ନାଉଗାଁ,୬।୧ (ସ୍ବ.ପ୍ର.): ଜଗତସିଂହପୁର ଜିଲା ନାଉଗାଁ ବ୍ଲକର ବିଭିନ୍ନ ସ୍ଥାନରେ ବେଆଇନ ଇଟାଭାଟି ପୋଡ଼ାହେଉଛି। ସରକାରୀ ନିୟମକୁ ବେଖାତିର କରି ବ୍ୟବସାୟୀମାନେ ସ୍କୁଲ ଓ ଜନଗହଳି ସ୍ଥାନ ଆଦିରେ ଇଟାଭାଟିରେ ନିଆଁ ଲଗାଉଛନ୍ତି। ଏ ନେଇ ତହସିଲ ବା ରାଜସ୍ବ କାର୍ଯ୍ୟାଳରେ ବାରମ୍ବାର ଅଭିଯୋଗ କରାଯିବା ପରେ ବି କିଛି ସୁଫଳ ମିଳୁ ନ ଥିବା ଅଞ୍ଚଳବାସୀ ଅଭିଯୋଗ କରିଛନ୍ତି।
ବ୍ଲକ ଅଧୀନ କୋରୁଅ ପଞ୍ଚାୟତସ୍ଥିତ ଡାହାଣିଖିଆ ପ୍ରାଥମିକ ବିଦ୍ୟାଳୟ ପଛ ପାର୍ଶ୍ୱରେ ଜଣେ ବ୍ୟବସାୟୀ ଲକ୍ଷ ଲକ୍ଷ ଇଟା ପକାଉଥିବା ବେଳେ ଏକାଧିକ ଭାଟି କରି ନିଆଁ ଲଗାଉଛନ୍ତି। ଇଟାଭାଟିରୁ ବାହାରୁଥିବା ଧୂଆଁ ସ୍କୁଲ ପିଲା ଓ ଆଖପାଖ ଗ୍ରାମର ଲୋକଙ୍କୁ ଅସ୍ତବ୍ୟସ୍ତ କରୁଛି। ଏହା ପିଲାଙ୍କ ପାଠ ପଢ଼ାରେ ବ୍ୟାହତ ସୃଷ୍ଟି କରୁଛି। ଇଟାଭାଟି ଧୂଆଁରେ ଫୁସ୍ଫୁସ୍ ଓ ଶ୍ୱାସ ରୋଗ ହେବାର ଆଶଙ୍କା ଅଧିକ ଥିବାରୁ ଏହାକୁ ଜନବସତିଠାରୁ ଦୂରରେ ଲଗାଇବା ପାଇଁ ନିୟମ ରହିଛି। ହେଲେ ବ୍ୟବସାୟୀମାନେ ଏଥିପ୍ରତି ଦୃଷ୍ଟି ଦେଉନାହାନ୍ତି, ଯାହାଫଳରେ ସ୍କୁଲ ପିଲାଙ୍କଠାରୁ ଆରମ୍ଭ କରି ଗାଁର ବୟସ୍କମାନେ ବହୁ ଅସୁବିଧା ଭୋଗୁଛନ୍ତି। ଇଟା ପକାଇବା ପୂର୍ବରୁ ସ୍ଥାନୀୟ ରାଜସ୍ବ କାର୍ଯ୍ୟାଳୟ କିମ୍ବା ତହସିଲ କାର୍ଯ୍ୟାଳୟରୁ ରସିଦ କାଟି ଅନୁମତି ଆଣିବାର ନିୟମ ରହିଛି। କିନ୍ତୁ ଅଧିକାଂଶ ବ୍ୟବସାୟୀ ଏହାକୁ ମାନୁ ନାହାନ୍ତି। ତେବେ ରାଜସ୍ବ ବିଭାଗ କିମ୍ବା ତହସିଲ କାର୍ଯ୍ୟାଳୟ ପକ୍ଷରୁ ତଦନ୍ତ କରାଯାଉ ନ ଥିବାରୁ ଇଟା ବ୍ୟବସାୟୀମାନେ ମନଇଚ୍ଛା ଇଟା ପକାଉଛନ୍ତି। ବ୍ଲକ ଦେଇ ପ୍ରବାହିତ ଦେବୀ ନଦୀ ପଠାର ବିଭିନ୍ନ ସ୍ଥାନରେ ମଧ୍ୟ ବେଆଇନ ଇଟା ପକାଯାଉଛି। ବେଆଇନ ଇଟାଭାଟି ହେବା ଦ୍ୱାରା ଇଟା ବ୍ୟବସାୟୀ ରାଜସ୍ବ ଫାଙ୍କି ଟଙ୍କା ରୋଜଗାର କରୁଥିବା ବେଳେ ପ୍ରଶାସନ ସ୍ଥାଣୁତାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ସମ୍ପର୍କରେ ନାଉଗାଁ ତହସିଲଦାର ଜେ. କଳ୍ପାନଙ୍କୁ ପଚାରିବାରେ, ସ୍ଥାନୀୟ ରାଜସ୍ବ ନିରୀକ୍ଷକଙ୍କୁ ପଠାଇ ତଦନ୍ତ କରାଯିବ। ଏବଂ ରିପୋର୍ଟ ଆସିବା ପରେ ବେଆଇନ ଭାବେ ଇଟା ବ୍ୟବସାୟ ଚଳାଇଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
