ଭୁବନେଶ୍ବର, ୧୫ା୫(ବ୍ୟୁରୋ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରବିବାର ୧୪ ଜିଲାରେ ନୂତନ ଭାବେ ସ୍ବତନ୍ତ୍ର ଉନ୍ନୟନ ପରିଷଦ(ଏସ୍ଡିସି)ର ଶୁଭାରମ୍ଭ କରିଛନ୍ତି। ପୂର୍ବରୁ ୯ଟି ଜିଲାରେ ସ୍ବତନ୍ତ୍ର ଉନ୍ନୟନ ପରିଷଦର ଶୁଭାରମ୍ଭ ହୋଇଥିଲା। ଏବେ ମୋଟ୍ ୨୩ ଜିଲାରେ ସ୍ବତନ୍ତ୍ର ଉନ୍ନୟନ ପରିଷଦ ହୋଇଛି। ମୁଖ୍ୟମନ୍ତ୍ରୀଙ୍କ ଏହି ଘୋଷଣା ପରେ ଏବେ ରାଜନୀତି ଜୋର୍ ଧରିବାରେ ଲାଗିଛି। ନିର୍ବାଚନ ଆସିଲେ ସରକାରଙ୍କର ଆଦିବାସୀଙ୍କ କଥା ମନେପଡ଼େ ବୋଲି ଉଭୟ ବିରୋଧୀ ଭାଜପା ଏବଂ କଂଗ୍ରେସ ଅଭିଯୋଗ କରିଛନ୍ତି। ଏହା କେବଳ ନିର୍ବାଚନୀ ଥୋପ, ପୂର୍ବରୁ ଥିବା ୯ ଜିଲାର ସ୍ବତନ୍ତ୍ର ଉନ୍ନୟନ ପରିଷଦ କେବଳ ରାଜନୈତିକ କାର୍ଯ୍ୟକ୍ରମ ଲାଗି ବ୍ୟବହାର ହେଉଥିବା ବିରୋଧୀ କହିିଛନ୍ତି।
ବିରୋଧୀ ଦଳ ମୁଖ୍ୟ ସଚେତକ ତଥା ବିଧାୟକ ମୋହନ ଚରଣ ମାଝି କହିଛନ୍ତି, ଜନଜାତି ବହୁଳ ଜିଲାଗୁଡ଼ିକର ସଂସ୍କୃତି, ଐତିହ୍ୟ ଓ ପରମ୍ପରାର ସଂରକ୍ଷଣ, ପ୍ରଜାତିକ ଓ ପରିଚିତିର ସ୍ଥିତାବସ୍ଥା ବଜାୟ ରଖିବା ଲାଗି ରାଜ୍ୟ ସରକାର ୨୦୧୯ ସାଧାରଣ ନିର୍ବାଚନ ପୂର୍ବରୁ ସ୍ବତନ୍ତ୍ର ଉନ୍ନୟନ ପରିଷଦ (ଏସ୍ଡିସି) ଗଠନ କରିଥିଲେ। ମାତ୍ର ନିର୍ବାଚନ ପରେ ଏହି ପରିଷଦ ସ୍ଥାଣୁ ପାଲଟି ଯାଇଥିଲା। ପ୍ରଥମ ଅଧ୍ୟକ୍ଷଙ୍କ ଇସ୍ତଫା ପରେ ରାଜ୍ୟ ସରକାର ଜାଣିଶୁଣି ଏହାକୁ ବନ୍ଦକରି ଦେଇଥିଲେ। ଓଡ଼ିଶା ଜନସଂଖ୍ୟାର ପ୍ରାୟ ୨୪% ହେଉଛନ୍ତି ଆଦିବାସୀ ଏବଂ ୬୨ ସମ୍ପ୍ରଦାୟ ଓ ୧୩ଟି ପିଭିଟିଜି ସମ୍ପ୍ରଦାୟର ଜନଜାତି ବସବାସ କରନ୍ତି। ଗତ କେନ୍ଦ୍ର ବଜେଟରେ ମୋଦି ସରକାର ପିଭିଟିଜି ସମ୍ପ୍ରଦାୟର ବିକାଶ ପାଇଁ ପର୍ଯ୍ୟାପ୍ତ ପରିମାଣର ଆର୍ଥକ ଅନୁଦାନ ଯୋଗାଇ ଦେଇଥିବା ବେଳେ ରାଜ୍ୟ ସରକାର ଠିକ୍ ବିନିଯୋଗ କରିବାରେ ବିଫଳ ହୋଇଛନ୍ତି। ଆଦିବାସୀ ଅଧ୍ୟୁଷିତ ଖଣି ଅଞ୍ଚଳର ବିକାଶ ପାଇଁ ସ୍ବତନ୍ତ୍ର ଡିଏମ୍ଏଫ ପାଣ୍ଠିରେ ଗଚ୍ଛିତ ଥିବା ୧୬ ହଜାର କୋଟିରୁ ଊର୍ଦ୍ଧ୍ୱ ଟଙ୍କାକୁ ଶାସକ ବିଜେଡି ନେତା ଓ କର୍ମୀମାନେ ବ୍ୟାପକ ଭାବେ ହରିଲୁଟ୍ କରିବାରୁ ବିକାଶ ବାଧାପ୍ରାପ୍ତ ହୋଇଛି ବୋଲି ସେ କହିଛନ୍ତି।
କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି, ସରକାର ଏସ୍ଡିସି ଗଠନ କରିଛନ୍ତି ଠିକ୍ ଅଛି। ହେଲେ ଏମାନେ ରାଜ୍ୟସ୍ତରୀୟ ବୈଠକ କେତେଥର କଲେଣି। ଜିଲାରେ କେତେ ଟଙ୍କା କେଉଁଠି ଦେଇଛନ୍ତି ଏବଂ ଆଦିବାସୀ ଅଞ୍ଚଳର କ’ଣ ସବୁ ବିକାଶ କରିଛନ୍ତି। ବାସ୍ତବ କଥା ହେଲା ଏମାନେ ଏସ୍ଡିସି ଗଠନ କରି କିଛି କରିନାହାନ୍ତି। ନିର୍ବାଚନ ୮ ମାସ ରହିଲା। ସେଥିପାଇଁ ଏମାନେ ଆଉ ୧୪ ଜିଲାରେ ଏସ୍ଡିସି ପ୍ରସାରିତ କରିଛନ୍ତି। ଯେଉଁମାନେ ବିଜେଡିର ଆଶାୟୀ ପ୍ରାର୍ଥୀମାନେ ଅଛନ୍ତି ସେମାନଙ୍କୁ ଥଇଥାନ କରିବାର ଏହା ଏକ ଯୋଜନା। ତେଣୁ ଏହା ଥଇଥାନ କେନ୍ଦ୍ର ହୋଇଛି।
ବିଜେଡି ନେତା ତଥା ସ୍ବତନ୍ତ୍ର ଉନ୍ନୟନ ପରିଷଦର ଉପଦେଷ୍ଟା ପ୍ରଦୀପ ମାଝି କହିଛନ୍ତି, ଏସ୍ଡିସି ୯ଟି ଆଦିବାସୀ ବହୁଳ ଜିଲା ଯେଉଁଠି ୫୦ ଭାଗ ଆଦିବାସୀ ରହୁଛନ୍ତି, ସେଠାରେ ଯେପରି ଆମୂଳଚୂଳ ପରିବର୍ତ୍ତନ ଆସିପାରିବ ସେଥିଲାଗି କାମ କରୁଛନ୍ତି। ଆଦିବାସୀ କଳା ସଂସ୍କୃତି ଆମୂଳଚୂଳ ପରିବର୍ତ୍ତନ ଉପରେ ବହୁତ ଧ୍ୟାନ ଦେଉଛନ୍ତି। ମୁଖ୍ୟମନ୍ତ୍ରୀଙ୍କ ମାର୍ଗଦର୍ଶନରେ ସ୍ବତନ୍ତ୍ର ଉନ୍ନୟନ ପରିଷଦ ଆଦିବାସୀ ବହୁଳ ଜିଲାରେ ଆମୂଳଚୂଳ ପରିବର୍ତ୍ତନ ଆଣିବ ବୋଲି ପ୍ରଦୀପ କହିଛନ୍ତି।