ଜେରୁଜେଲମ୍,୨୯।୧୦: ଗାଜାରେ ସ୍ଥଳ ଆକ୍ରମଣକୁ ଶନିବାର ଜୋର୍ଦାର କରିଛି ଇସ୍ରାଏଲ୍। ସମୁଦ୍ର ଓ ଆକାଶମାର୍ଗରୁ ଆକ୍ରମଣ ସହିତ ଗାଜା ଭିତରକୁ ଅଧିକ ଟ୍ୟାଙ୍କ୍ ଓ ହଜାର ହଜାର ସୈନ୍ୟ ପ୍ରବେଶ କରିଛନ୍ତି। ଯୁଦ୍ଧ ଏକ ନୂଆ ପର୍ଯ୍ୟାୟରେ ପହଞ୍ଚତ୍ଲା ବୋଲି ଇସ୍ରାଏଲ୍ ପ୍ରତିରକ୍ଷା ମନ୍ତ୍ରୀ ୟୋଭ୍ ଗାଲାଣ୍ଟ କହିଛନ୍ତି। ପ୍ରବଳ ବୋମାମାଡ଼ ଯୋଗୁ ଗାଜାର ବହୁ ଅଞ୍ଚଳ ମାଟିରେ ମିଶିଲାଣି। ସୈନ୍ୟବାହିନୀ ପକ୍ଷରୁ ଜାରି କରାଯାଇଥିବା ଫଟୋରେ ବହୁସଂଖ୍ୟାରେ ଟ୍ୟାଙ୍କ ଗାଜା ମଧ୍ୟରେ ପ୍ରବେଶ କରୁଥିବା ଦେଖିବାକୁ ମିଳିଛି। ଏଥିସହ ଇସ୍ରାଏଲୀ ଯୁଦ୍ଧବିମାନଗୁଡ଼ିକର ବୋମାମାଡ଼ରେ ହମାସ୍ର ୧୫୦ଟି ସ୍ଥାନରେ ଥିବା ଭୂତଳ ବଙ୍କର ଓ ସୁଡ଼ଙ୍ଗ ଧ୍ୱସ୍ତବିଧ୍ୱସ୍ତ ହୋଇଯାଇଛି। ହମାସ୍କୁ ମୂଳପୋଛ କରିବା ପାଇଁ ଭୂତଳ ଟନେଲଗୁଡ଼ିକୁ ଇସ୍ରାଏଲ୍ ଟାର୍ଗେଟ କରିଛି। ଅକ୍ଟୋବର ୭ରେ ଆକ୍ରମଣ ଆରମ୍ଭ ହେବାଠାରୁ ଇତିମଧ୍ୟରେ ଗାଜାରେ ୭,୭୦୦ ପାଲେଷ୍ଟିନୀୟଙ୍କ ମୃତ୍ୟୁ ଘଟିଛି। ଶୁକ୍ରବାର ରାତିରୁ ୩୭୭ ଜଣଙ୍କ ଜୀବନ ଗଲାଣି ବୋଲି ଗାଜା ସ୍ବାସ୍ଥ୍ୟ ମନ୍ତ୍ରଣାଳୟ କହିଛି। ମୃତକଙ୍କ ମଧ୍ୟରୁ ଅଧିକାଂଶ ମହିଳା ଓ ଶିଶୁ। ବୋମାମାଡ଼ରେ ଭୁଶୁଡ଼ି ପଡ଼ିଥିବା ବିଲ୍ଡିଂ ତଳେ ପ୍ରାୟ ୧,୭୦୦ ଲୋକ ରହିଯାଇଥିବା ଆକଳନ କରାଯାଉଛି।