ନୂଆଦିଲ୍ଲୀ,୨୩।୧୨: ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନୀ ସୋମବାର ଅନ୍ତର୍ଜାତୀୟ କ୍ରିକେଟରେ ୧୫ ବର୍ଷ ପୂରଣ କରିଛନ୍ତି। ଆଜିକୁ ଠିକ୍ ୧୫ ବର୍ଷ ତଳେ ୨୦୦୪, ଡିସେମ୍ବର ୨୩ ତାରିଖରେ ଧୋନୀ ଅନ୍ତର୍ଜାତୀୟ କ୍ରିକେଟରେ ପଦାର୍ପଣ କରିଥିଲେ। ବାଂଲାଦେଶ ବିପକ୍ଷ ଉକ୍ତ ମ୍ୟାଚ୍ରେ ସେ ପ୍ରଥମ ବଲରେ ହିଁ ରନ୍ ଆଉଟ୍ ହୋଇଥିଲେ। ଖାତା ଖୋଲିବା ପୂର୍ବରୁ ତାଙ୍କୁ ପ୍ୟାଭିଲିୟନ ଫେରିବାକୁ ପଡ଼ିଥିଲା। ଦ୍ୱିତୀୟ ମ୍ୟାଚ୍ରେ ମଧ୍ୟ କିଛି ଖାସ୍ କରିପାରି ନ ଥିଲେ। କିନ୍ତୁ ତୃତୀୟ ମ୍ୟାଚ୍ରେ ସେ ୧୪୮ ରନ୍ର ବିସ୍ଫୋରକ ଇନିଂସ ଖେଳିଥିଲେ। ଦୀର୍ଘ ୧୫ ବର୍ଷ ମଧ୍ୟରେ ସେ କେବଳ ଦେଶ ନୁହେଁ, ବିଶ୍ୱର ସବୁଠୁ ସଫଳ ଅଧିନାୟକ ଭାବେ ବିବେଚିତ ହେଉଛନ୍ତି। ୨୮ ବର୍ଷ ପରେ ଭାରତକୁ ଦ୍ୱିତୀୟ ବିଶ୍ୱକପ୍ ଆଣିଦେଇଥିଲେ। ୨୦୧୧ ବିଶ୍ୱକପ୍ ଫାଇନାଲରେ ତାଙ୍କର ସେହି ଛକା ପ୍ରଶଂସକଙ୍କ ମନରୁ ଲିଭିବା କଷ୍ଟକର। ବିଶ୍ୱର ଏକମାତ୍ର ଅଧିନାୟକ ଭାବେ ଧୋନୀ ଟି୨୦ ବିଶ୍ୱକପ୍, ଆଇସିସି ଦିନିକିଆ ବିଶ୍ୱକପ୍ ଓ ଆଇସିସି ଚାମ୍ପିୟନ୍ସ ଟ୍ରଫି ହାତେଇଛନ୍ତି। ଏପର୍ଯ୍ୟନ୍ତ ବିଶ୍ୱର କୌଣସି ଅଧିନାୟକ ତାଙ୍କ ସମକକ୍ଷ ହୋଇପାରିନାହାନ୍ତି। ଏକଦା କିମ୍ବଦନ୍ତୀ ବ୍ୟାଟ୍ସମ୍ୟାନ ସଚିନ ତେନ୍ଦୁଲକର କହିଥିଲେ, ‘ଯେତେ ଅଧିନାୟକଙ୍କ ନେତୃତ୍ୱରେ ଖେଳିଛି, ସେମାନଙ୍କ ମଧ୍ୟରୁ ଧୋନୀ ଶ୍ରେଷ୍ଠ’। ଏହି ଉଇକେଟକିପର ବ୍ୟାଟ୍ସମ୍ୟାନ ଅନ୍ତର୍ଜାତୀୟ ସ୍ତରରେ ୯୦ ଟେଷ୍ଟ, ୩୫୦ ଦିନିକିଆ ଓ ୯୮ ଟି୨୦ ଖେଳିସାରିଛନ୍ତି। ୩୮ ବର୍ଷୀୟ ଭେଟେରାନଙ୍କ ନାମରେ ମୋଟ ୧୭,୨୬୬ ରନ୍ ରହିଛି। ଆଉ ଉଇକେଟ ପଛରେ ରହି ୮୨୯ ବ୍ୟାଟ୍ସମ୍ୟାନଙ୍କ ଉଇକେଟ ନେଇସାରିଛନ୍ତି।