ବ୍ରହ୍ମପୁର ଅଫିସ,୧୩।୮: ଗଞ୍ଜାମ ଜିଲା ବ୍ରହ୍ମପୁର ସହରରେ ଏବେ ଦୁର୍ବୃତ୍ତ ମାତିଛନ୍ତି। ଗୋଟିଏ ରାତିରେ ବୈଦ୍ୟନାଥପୁର ଥାନା ଅନ୍ତର୍ଗତ ପୃଥକ ସ୍ଥାନରେ ଥିବା ଦୁଇଟି ଦୋକାନରେ ଏହି ଦୁର୍ବୃତ୍ତ କଳାକାନା ବୁଲାଇଛି। ଯାହାକି ପୋଲିସ ପାଇଁ ମୁଣ୍ଡବ୍ୟଥାର କାରଣ ପାଲଟିଛି। ଖବରପାଇ ବୈଦ୍ୟନାଥପୁର ଥାନା ପୋଲିସ ଏବେ ସାଇଣ୍ଟିଫିକ ଟିମ୍ ଓ ସନ୍ଧାନୀ କୁକୁର ସହାୟତାରେ ତଦନ୍ତ କରୁଛି। ଗେଟବଜାର-ନୂଆ ବସଷ୍ଟାଣ୍ଡ ରୋଡ଼ ଶିବ ମନ୍ଦିର ସମ୍ମୁଖରେ ଥିବା ଏସିଆନ ସୁପର ବଜାର ତଥା ଫୁଟୱେର ନାମକ ସୋରୁମ ଭିତରେ ଥିବା ୩ଟି କାଉଣ୍ଟରରୁ ୮ଲକ୍ଷ ୦୪ ହଜାର ଟଙ୍କା ଚୋରି ହୋଇଥବା ନେଇ ଥାନାରେ ଅଭିଯୋଗ ହୋଇଛି । ସୋରୁମ ମାଲିକ ମହମ୍ମଦ ଇରଫାନ ଏ ନେଇ ଥାନାରେ ଅଭିଯୋଗ କରିଛନ୍ତି।
ସେହିପରି ଉକ୍ତ ଥାନା ଅନ୍ତର୍ଗତ ବ୍ରହ୍ମପୁର ତହସିଲ କାର୍ଯ୍ୟାଳୟ ସମ୍ମୁଖରେ ଥିବା ପାର୍ଥି ପ୍ଲାଏଉଡ ଆଣ୍ଡ ଇଲେକ୍ଟ୍ରିକାଲ ଦୋକାନର କ୍ୟାସ କାଉଣ୍ଟରରୁ ପ୍ରାୟ ୮ ଲକ୍ଷ ଟଙ୍କା ଚୋରି ହୋଇଥିବା ମାଲିକ ରବି କିରନ ଅଭିଯୋଗ କରିଛନ୍ତି । ଦୁଇଟି ଯାକ ଚୋରି ଏକା ଢଙ୍ଗରେ ହୋଇଥିବାରୁ ଗୋଟିଏ ଗ୍ୟାଙ୍ଗ ଏଥିରେ ସାମିଲ ଥିବା ପୋଲିସ ସନ୍ଧେହ କରୁଛି।
