କଣ୍ଟାପଡ଼ା,୧୨।୫(ଡି.ଏନ୍.ଏ.): ଓଲଟପୁର ପୋଲିସ ଗୁରୁବାର ୬୦ ନମ୍ବର ରାଜ୍ୟ ରାଜପଥରୁ ଗୋମାଂସ ଚାଲାଣ ହେଉଥିବା ଏକ ପିକ୍ଅପ ଭ୍ୟାନ୍ (ଓଡି ୦୫ କ୍ୟୁ ୧୯୮୩)କୁ ଜବତ କରିଛି। ପୋଲିସ ଘଟଣାରେ ସମ୍ପୃକ୍ତ ଥିବା ୨ଜଣଙ୍କୁ ଗିରଫ କରି ଗୁରୁବାର କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତ ଦ୍ୱୟ ହେଲେ କଟକ ଜିଲା ଜଗତପୁର ଥାନା ଅଧୀନ ପଦ୍ମପୁର ଗ୍ରାମର ଶାହରୁଖ ଖାନ୍(୨୮) ଓ ମହାସିଂହପୁର ଗ୍ରାମର ଏସ୍.କେ. ଅଶ୍ରଫଅଲି(୨୭)। ଏହି ସଂକ୍ରାନ୍ତରେ ଓଲଟପୁର ଥାନା ପୋଲିସ ଏକ ମାମଲା (ନଂ.୫୨/୨୨) ରୁଜୁକରି ତଦନ୍ତ ଜାରି ରଖିଛି।
ମିଳିଥିବା ସୂଚନା ମୁତାବକ, ଗିରଫ ଅଭିଯୁକ୍ତ ଦ୍ୱୟ ନିଆଳିରୁ ଏକ ପିକ୍ଅପ୍ ଭ୍ୟାନ୍ରେ ୧୫ କୁଇଣ୍ଟାଲରୁ ଊର୍ଦ୍ଧ୍ୱ ଗୋମାଂସ ଧରି ଜଗତପୁର ଯାଉଥିଲେ। ଖବରପାଇ ଓଲଟପୁର ଥାନା ଏସ୍ଆଇ ନୃସିଂହ ଚରଣ ଜଗତି ପୋଲିସ ଫୋର୍ସ ସହ ରାତି ୩ଟାରେ ବାଇରୋଇ ଛକରେ ଗାଡିକୁ ଅଟକାଇ ଯାଞ୍ଚ କରିଥିଲେ। ଯାଞ୍ଚ ବେଳେ ଗାଡ଼ିରେ ଗୋମାଂସ ଭର୍ତ୍ତି ହୋଇଥିବା ଜଣାପଡିଥିଲା। ପୋଲିସ ଜବତ ମାଂସର ନମୁନା ପରୀକ୍ଷା ପାଇଁ ପଠାଇଥିଲା। ଅନ୍ୟପକ୍ଷେ ଜବତ ଗୋମାଂସକୁ ପୋତିବା ପାଇଁ ପ୍ରଶାସନ ଭିତରେ ଛକାପଞ୍ଝା ହୋଇଥିଲା। ଫଳରେ କଣ୍ଟାପଡା ସରପଞ୍ଚ ନିର୍ମଳ କୁମାର ସାହୁଙ୍କ ସହଯୋଗରେ ଲଟାଉପୁର ସ୍ଥିତ ଏକ ମଶାଣିରେ ଏହାକୁ ପୋତି ଦିଆଯାଇଛି। ଏହି ସମୟରେ ସ୍ଥାନୀୟ ଅତିରିକ୍ତ ତହସିଲଦାର ଶୁଭ୍ରାଂଶୁ ସାହୁ, ଓଲଟପୁର ଥାନା ଆଇଆଇସି ବିଜୟା ସାହୁ, କଣ୍ଟାପଡ଼ା ବ୍ଲକ ପ୍ରାଣୀ ଚିକିତ୍ସାଧିକାରୀ ଜିତେନ୍ଦ୍ର ମହାରଣା ପ୍ରମୁଖ ଉପସ୍ଥିତ ଥିଲେ।