ଖମାର, ୨୨ା୮
ଅନୁଗୋଳ ଜିଲା ପାଲଲହଡ଼ା ବ୍ଲକ ଖମାରରେ ଥମୁନି ହାତୀ ଉପଦ୍ରବ। ବାରମ୍ବାର ଗଁା ନିକଟକୁ ଆସି ଧନ ଜୀବନ ନଷ୍ଟ କରୁଥିବାବେଳେ ଶୁକ୍ରବାର ପୁଣି ବ୍ୟାପକ ଫସଲ କ୍ଷତି ଘଟାଇଛନ୍ତି ହାତୀ ପଲ। ଖମାର ରେଞ୍ଜ ଝାଲକିଲିଣ୍ଡା ଗ୍ରାମ ଓ ନିକଟସ୍ଥ ଘାଗରା, ଚୁଆ, ଚଟାଖୋଲ ଆଦି ଅଞ୍ଚଳରେ ପଶି ପ୍ରାୟ ୧୦ରୁ ୧୫ ଏକର ଜମିରେ ଧାନ ଚାଷ ନଷ୍ଟ କରିଛନ୍ତି। ଫଳରେ ବହୁ କଷ୍ଟରେ ଧାର କରଜ କରି ଚାଷ କରିଥିବା ଚାଷୀଙ୍କ ମୁଣ୍ଡରେ ଚଡ଼କ ପଡିଛି। ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବାରୁ ଏପରି ବାରମ୍ବାର ଘଟୁଥିବା ସେମାନେ ଅଭିଯୋଗ ଆଣିଛନ୍ତି।
କ୍ଷତିଗ୍ରସ୍ତ ଚାଷୀ କୁନା ସାହୁ, ଚୈତନ୍ୟ ପ୍ରଧାନ, ମଙ୍ଗୁଲୁ ସାହୁ, ରମାକାନ୍ତ ପ୍ରଧାନ, ବିଜୟ ପ୍ରଧାନ, ସୁଶାନ୍ତ ପାତ୍ର ପ୍ରମୁଖଙ୍କ ଅଭିଯୋଗ ମୁତାବକ, ହାତୀପଲ ବର୍ଷ ତମାମ ଏହି ଅଞ୍ଚଳରେ ରହି କ୍ଷୟକ୍ଷତି ଘଟାଉଛନ୍ତି। ଜମିରେ ଚାଷ ନଷ୍ଟ କରିବା ସହ ଖଳାରୁ ମଧ୍ୟ ଅମଳ ଫସଲ ଖାଇଦେଉଛନ୍ତି। ଦୀର୍ଘ ବର୍ଷ ହେଲା ସ୍ଥାନୀୟ ଲୋକେ ଏହି ଅସୁବିଧାରୁ ମୁକୁଳିପାରୁ ନ ଥିବାବେଳେ ପଦକ୍ଷେପ ନ ନେଇ ବିଭାଗ ଚୁପ୍ ବସିଛି। ପୂର୍ବରୁ ହୋଇଥିବା କ୍ଷୟକ୍ଷତିର ଆଜି ପର୍ଯ୍ୟନ୍ତ କ୍ଷତିପୂରଣ ମିଳୁନାହିଁ। ଦିନରେ ଚାଷ କରି ରାତିରେ ଫସଲ ଜଗିବାକୁ ପଡୁଛି। ଚାଷୀମାନଙ୍କ ଅଭିଯୋଗ ସମ୍ପର୍କରେ ଫରେଷ୍ଟର ଛବିଳ ବେହେରା କହିଛନ୍ତି, ଟ୍ରେଞ୍ଚ ଖୋଳିବାକୁ ଆବଶ୍ୟକ ଜାଗା ମଞ୍ଜୁର ହୋଇସାରିଛି। ଖୁବ୍ଶୀଘ୍ର ସୋଲାର ଲାଇଟ ବ୍ୟବସ୍ଥା କରାଯିବ। ଆବଶ୍ୟକ ବନ କର୍ମଚାରୀଙ୍କ ସହ ବାଣ, ଲାଇଟ ସୁବିଧା ଯୋଗାଯାଇଛି। ରେଞ୍ଜର କାଜଲ କୁମାରୀ ନାୟକ କହିଛନ୍ତି, ଗୁରୁବାର ରାତିରେ କଣିହାଁ ବନାଞ୍ଚଳରୁ ହଠାତ୍ କେତୋଟି ହାତୀ ଖମାର ପଶିଆସିଥିଲେ। ବନ ବିଭାଗ ଜାଣି ନ ପାରିବାରୁ ଏପରି ହୋଇଛି। କ୍ଷତିପୂରଣ ପ୍ରଦାନ ବାବଦରେ ରେଞ୍ଜର କହିଛନ୍ତି, ଖରିଫ ଫସଲ ପାଇଁ ଏକର ପିଛା ୧୦ ହଜାର, ରବି ଫସଲ ପାଇଁ ଏକର ପିଛା ୧୨ ହଜାର ଅନୁକମ୍ପା ରାଶି ସରକାରଙ୍କ ତରଫରୁ ପ୍ରଦାନର ବ୍ୟବସ୍ଥା ଅଛି।