କୋରାପୁଟ,୨୦।୮(ଅମିତାଭ ବେହେରା)କୋରାପୁଟ ଜିଲାର ଦଶମନ୍ତପୁର ବ୍ଲକ ନନ୍ଦିଗାଁ ପଞ୍ଚାୟତର ୧୬ ଗାଁ ୧୫ ଦିନ ହେବ ଅନ୍ଧକାର ରହିଛି। ତେଣୁ ପଞ୍ଚାୟତତବାସୀ ଶନିବାର କୋରାପୁଟ ଆସି ବିଦ୍ୟୁତ୍ ବିଭାଗ ତଥା ଟାଟା ପାୱାରର ଉପଖଣ୍ଡ ସହକାରୀ ଯନ୍ତ୍ରୀ ବିଜୟ କୁମାର ପଣ୍ଡାଙ୍କୁ ସାକ୍ଷାତ କରି ଉକ୍ତ ଗ୍ରାମଗୁଡିକରେ ବିଦ୍ୟୁତ୍ ସେବା ସ୍ବାଭାବିକ କରିବାକୁ ନିବେଦନ କରିଛନ୍ତି।
୧୫ ଦିନ ହେବ ନନ୍ଦିଗାଁ ପଞ୍ଚାୟତର ଏହି ଗ୍ରାମଗୁଡିକରେ ବିଦ୍ୟୁତ ନ ଥିବାରୁ ବିଭିନ୍ନ ଅସୁବିଧା ହେଉଥିବା ବାଣୁଆଗୁଡା ଗ୍ରାମର ତ୍ରିନାଥ କନ୍ଦପାନ କହିଛନ୍ତି। ବର୍ତ୍ତମାନ କିରୋସିନ ମୁଳୁ ନ ଥିବାରୁ ଏବେ ଲଣ୍ଠନ ଲଗାଇବା ମଧ୍ୟ ସମ୍ଭବ ହେଉନଥିବା ଗ୍ରାମବାସୀ ଅଭିଯୋଗ କରିଛନ୍ତି। ଅନ୍ଧାରର ସୁଯୋଗ ନେଇ ଏହି ସବୁ ଗ୍ରାମରେ ଛେଳି, ମେଣ୍ଡା ସହ ବିଭିନ୍ନ ଚୋରି ବୃଦ୍ଧି ପାଉଥିବା ଡି. ସୁଜୁଲି ଗ୍ରାମର ଟୁଟୁ ଚେଟ୍ଟି ପ୍ରକାଶ କରିଛନ୍ତି। ଏନେଇ ଟାଟା ପାୱାର ସହକାରୀ ଯନ୍ତ୍ରୀ ବିଜୟ କୁମାର ପଣ୍ଡାଙ୍କୁ ପଚାରିବାରୁ ଉକ୍ତ ଗାଁ ଗୁଡ଼ିକୁ ଯେପରିଭାବେ ବିଦ୍ୟୁତ୍ ସେବା ସ୍ବାଭାବିକ ହେବ ସେ ନେଇ ପଦକ୍ଷେପ ନିଆଯିବ ବୋଲି ସେ କହିଛନ୍ତି।