କଣ୍ଟାବାଞ୍ଜି,୩୧ା୧(ଡି.ଏନ.ଏ.): ବଲାଙ୍ଗୀର ଜିଲା କଣ୍ଟାବାଞ୍ଜି ଥାନା ପୋଲିସ ଓ ଜିଆରପି ଦୀର୍ଘ ୧ବର୍ଷ ୩ ମାସ ପରେ ଝାରଖଣ୍ଡର ଲତିଫ୍ ଅନସାରୀ (୧୯) ହତ୍ୟାକାଣ୍ଡର ପର୍ଦ୍ଦାଫାଶ କରିଛି। କଣ୍ଟାବାଞ୍ଜି-ତୁରେକେଲା ରେଲୱେ ଜମିରୁ ଜେସିବିରେ ମାଟିଖୋଳି ରବିବାର ମୃତଙ୍କ ହାଡକଙ୍କାଳ ଉଦ୍ଧାର କରାଯିବା ଘଟଣା ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି। ସୂଚନା ଅନୁସାରେ, କଣ୍ଟାବାଞ୍ଜି-ତୁରେକେଲା ଅଞ୍ଚଳରେ ରେଳଲାଇନ୍ କାମ କରିବାକୁ ଝାରଖଣ୍ଡ ପ୍ରଦେଶ ରାଞ୍ଚତ୍ ଅଞ୍ଚଳରୁ ୭ଜଣ କର୍ମଚାରୀ ସମଶେର ଅନସାରୀ, ମୁସ୍ତାକ ଅନସାରୀ, ସହନାଜ ଅନସାରୀ, ଫିରୋଜ ଅନସାରୀ, ଅଫ୍ରୋଜ ଅନସାରୀ, ସହୀଦ ଅନସାରୀ ଓ ଲତିଫ୍ ଅନସାରୀ ଗତ ୨୦୨୦ ସେପ୍ଟେମ୍ବରରେ କଣ୍ଟାବାଞ୍ଜି ଆସିଥିଲେ। କିଛିଦିନ କାମ କରିବା ପରେ ନଭେମ୍ବର ୧୬ରେ ଲତିଫ୍ ଅନସାରି ନିଖୋଜ ହୋଇଯାଇଥିବା ନେଇ ତାଙ୍କ ପରିବାରକୁ ଫୋନ୍ ଯୋଗେ ସୂଚନା ଦିଆଯାଇଥିଲା। ଏହାପରେ ଲତିଫ୍ଙ୍କ ଭାଇ ତୌଫିକ୍ ଅନସାରି କଣ୍ଟାବାଞ୍ଜି ଆସି ତାଙ୍କୁ ଖୋଜାଖୋଜି କରିଥିଲେ। ନ ପାଇବାରୁ ୨ ଡିସେମ୍ବର ୨୦୨୦ରେ କଣ୍ଟାବାଞ୍ଜି ଥାନାରେ ଏକ ନିଖୋଜ ଅଭିଯୋଗପତ୍ର ଦେଇ ରାଞ୍ଚତ୍ ଫେରିଯାଇଥିଲେ। ଏହାପରେ ପୋଲିସ ତଦନ୍ତ ବିଶେଷ ଆଗେଇ ନ ଥିଲା। ଘଟଣାର କିଛି ମାସ ପରେ କଣ୍ଟାବାଞ୍ଜି ଅଞ୍ଚଳରେ କାମ କରୁଥିବା ଉକ୍ତ ୬ କର୍ମଚାରୀଙ୍କ ମଧ୍ୟରୁ ୪/୫ ଜଣ ରାଞ୍ଚତ୍ ଫେରିଯାଇଥିଲେ। ସେଠାରେ ଥିବା ଏକ ମଦ ଦୋକାନରେ ସେମାନେ ମଦ ପିଇ କିଭଳି ଭାବେ ଲତିଫଙ୍କୁ ହତ୍ୟା କରି ରେଳଧାରଣା କଡରେ ମାଟି ଖୋଳି ପୋତି ଦେଇଥିଲେ ତାହା ବଖାଣିଥିଲେ। ସମ୍ପୃକ୍ତ ଘଟଣା ମୃତ ଲତିଫଙ୍କ ଭାଇ ତୌଫିକ୍ଙ୍କ କାନରେ ପଡିବା ପରେ ସେ କଣ୍ଟାବାଞ୍ଜି ଆସି ପୋଲିସକୁ ସମସ୍ତ ଘଟଣା ଜଣାଇଥିଲେ। ଏହାପରେ କଣ୍ଟାବାଞ୍ଜି ପୋଲିସ ସେଠାରେ କାମ କରୁଥିବା ଫିରୋଜ ଅନ୍ସାରୀଙ୍କୁ ଅଟକ ରଖି ପଚରାଉଚରା କରିଥିଲା। କଣ୍ଟାବାଞ୍ଜି ପୋଲିସ ବିଭିନ୍ନ ସୂତ୍ରରୁ ଖବର ସଂଗ୍ରହ କରିବା ପରେ କଣ୍ଟାବାଞ୍ଜିି-ତୁରେକେଲା ରେଳ ସେକ୍ସନର ବ୍ରିଜ ନମ୍ବର ୨୭୩ ନିକଟରେ ଜେସିବି ଲଗାଇ ମାଟି ଖୋଳି ଏକ କଙ୍କାଳ ଉଦ୍ଧାର କରିଛି। ଉକ୍ତ କଙ୍କାଳ ମୃତ ଲତିଫ୍ ଅନସାରୀଙ୍କର ବୋଲି କୁହାଯାଉଛି। କଣ୍ଟାବାଞ୍ଜି ଥାନା ପୋଲିସ ଏବଂ ଜିଆରପି ମିଳିତ ଭାବେ ଘଟଣାର ତଦନ୍ତ କରୁଛନ୍ତି। ଘଟଣାରେ ସମ୍ପୃକ୍ତ ଅନ୍ୟ ୬ ଜଣ ଫେରାର ହୋଇଯାଇଛନ୍ତି। କଣ୍ଟାବାଞ୍ଜି ଏସ୍ଡିପିଓ ହୃଷୀକେଶ ମେହେର, କଣ୍ଟାବାଞ୍ଜି ଥାନା ଆଇଆଇସି ସତ୍ୟଜିତ କନ୍ଦନକେଲ, ସବ୍ଇନ୍ସପେକ୍ଟର ପ୍ରତୀକ କୁମାର ଦୁରିଆ, କଣ୍ଟାବାଞ୍ଜି ଜିଆରପି ସିନ୍ଧରିଆ ବାବୁ, ସ୍ଥାନୀୟ ତହସିଲଦାର ତଥା ଏକ୍ଜିକ୍ୟୁଟିଭ ମାଜିଷ୍ଟ୍ରେଟ ସମୀର ବେହେରାଙ୍କ ଉପସ୍ଥିତିରେ ମାଟିତଳୁ ମୃତକଙ୍କ କଙ୍କାଳ ଉଦ୍ଧାର କରାଯାଇଛି। ହାଡକଙ୍କାଳକୁ ଫରେନସିକ୍ ଲାବ୍କୁ ପଠାଯିବ ବୋଲି ଜଣାପଡିଛି।