ନୂଆପଡା ଅଫିସ,୫ା୪: ନୂଆପଡା ଜିଲା କୋମନା ବ୍ଲକ ଅଧୀନ ଦୁଇଟି ଗାଁର ୧୪ ଜଣ ଦାଦନ ଶ୍ରମିକ ତେଲଙ୍ଗାନା ରାଜ୍ୟକୁ ଇଟା ତିଆରି କରିବା ପାଇଁ ଯାଇ ନିର୍ଯାତନାର ଶିକାର ହେଉଥିବା ଅଭିଯୋଗ ହୋଇଛି। ଏହି ଶ୍ରମିକମାନଙ୍କ ପରିବାରର ୫ ଜଣ ଶିଶୁ ମଧ୍ୟ ସେଠାରେ ରହି ନିର୍ଯାତିତ ହେଉଛନ୍ତି। ଗ୍ରାମବାସୀ ଓ ପରିବାର ଲୋକେ ସୋମବାର ନୂଆପଡା ଜିଲାପାଳ ହେମକାନ୍ତ ସାଏଙ୍କୁ ସାକ୍ଷାତ କରି ନର୍ଯାତିତ ଶ୍ରମିକମାନଙ୍କୁ ଉଦ୍ଧାର କରିବା ପାଇଁ ଗୁହାରି କରିଛନ୍ତି।
ପ୍ରକାଶ ଯେ, ଗତ ଜାନୁୟାରୀ ମାସରେ ପୋଏଁର ଗାଁର ୩ ପରିବାରର ୧୪ ଜଣ ଓ ସମରସିଂ ଗ୍ରାମର ଗୋଟିଏ ପରିବାରର ୫ ଜଣ ସଦସ୍ୟ କାମଧନ୍ଦା ଅଭାବରୁ ତେଲଙ୍ଗାନା ରାଜ୍ୟକୁ ଦାଦନ ଖଟିବାକୁ ଯାଇଛନ୍ତି। ଏହି ଶ୍ରମିକମାନେ ବଲାଙ୍ଗୀର ଜିଲା କଣ୍ଟାବାଞ୍ଜି ଗାଁର ଜଣେ ଦାଦନ ସର୍ଦ୍ଦାରଙ୍କ ଜରିଆରେ ତେଲଙ୍ଗାନାର ମେହେବୁବ ନଗର ଜିଲା ଫାରୁକ ନଗର ବ୍ଲକ କିଷନନଗର ଗଁ।ର ଏକ ଇଟାଭାଟିରେ ନିୟୋଜିତ ଅଛନ୍ତି। ତେବେ କିଛି ଦିନ କାମ କଲା ପରେ ଇଟାଭାଟିରେ ଶ୍ରମିକମାନଙ୍କୁ ମାନସିକ ଓ ଶାରୀରିକ ନିର୍ଯାତନା ଦିଆଯାଉଛି। ଦିନକୁ ୧୨ରୁ ୧୫ ଘଣ୍ଟା କାମରେ ନିୟୋଜିତ କରାଯାଉଛି। ଖାଇବା ଖର୍ଚ୍ଚ ପୁରା ନ ଦେଇ ଅଧା ଦିଆଯାଉଛି। ଶ୍ରମିକମାନଙ୍କ ମୋବାଇଲ ଫୋନ ଛଡାଇ ନିଆଯାଇଛି। କାମ ନ କଲେ ମାରପିଟ କରାଯାଉଛି। ଏ ନେଇ କାହାକୁ ଜଣାଇଲେ ଜୀବନରେ ମାରି ଦେବା ପାଇଁ ଧମକ ମିଳୁଥିବା ଶ୍ରମିକମାନେ ଅଭିଯୋଗ କରିଛନ୍ତି। କୋମନା ଥାନା ପୋଏଁର ଗଁାର ଧର୍ମୁ ଦୀପ (୫୧)ଙ୍କ ସମେତ ପରିବାରର ସ୍ତ୍ରୀ ସୁମିତ୍ରା ଦୀପ (୪୫), ପୁଅ ଇନ୍ଦୁସର (୨୩), ପୀତାମ୍ବର (୨୦), ଯୁଗେଶ୍ୱର (୧୮), ରମେଶ (୧୫) , ତ୍ରିନାଥ ବାଗ (୩୮)ଙ୍କ ସହ ତାଙ୍କ ସ୍ତ୍ରୀ ରୁଦନା ବାଗ (୩୨) ଓ ୫ ବର୍ଷର ଝିଅ ନନ୍ଦିନୀ, ଛନ ଦୀପ (୬୦)ଙ୍କ ସହ ତାଙ୍କ ସ୍ତ୍ରୀ କମଲା (୫୫), ପୁଅ ମନୋଜ (୩୨), ବୋହୁ ସସ୍ମିତା (୨୮) ଓ ୪ ବର୍ଷର ଶିଶୁ ପ୍ରିନ୍ସ ଏବଂ ସମରସିଂ ଗାଁର ବଷ୍ଣ୍ନୁ ପେନକା (୩୫), ସ୍ତ୍ରୀ ବୈକାନ୍ତି ପେନକା (୩୦) ସହ ଛୋଟ ଛୋଟ ୩ ପୁଅ ତେଲେଙ୍ଗାନାରେ ଅଟକ ରହି ନିର୍ଯାତନାର ଶିକାର ହେଉଛନ୍ତି। ଶ୍ରମିକମାନଙ୍କ ଜୀବନ ପ୍ରତି ବିପଦ ଥିବାରୁ ସୋମାନଙ୍କୁ ଶୀଘ୍ର ଉଦ୍ଧାର କରିବା ପାଇଁ ଘାସିରାମ ସୁନାନୀ, ଯାଦବ ଦୀପ, ମହେନ୍ଦ୍ର ପଟେଲ, ଶଙ୍କର ଦୀପ, ଛବି ବାଗ ପ୍ରମୁଖ ଦାବି କରିଛନ୍ତ। ଦାଦନ ଶ୍ରମିକମାନଙ୍କୁ ଉଦ୍ଧାର କରିବା ପାଇଁ ଜିଲାପାଳ ସାଏ ଜିଲା ଶ୍ରମ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଏ ସଂକ୍ରାନ୍ତରେ ଅତିରିକ୍ତ ଜିଲା ଶ୍ରମ ଅଧିକାରୀ ଦିବ୍ୟ ଶଙ୍କର ଧରୁଆଙ୍କୁ ପଚାରିବାରେ ଏ ନେଇ ଅଭିଯୋଗ ଆସିଛି। ୨ – ୩ ଦିନ ଭିତରେ ସେମାନଙ୍କୁ ଉଦ୍ଧାର କରାଯାଇ ଗାଁରେ ଛାଡିବାର ବ୍ୟବସ୍ଥା କରାଯିବ। ଏହାଛଡା ସେମାନଙ୍କୁ ନେଇ ଯାଇଥିବା ଦାଦନ ସର୍ଦ୍ଦାରଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ।