ନିରାକାରପୁର,୧୭ା୧୦(ଡି.ଏନ୍.ଏ.): ଖୋର୍ଦ୍ଧା ଜିଲା ଟାଙ୍ଗୀ ବନାଞ୍ଚଳରେ ହାତୀ ଉପଦ୍ରବ ଲାଗି ରହିଛି। ଶୁକ୍ରବାର ରାତିରେ ପଟିଆରୁ ୧୫ ଟିକିଆ ହାତୀପଲ୍ଲ ଆସି ଅଚ୍ୟୁତପୁର ପଞ୍ଚାୟତ ନାଲସିଂହ ଜଙ୍ଗଲରେ ରହିଥିବା ଜଣାପଡ଼ିଛି। ଫଳରେ ସ୍ଥାନୀୟ ଗ୍ରାମବାସୀ ଭୟଭୀତ ଅବସ୍ଥାରେ ରହିଛନ୍ତି। ଏମାନଙ୍କୁ ଘଉଡାଇବା ଲାଗି ସାଧାରଣରେ ଦାବି ହେଉଛି। ପ୍ରକାଶ ଯେ, ଦୀର୍ଘଦିନ ହେବ ଟାଙ୍ଗୀ ବନାଞ୍ଚଳରେ ୨ ଓ ଗୟାବନ୍ଧ ଜଙ୍ଗଲରେ ୬ ହାତୀ ରହିଆସୁଥିଲେ। ଏମାନେ ସନ୍ଧ୍ୟାହେଲେ ଖାଦ୍ୟ ଅନ୍ବେଷଣରେ ବଘେଇପୁଟ, ନାରଗଦା, କମାଗୁରୁ, ନିଧିପୁର, ମୁକ୍ତାପୁର, ଗୟାବନ୍ଧ, ଗୋଳବାଇ, ଗୋଡିପଡା, ଟାଙ୍କୋଳ, କଲରାଝର ହଜ, ସିକୋ ଆଦି ଅଞ୍ଚଳରେ ପଶି ଫସଲ ଖାଇବା ସହ ନଷ୍ଟ କରୁଛନ୍ତି। ଏଥିସହିତ ଘର ଭାଙ୍ଗୁଥିବା ନଜିର ରହିଛି। ଫଳରେ ସ୍ଥାନୀୟ ଗ୍ରାମବାସୀ ଭୟଭୀତ ଅବସ୍ଥାରେ ରହିବା ସହ ସନ୍ଧ୍ୟା ହେଲେ ଘରୁ ବାହାରୁ ନ ଥିବା ଜଣାପଡ଼ିଛି। ଏନେଇ ଟାଙ୍ଗୀ ବନାଞ୍ଚଳ ଅଧିକାରୀ ରବୀନ୍ଦ୍ର ପଣ୍ଡା କହିଛନ୍ତି, ପୂର୍ବରୁ ୬ ହାତୀ ରହିଥିବା ବେଳେ ଏବେ ପଟିଆ ଅଞ୍ଚଳରୁ ଆଉ ୧୫ ହାତୀ ଆସିଛନ୍ତି। ନାଲସିଂହଠାରେ ୧୯ ହାତୀ ଥିବା ବେଳେ ନାରଗଦାରେ ୨ ରହିଛନ୍ତି ବୋଲି ସେ କହିଛନ୍ତି। ଅନ୍ୟପଟେ ହାତୀଙ୍କୁ ଘଉଡ଼ାଇବା ପାଇଁ ବନବିଭାଗ ପକ୍ଷରୁ ଉଦ୍ୟମ ଜାରି ରହିଛି ବୋଲି ଭୂଷଣ୍ଡପୁର ଫରେଷ୍ଟର ସିଧୁଚରଣ ସିଂ କହିଛନ୍ତି।
