ନାଉଗାଁ,୨୭ା୫(ସ୍ବ.ପ୍ର.): ନାଉଗାଁ ବ୍ଲକ ଘୋଡାଂଶ ପଞ୍ଚାୟତ ସରପଞ୍ଚ ନୀହାର ରଞ୍ଜନ ବସ୍ତିଆଙ୍କ ଅଜାଣତରେ ତାଙ୍କ ଡିଏସ୍ସି(ଡିଜିଟାଲ ସିଗ୍ନେଚର ସାର୍ଟିଫିକେଟ୍)କୁ ଅପବ୍ୟବହାର କରି ପଞ୍ଚାୟତର ଅର୍ଥ ହଡ଼ପ ସହ ଏମ୍ଜିଏନ୍ଆରଇଜିଏସ୍ରେ କାର୍ଯ୍ୟ ନ ହୋଇ ଲକ୍ଷାଧିକ ଟଙ୍କାର ବିଲ୍ ହୋଇଛି। ଗତ ୮ ତାରିଖରେ ଜିଲାପାଳଙ୍କ ମିଳିତ ଜନଶୁଣାଣିରେ ଏନେଇ ଅଭିଯୋଗ ହୋଇଥିଲା। ଏପରିକି ପଞ୍ଚାୟତରେ ୪୦ ଲକ୍ଷରୁ ଊର୍ଦ୍ଧ୍ୱ ଟଙ୍କାର ଉନ୍ନୟନମୂଳକ କାର୍ଯ୍ୟ ହୋଇଥିଲେ ମଧ୍ୟ ବିଲ୍ ହେଉ ନ ଥିବା ନେଇ ସରପଞ୍ଚ ବସ୍ତିଆ ଅଭିଯୋଗରେ ଦର୍ଶାଇଥିଲେ। ଏହାର ତଦନ୍ତ ଦାୟିତ୍ୱ ଜିଲାପରିଷଦର ମୁଖ ବିକାଶ ତଥା ନିର୍ବାହୀ ଅଧିକାରୀ ରୁଦ୍ର ନାରାୟଣ ଦାସଙ୍କୁ ପ୍ରଦାନ କରାଯାଇଥିଲା। ଏହି ଅଭିଯୋଗକୁ ୧୫ ଦିନରୁ ଊର୍ଦ୍ଧ୍ୱ ସମୟ ବିତିଯାଇଥିଲେ ମଧ୍ୟ ଏପର୍ଯ୍ୟନ୍ତ ଉକ୍ତ ଘଟଣାର ତଦନ୍ତ କରାଯାଇ ନାହିଁ ବୋଲି ସରପଞ୍ଚ ବସ୍ତିଆ ଜଣାଇବା ସହ ଅସନ୍ତୋଷ ବ୍ୟକ୍ତ କରିଛନ୍ତି। ସେହିପରି ଗତ ୧୭ ତାରିଖରେ ପୂର୍ବତନ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ) ଅରୁଣ ପ୍ରଧାନ ତାଙ୍କ ନାମରେ ମିଥ୍ୟାରେ ଆକ୍ରମଣ ସମ୍ପର୍କିତ ମାମଲା ରୁଜୁ କରିଥିବା ବସ୍ତିଆ ପ୍ରେସ ବିବୃତିରେ ଜଣାଇଛନ୍ତି। ଉକ୍ତ ଦିନ ସେ ସେହି ସମୟରେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଗଣମାଧ୍ୟମ ପ୍ରତିନିଧିଙ୍କୁ ବିବୃତି ଦେଉଥିଲେ। ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଲାଗିଥିବା ସିସିଟିଭି ଫୁଟେଜକୁ ଯାଞ୍ଚ କଲେ ତାହା ଜଣାପଡିବ। ଏହାର ତଦନ୍ତ କରିବା ପାଇଁ ସେ ଜିଲା ଏସ୍ପିଙ୍କୁ ନିବେଦନ କରିଛନ୍ତି। ଏବିଷୟରେ ଅଭିଯୋଗ ଦେଇଥିବା ପୂର୍ବତନ ପିଇଓ ପ୍ରଧାନଙ୍କୁ ପଚାରିବାରେ, ଯଦି ସରପଞ୍ଚ ବସ୍ତିଆ ଆକ୍ରମଣ କରି ନ ଥିବେ ତେବେ ସେ ତଦନ୍ତ ସମୟରେ ପ୍ରମାଣ କରି ଦେଖାଇବେ ବୋଲି କହିଛନ୍ତି। ଦୁର୍ନୀତି ତଦନ୍ତ ସମ୍ପର୍କରେ ନିର୍ବାହୀ ଅଧିକାରୀ ରୁଦ୍ର ନାରାୟଣଙ୍କୁ ମୋବାଇଲ୍ ଯୋଗାଯୋଗ କରିବାରେ ସେ ଜରୁରୀ ମିଟିଂରେ ବ୍ୟସ୍ତ ଅଛନ୍ତି ବୋଲି କହି କୌଣସି ଉତ୍ତର ଦେଇ ନ ଥିଲେ। ଏହାପରେ ବାରମ୍ବାର ଦାସଙ୍କୁ ମୋବାଇଲ୍ରେ କଲ୍ କରାଯାଇଥିଲେ ମଧ୍ୟ ସେ ଉଠାଇ ନ ଥିଲେ।
