ଓ୍ବାଶିଂଟନ,୨୫।୯ : ଆମେରିକାର ମାଧ୍ୟମିକ ବିଦ୍ୟାଳୟର ଛାତ୍ରମାନଙ୍କ ପାଇଁ ବିଜ୍ଞାନ, ପ୍ରଯୁକ୍ତିବିଦ୍ୟା, ଇଞ୍ଜିନିୟରିଂ ଏବଂ ଗଣିତ (ଏସଟିଇଏମ) ପ୍ରତିଯୋଗିତାର ଅନ୍ତିମ ପର୍ଯ୍ୟାୟରେ ପହଞ୍ଚିଥିବା ୩୦ ଜଣ ଛାତ୍ରୀଛାତ୍ରଙ୍କ ମଧ୍ୟରୁ ୧୬ ଜଣ ମୂଳ ଭାରତୀୟ ଅଟନ୍ତି। ଏହି ପ୍ରତିଯୋଗିତାର ନାମ ହେଉଛି ଥର୍ମୋ ଫିସର ସାଇଣ୍ଟିଫିକ ଜୁନିଅର ଇନୋଭେଟର୍ସ ଚ୍ୟାଲେଞ୍ଜ (ଥର୍ମୋ ଫିସର ଜେଆଇସି)।
ଏହାର ଉଦ୍ଦେଶ୍ୟ ହେଉଛି ଭବିଷ୍ୟତର ବଡ ଆହ୍ବାନର ସମାଧାନ ପାଇଁ ଯୁବ ବୈଜ୍ଞାନିକ ଏବଂ ଇଞ୍ଜିନିୟରମାନଙ୍କୁ ପ୍ରେରଣା ଦେବା। ୩୦୦ ଛାତ୍ରୀଛାତ୍ରଙ୍କ ମଧ୍ୟରୁ ବୈଜ୍ଞାନିକ, ଇଞ୍ଜିନିୟର୍ ଏବଂ ଶିକ୍ଷକମାନଙ୍କର ଏକ ଚୟନ କମିଟି ଅନ୍ତିମ ପର୍ଯ୍ୟାୟ ପାଇ ୩୦ ଜଣଙ୍କୁ ଚୟନ କରିଥିଲେ। ଏହି ଛାତ୍ରୀତଛାତ୍ରମାନେ ଆସନ୍ତା ମାସରେ ୱାଶିଂଟନରେ ହେବାକୁ ଥିବା ଫାଇନାଲରେ ନିଜର ପ୍ରତିଭା ପ୍ରଦର୍ଶନ କରି ୧୦୦,୦୦୦ ଡଲାରରୁ ଅଧିକ ପୁରସ୍କାର ପାଇଁ ପ୍ରତିଦ୍ୱନ୍ଦ୍ୱିତା କରିବେ।
ଏଥିରେ ୨୫,୦୦୦ ଡଲାର ଥର୍ମୋ ଫିସର ସାଇଣ୍ଟିଫିକ ଆସେଣ୍ଡ (ନୂତନ ଆବିଷ୍କାର ପାଇଁ ଆସ୍ପିରିଙ୍ଗ ସାଇଣ୍ଟିଷ୍ଟ) ପୁରସ୍କାର ମଧ୍ୟ ଅନ୍ତର୍ଭୁକ୍ତ। ବିଚାରପତିମାନଙ୍କର ପ୍ୟାନେଲ ଏହି ଛାତ୍ରମାନଙ୍କର ବୈଜ୍ଞାନିକ ଗବେଷଣା, ସୃଜନଶୀଳତା ଏବଂ ଦକ୍ଷତାକୁ ମୂଲ୍ୟାଙ୍କନ କରିବେ ।