ନୂଆଦିଲ୍ଲୀ,୧୭।୨:ଗତ କିଛିଦିନ ୫ଜି ସେବାକୁ ନାନା ପ୍ରକାର ଚର୍ଚ୍ଚା ଓ ଆଲୋଚନା ହେଉଥିଲା। ଏପରିକି ବର୍ତ୍ତମାନ ସମୟରେ ଦେଶର ପ୍ରମୁଖ ସହରରେ ୫ଜି ସେବା ସେବା ପହଞ୍ଚତ୍ନାହିଁ। ସାରା ଦେଶରେ ୫ଜି ସେବା ଓ ସୁବିଧା ପ୍ରାରମ୍ଭିକ ପର୍ଯ୍ୟାୟରେ ରହିଛି। ସେହିଭଳି ଦେଶର ପ୍ରମୁଖ ଟେଲିକମ୍ କମ୍ପାନୀଗୁଡ଼ିକ ମଧ୍ୟ ଦେଶବାସୀଙ୍କ ନିକଟରେ ୫ଜି ସେବା ପହଞ୍ଚାଇବାକୁ ପ୍ରଚେଷ୍ଟା ଜାରି ରଖିଛନ୍ତି ହେଲେ ଏହାରି ମଧ୍ୟରେ ୫ଜି ୟୁଜର୍ସଙ୍କୁ ନେଇ ସ୍ମାର୍ଟ ଫୋନ୍ ବ୍ରାଣ୍ଡ ନୋକିଆର ଏକ ରିପୋର୍ଟ ସାମ୍ନାକୁ ଆସିଛି। ଏପରିକି ଗୁରୁବାର ନୋକିଆର ଇଣ୍ଡିଆ ମୋବାଇଲ ବ୍ରଡ୍ବ୍ୟାଣ୍ଡ୍ ଇଣ୍ଡେକ୍ସ ରିପୋର୍ଟ-୨୦୨୩ ସମ୍ପର୍କରେ ଘୋଷଣା କରାଯାଇଛି। ଉକ୍ତ ରିର୍ପୋଟେରେ ପ୍ରକାଶ କରାଯାଇଛି, ୨୦୨୪ ବେଳକୁ ଦେଶରେ ୧୫ କୋଟି ବ୍ୟବହାରକାରୀଙ୍କ ନିକଟରେ ୫ଜି ଥିବ। ଖାଲି ସେତିକି ନୁହେଁ, ୨୦୨୪ ବେଳକୁ ଦେଶରେ ୨ଜି ଗ୍ରାହକଙ୍କ ସଂଖ୍ୟା ବ୍ୟାପକ ପରିମାଣର ହ୍ରାସ ପାଇବ ବୋଲି ଉକ୍ତ ରିପୋର୍ଟରେ ଉଲ୍ଲେଖ କରାଯାଇଛି। ଅପରପକ୍ଷରେ ଟେଲିକମ୍ ସରଞ୍ଜାମ ପ୍ରସ୍ତୁତକାରୀ କମ୍ପାନୀ ନୋକିଆର ଆକଳନ ରିପୋର୍ଟ ଅନୁସାରେ ୨୦୨୪ ସୁଦ୍ଧା ଉଭୟ ୪ଜି ଏବଂ ୫ଜି ୟୁଜର୍ସଙ୍କ ସଂଖ୍ୟା ପ୍ରାୟ ୧୦୦ କୋଟି ହେବା ସମ୍ଭାବନା ରହିଛି। ଏପରିକି ନୋକିଆର ଓଏମ୍ଡିଆଇଏ ଦ୍ବାରା କରାଯାଇଥିବା ସର୍ଭେ ଅନୁସାରେ ୨୦୨୪ ବେଳକୁ ଭାରତରେ ୧୫ କୋଟି ୨ଜି ୟୁଜର ଥିବେ। ବର୍ତ୍ତମାନ ଭୋଡାଫୋନ୍-ଆଇଡିଆ, ବିଏସ୍ଏନ୍ଏଲ୍ ଏବଂ ଏୟାରଟେଲର ୩୫ କୋଟି ୨ଜି ୟୁଜର ରହିଛନ୍ତି। ଉଲ୍ଲେଖଯୋଗ୍ୟ, ୨୦୨୨ ଅକ୍ଟୋବରରେ ୫ଜି’ର ଆନୁଷ୍ଠାନିକ ଶୁଭାରମ୍ଭ ହୋଇଥିଲା। ଆରମ୍ଭରୁ ଆଜି ପର୍ଯ୍ୟନ୍ତ ଦେଶରେ ମୋଟ ୨ କୋଟି ୟୁଜର ୫ଜି ସହ ଯୋଡ଼ିହୋଇଥିବା ଜଣାପଡିଛି। ଏପରିକି ରିଲାଏନ୍ସ ଜିଓ ୨୦୨୪ ସୁଦ୍ଧା ୧୦କୋଟି ୟୁଜର୍ସଙ୍କୁ ୫ଜି ସେବା ଯୋଗାଇବା ନେଇ ଲକ୍ଷ୍ୟ ରଖିଛି। ସେହିଭଳି ସର୍ଭେ ରିପୋର୍ଟ ଅନୁସାରେ ୨୦୨୩ ଦ୍ବିତୀୟ ତ୍ରୈମାସିକ ଶେଷ ସୁଦ୍ଧା ଭାରତକୁ ପ୍ରାୟ ୧୦ କୋଟି ୫ଜି ସ୍ମାର୍ଟଫୋନ୍ ରପ୍ତାନି ହୋଇଥିଲା, ଯାହାକି ୨୦୨୩ ଶେଷ ସୁଦ୍ଧା ୪ଜି ସ୍ମାର୍ଟଫୋନ୍ ରପ୍ତାନିକୁ ଟପିଯିବ ବୋଲି କୁହାଯାଉଛି। ଅପରପକ୍ଷରେ ୨୦୨୨ରେ ଭାରତକୁ ୭କୋଟିରୁ ଅଧିକ ୫ଜି ଡିଭାଇସ୍ ପଠାଯାଇଛି। ବର୍ତ୍ତମାନ ସମୟରେ ୭୩ କୋଟି ୪ଜି ୟୁଜର୍ସଙ୍କ ମଧ୍ୟରେ ୮.୫କୋଟି ୟୁଜର୍ସ ୫ଜି ଯୁକ୍ତ ସ୍ମାର୍ଟଫୋନ୍ ବ୍ୟବହାର କରୁଛନ୍ତି। ସୂଚନାଯୋଗ୍ୟ, ଭାରତ ପୂର୍ବ ଭଳି ଡେଟା ଖର୍ଚ୍ଚ କରିବାରେ ଅନ୍ୟ ଦେଶ ତୁଳନାରେ ଶୀର୍ଷ ସ୍ଥାନରେ ରହିଛି। ୨୦୧୮ ରୁ ୨୦୨୨ ମଧ୍ୟରେ ଡେଟା ଟ୍ରାଫିକ୍ ୩.୨ ଗୁଣା ବଢ଼ିଛି, ଯାହାକି ୪.୫ ଏକ୍ସାବାଇଟ୍ରୁ ୧୪.୪ ଏକ୍ସାବାଇଟ୍ ପ୍ରତିମାସ ହୋଇଛି।