅନ୍ୟତମ ନିର୍ଦ୍ଦେଶକ। ଗିରଫ ପରେ ତାଙ୍କୁ ସେଠାକାର ସ୍ଥାନୀୟ କୋର୍ଟରେ ହାଜର କରାଯାଇଥିଲା। କୋର୍ଟଙ୍କ ଅନୁମତିକ୍ରମେ ଅଭିଯୁକ୍ତ କରଣଙ୍କୁ ୩ ଦିନିଆ ଟ୍ରାଞ୍ଜିଟ୍ ରିମାଣ୍ଡରେ ଓଡ଼ିଶା ଆଣି କଟକ ଓପିଆଇଡି କୋର୍ଟରେ ହାଜର କରିବ ଇଓଡବ୍ଲ୍ୟୁ। ତେବେ ଏଭଳି ତରିକାରେ ଠକେଇ ସାଧାରଣତଃ କମ୍ ଦେଖାଯାଇଥାଏ। ଏହି ଠକେଇର ଶିକାର ହୋଇଛି ଭୁବନେଶ୍ୱରରେ ଥିବା ‘ଆଇ ସର୍ଭ ୟୁ’ ନାମକ ଏକ ଘରୋଇ ସଂସ୍ଥା। କମ୍ପାନୀର ମୁଖ୍ୟ ବୈଷୟିକ ଅଧିକାରୀ ସଞ୍ଜୀବ କୁମାର ପରିଡ଼ାଙ୍କ ଅଭିଯୋଗ ଆଧାରରେ ଇଓଡବ୍ଲ୍ୟୁ ଏକ ମାମଲା ରୁଜୁ କରି ତଦନ୍ତ ଚଳାଇଛି।
ଇଓଡବ୍ଲ୍ୟୁର ଜଣେ ବରିଷ୍ଠ ଅଧିକାରୀଙ୍କ କହିବା ମୁତାବକ, ଚଳିତ ବର୍ଷ ଏପ୍ରିଲ-ମେ’ରେ ନୋଏଡାସ୍ଥିତ ପେ’ ୱାନ୍ ଡିଜିଟାଲ ସର୍ଭିସେସ୍ ସଂସ୍ଥା ସହିତ ‘ଆଇ ସର୍ଭ ୟୁ’ର ଏକ ଟେକ୍ନୋଲୋଜି ଇଣ୍ଟିଗ୍ରେଶନ ଚୁକ୍ତି ହୋଇଥିଲା। ସଂସ୍ଥାର ନିର୍ଦ୍ଦେଶକ ଅଭିଯୁକ୍ତ କରଣ ଓ ତାଙ୍କ ଭାଇ ଲାଲୁ ସିଂହଙ୍କ ସହ ଏହି ଚୁକ୍ତି ହୋଇଥିଲା। ଉକ୍ତ କମ୍ପାନୀ ଡିଜିଟାଲ ପେମେଣ୍ଟ ସେବା ଯୋଗାଇ ଦେଇଥାଏ। ଚୁକ୍ତି ଅନୁସାରେ ବ୍ୟବସାୟିକ ଉପଯୋଗ ପାଇଁ ଉକ୍ତ କମ୍ପାନୀକୁ ‘ଆଇ ସର୍ଭ ୟୁ’ ପକ୍ଷରୁ ୟୁପିଆଇ ଏପିଆଇ ଯୋଗାଇ ଦିଆଯାଇଥିଲା। ଗତ ଜୁନ୍ ୬ରେ ଅଭିଯୋଗକାରୀ ତଥା କମ୍ପାନୀର ମୁଖ୍ୟ ବୈଷୟିକ ଅଧିକାରୀ ସଞ୍ଜୀବ କୁମାର ପରିଡ଼ା ଜାଣିବାକୁ ପାଇଥିଲେ ଯେ ଏକ ବ୍ୟାଙ୍କ ଆକାଉଣ୍ଟରେ ଥିବା ଟଙ୍କା ଅସ୍ବାଭାବିକ ଭାବେ ହ୍ରାସ ପାଇଛି। ଖୋଳତାଡ଼ କରିବା ପରେ ଜଣାପଡିଥିଲା ଯେ, କରଣ ଓ ଲାଲୁ ‘ଆଇ ସର୍ଭ ୟୁ’ର କ୍ୟୁଆର କୋଡ୍ରେ ଚଞ୍ଚକତା କରି ୧୪.୩୩ କୋଟି ଟଙ୍କା ହଡ଼ପ କରି ନେଇଛନ୍ତି। ଉକ୍ତ ଟଙ୍କାକୁ ସେମାନେ ଭିନ୍ନ ଭିନ୍ନ ୧୨୫ଟି ଆକାଉଣ୍ଟକୁ ଟ୍ରାନ୍ସଫର କରିଛନ୍ତି। ଏହା ଜଣାପଡିବା ପରେ ସଞ୍ଜୀବ କ୍ରାଇମବ୍ରାଞ୍ଚରେ ଅଭିଯୋଗ କରିଥିଲେ। ଘଟଣାର ତଦନ୍ତ କରି କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା ଏବେ ମୁଖ୍ୟ ଅଭିଯୁକ୍ତ କରଣଙ୍କୁ ଗିରଫ କରିଥିବାବେଳେ ଭାଇ ଲାଲୁଙ୍କୁ ଖୋଜୁଛି। ଟେକ୍ନୋଲୋଜି ସହାୟତା ନେଇ ହୋଇଥିବା ଏହି ଠକେଇରେ ଆହୁରି ଅନେକ ଲୋକଙ୍କ ସଂପୃକ୍ତି ଥାଇପାରେ ବୋଲି ତଦନ୍ତକାରୀ ସଂସ୍ଥା ସନ୍ଦେହ କରୁଛି। ପୂର୍ବରୁ ଏଭଳି ମାମଲା ସାମ୍ନାକୁ ଆସି ନ ଥିବାରୁ ଇଓଡବ୍ଲ୍ୟୁ ମାମଲାଟିର ଠିକ ତଦନ୍ତ ପାଇଁ ବିଶେଷଜ୍ଞଙ୍କ ସହାୟତା ନେଉଛି।