କେନ୍ଦୁଝର,୨୫ା୮(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ତେଲକୋଇ ବ୍ଲକ୍ ୪୯ ନମ୍ବର ଜାତୀୟ ରାଜପଥର ଜନସନପୁର ଟୋଲ୍ ଗେଟ୍ ପାଖରେ ରାସ୍ତା ଖରାପ ଥିବାରୁ ଗୁରୁବାର ରାତି ୯ଟାରୁ ଶୁକ୍ରବାର ୧୦ଟା ପର୍ଯ୍ୟନ୍ତ ରାସ୍ତା ଜାମ ରହିଥିଲା। ଫଳରେ ମୁମ୍ବାଇ-କୋଲକାତା ଜାତୀୟ ରାଜପଥରେ ଶତାଧିକ ଗାଡ଼ି ଅଟକି ରହିଥିଲା। ରାସ୍ତା ଜାମରେ ଅତିଷ୍ଠ ହୋଇ ରାସ୍ତା ସଜାଡି ଟିକସ୍ ଆଦାୟ କର ବୋଲି ଅଟକି ରହିଥିବା ଟ୍ରକ ଚାଳକମାନେ ଦାବି କରି ହୋହଲ୍ଲା କରିଥିଲେ।
ରାଜପଥର ତେଲକୋଇ-ପାଲଲହଡ଼ା ବିଛାଖଣି ଜଙ୍ଗଲ ପାଖ ହାତୀ କରିଡରରେ ଓଭର ବ୍ରିଜ ନିର୍ମାଣ କରିବାର ପ୍ରସ୍ତାବ ଥିବାରୁ ୭୦୦ ମିଟର ରାସ୍ତା ନିର୍ମାଣ ହୋଇନାହିଁ। ପୁରୁଣା ରାସ୍ତାଟି ଅତ୍ୟନ୍ତ ଖରାପ ହୋଇଯାଇଛି। ଫଳରେ ଗୁରୁବାର ରାତିରେ ୩ ଟ୍ରକ୍ ଖାଲରେ ପଶିଯିବାରୁ ରାସ୍ତା ଜାମ୍ ହୋଇଥିଲା। ଟୋଲ୍ ଗେଟ୍ ପାଖରେ ଟ୍ରକ୍ ଫସିଥିଲେ ମଧ୍ୟ ଗାଡ଼ିକୁ ଉଠାଇ ଜାମ୍ ହଟାଇବାରେ ଠିକା ସଂସ୍ଥା ଓ ଏନ୍ଏଚ୍ଆଇ କର୍ତ୍ତୃପକ୍ଷ ପଦକ୍ଷେପ ଗ୍ରହଣ କରି ନ ଥିବାରୁ ଦୀର୍ଘ ୧୪ ଘଣ୍ଟା ଧରି ରାସ୍ତା ଜାମ୍ ରହିଥିଲା।
ଫଳରେ ସ୍ଥାନୀୟ ଲୋକେ ଅଭିଯୋଗ କରି ଟୋଲ ଆଦାୟକୁ ବନ୍ଦ କରିଛନ୍ତି। ଓଭର ବ୍ରିଜ଼ ନିର୍ମାଣ ହେବା ପର୍ଯ୍ୟନ୍ତ ଖରାପ ରାସ୍ତାକୁ ମରାମତି କରିବାକୁ ଟ୍ରକ୍ ମାଲିକ ଓ ସାଧାରଣ ଲୋକେ ବାରମ୍ବାର ଦାବି କରିଛନ୍ତି। ଅଭିଯୋଗ ପ୍ରତି ଏନ୍ଏଚ୍ଆଇ କର୍ତ୍ତୃପକ୍ଷ କର୍ଣ୍ଣପାତ କରୁ ନ ଥିବାରୁ ଟୋଲ୍ ଆଦାୟ ବନ୍ଦ କରାଯାଇଛି ବୋଲି ଅନିତ କୁମାର ଦୀକ୍ଷିତଙ୍କ ସମେତ ସ୍ଥାନୀୟ ଲୋକେ କହିଛନ୍ତି।
ଠିକା ସଂସ୍ଥାର ମେଣ୍ଟେନାନ୍ସ ମ୍ୟାନେଜର ପ୍ରଦୀପ କୁମାର ରଣସିଂ କହିଛନ୍ତି, ରାସ୍ତା ଜାମ୍ ଥିବା ଅବଗତ ଅଛୁ, ଟୋଲ ଗେଟ୍ରେ ଥିବା କ୍ରେନ ଖରାପ ରହିଛି। ଅନ୍ୟ ଏକ କ୍ରେନ ଅଣାଯାଇ ଫସି ରହିଥିବା ଗାଡ଼ିକୁ ଉଦ୍ଧାର ପରେ ଗାଡ଼ି ଚଳାଚଳ ସ୍ବାଭାବିକ କରାଯାଇଛି। ଟୋଲ ବନ୍ଦ ରହିବା ଓ ରାସ୍ତା ମରାମତି ଦାବି ସମ୍ପର୍କରେ ଉପରିସ୍ଥ ଅଧିକାରୀଙ୍କୁ ଅବଗତ କରାଯାଇଛି ବୋଲି ସେ କହିଥିଲେ।