ନୟାଗଡ଼,୪।୪ (ଲୋକନାଥ ମିଶ୍ର)ନୟାଗଡ଼ ଜିଲା ଦଶପଲ୍ଲା ବ୍ଲକ୍ ଚଢ଼େୟାପଲ୍ଲୀ ପଞ୍ଚାୟତର ଚଢ଼େୟାପଲ୍ଲୀ, ସୁନ୍ଦୁରୁକୁମ୍ପା (ଶ୍ୟାମ ଖଳିସାହି), ଓଷାମସ୍କା ଗଁାର ଦଳିତସାହି, ପୋଖରୀଗୋଛା ପଞ୍ଚାୟତର କଇଁଆଡିହ ଆଦି ଗାଁରେ କିଡ୍ନୀ ଜନିତ ରୋଗ ଭୟର ବାତାବରଣ ସୃଷ୍ଟି କରିଛି । ଉପରୋକ୍ତ ଗାଁରେ ୭ ବର୍ଷରେ ୧୭ଜଣଙ୍କ ମୃତ୍ୟୁ ହୋଇ ସାରିଲାଣି । ଓଷାମସ୍କା ଓ ସୁନ୍ଦୁରୁକୁମ୍ପା (ଶ୍ୟାମ ଖଳିସାହି)ରେ ୫ ଜଣ ଏବେ ମୃତ୍ୟୁ ସହ ସଂଗ୍ରାମ କରୁଛନ୍ତି । ଜଣକ ପରେ ଜଣେ କିଡ୍ନୀ ରୋଗୀଙ୍କ ମୃତ୍ୟୁ ପରେ ସାଧାରଣରେ ଭୟ ସୃଷ୍ଟି ହୋଇଛି । ଉପରୋକ୍ତ ଗାଁର ଲୋକଙ୍କୁ ସ୍ବାସ୍ଥ୍ୟ ବିଭାଗ ପକ୍ଷରୁ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଇ ମାଗଣା ଚିକିତ୍ସା କରାଇବା ଦରକାର ବୋଲି ଦାବି ହୋଇ ଆସୁଛି । ହେଲେ ସ୍ବାସ୍ଥ୍ୟ ବିଭାଗ ଅଥବା ପ୍ରଶାସନ ଏହି ଦାବିକୁ ଅଣଦେଖା କରୁଥିବା ଅଭିଯୋଗ ହୋଇଛି ।
ସୂଚନା ଅନୁଯାୟୀ,ଚଢ଼େୟାପଲ୍ଲୀ ଦଳିତସାହିରେ ୧୫ ପରିବାରରେ ୧୧୧ ଲୋକ ବାସ କରନ୍ତି । ସେହିପରି ଓଷାମସ୍କା ଗଁାର ଦଳିତସାହିରେ ୯ ପରିବାରରେ ୮୯ ଲୋକ ବାସ କରନ୍ତି । ସୁନ୍ଦୁରୁକୁମ୍ପା (ଶ୍ୟାମ ଖଳିସାହି) ଗଁାରେ ୧୦ ପରିବାରର ୨୭ ଦଳିତ ପରିବାର ବାସ କରନ୍ତି । କଇଁଆଡିହଗାଁରେ ୬୦ ପରିବାରର ୧୮୭ ଲୋକ ବାସ କରନ୍ତି । ସମ୍ପୃକ୍ତ ଗାଁରେ ନଳକୂପ ପାଣି ପାନୀୟ ଜଳ ଉପଯୋଗୀ ନୁହେଁ । ନଳକୂପରୁ କସରା ରଙ୍ଗର ପାଣି ବାହାରୁଛି। କିଛି ସମୟ ରଖିଦେଲେ ଏକ ଆବରଣ ବସି ଯାଉଛି । ସାହିର ପାନୀୟ ଜଳ ସମସ୍ୟା ନେଇ ସ୍ଥାନୀୟ ଲୋକମାନେ ବିଭିନ୍ନ ସମୟରେ ବ୍ଲକ ଓ ଜିଲା ପ୍ରଶାସନକୁ ଅବଗତ କରାଇଛନ୍ତି । ଏପରି କି ରାଜନେତାଙ୍କୁ ଜଣାଇଛନ୍ତି ା ହେଲେ ଏହାର ସମାଧାନ ହୋଇ ପାରୁନାହିଁ । ଏଭଳିସ୍ଥଳେ ଚଢ଼େୟାପଲ୍ଲୀ ଦଳିତସାହିର ବାଞ୍ଛାନିଧି ନାୟକ(୫୦), ଚିନ୍ତାମଣି ନାୟକ(୫୦), କାହ୍ନୁ ଚରଣ ନାୟକ(୪୫), ଓଷାମସ୍କା ଦଳିତସାହିର ଚତୁର୍ଭୁଜ ନାୟକ(୫୦), କଇଁଆଡିହ ଗଁାର କୃଷ୍ଣ ବାରିକ(୬୮), ଚଢ଼େୟାପଲ୍ଲୀର ପୂର୍ଣ୍ଣଚନ୍ଦ୍ର ପାତ୍ର(୬୦)ଙ୍କ ମୃତ୍ୟୁ ହୋଇ ସାରିଛି । ଓସ୍କାମସ୍କାରେ କରୁଣାକର ନାୟକ(୪୨), ସୁନ୍ଦୁରୁକୁମ୍ପାରେ (ଶ୍ୟାମ ଖଳିସାହି) ଶ୍ରୀତମ ନାୟକ(୪), ଅରକ୍ଷିତ ନାୟକ(୫୫), କୁନ୍ତଳା ନାୟକ(୪୫) କିଡ୍ନୀ ରୋଗରେ ଆକ୍ରାନ୍ତ ହୋଇ ମୃତ୍ୟୁ ସହ ସଂଗ୍ରାମ କରୁଛନ୍ତି ।
ଏନେଇ ଓସ୍କାମସ୍କାରେ କରୁଣାକର ନାୟକ କୁହନ୍ତି, ନଳକୂଅର ପାଣିରେ ଲୁହା ଗୁଣ୍ଡ ଆସୁଛି । କସାପାଣି ପରି ଏହାର ରଙ୍ଗ ଦେଖାଯାଉଛି । ଏହା ପାନୀୟ ଜଳ ଉପଯୋଗୀ ହୋଇ ନ ଥିଲେ ହେଁ ବିକଳ୍ପ ନ ଥିବାରୁ ପାନୀୟ ଜଳ ଓ ରୋଷେଇରେ ବ୍ୟବହାର ହେଉଛି। ଏଣୁ ଦଶପଲ୍ଲା ବ୍ଲକର ଅନେକ ଗାଁରେ ଅଧିକାଂଶ ରୋଗୀ କିଡ୍ନୀ ରୋଗରେ ପ୍ରାଣ ହରାଉଛନ୍ତି । କିନ୍ତୁ ନଳକୂଅର ପାଣି ଫ୍ଲୋରାଇଡ ନୁହଁ ବୋଲି କୁହାଯାଉଛି । ପ୍ରଥମତଃ ଗଁାର ପାଣିର ନମୁନା ନେଇ ପରୀକ୍ଷା କରାଯିବା ଦରକାର। କେଉଁ କାରଣରୁ କିଡ୍ନୀ ରୋଗ ହେଉଛି ଜାଣିବାକୁ ପଡ଼ିବ । ଭଲ ପାଣି କିପରି ଲୋକମାନେ ପିଇବେ ତା’ର ବନ୍ଦୋବସ୍ତ ହେବା ଦରକାର । ସେହିପରି ଯେଉଁମାନେ ରୋଗରେ ଆକ୍ରାନ୍ତ ହେଉଛନ୍ତି ସେମାନଙ୍କୁ ମାଗଣାରେ ଚିକିତ୍ସା କରାଯିବା ଉଚିତ । ଲୋକଙ୍କ ପାଖରେ ଅର୍ଥ ନ ଥିବାରୁ ରୋଗର ଚିକିତ୍ସା କରି ନ ପାରି ପ୍ରାଣ ହରାଉଛନ୍ତି । ସରକାର ଆମ ଲୋକଙ୍କର ଦୁଃଖ ନ ବୁଝିଲେ ଆମେ ଜଣେ ପରେ ଜଣେ ପ୍ରାଣ ହରାଇ ଚାଲିଥିବୁ ବୋଲିି ସେ କ୍ଷୋଭର ସହ କହିଛନ୍ତି । ଶ୍ୟାମ ଖଳିସାହି ଗାଁର ଅରକ୍ଷିତ ନାୟକ କୁହନ୍ତି, ଗାଁର ଏକମାତ୍ର ନଳକୂପର ପାଣି ଫ୍ଲୋରାଇଟ ଯୁକ୍ତ ହୋଇଥିବାରୁ ଆମେ ଆଉ ପାଣି ପିଉନୁ । ଅପରପକ୍ଷେ ଗାଁ ପୋଖରୀ ପାଖରେ ଚୁଆ ଖୋଳି ପାଣି ପିଉଛୁ । ହେଲେ ଆମ ଜୀବନ ନିରାପଦ ନୁହେଁ । ଜଣକ ପରେ ଜଣେ କିଡ୍ନୀ ରୋଗରେ ପଡୁଥିବାରୁ ବଞ୍ଚତ୍ବା ଆମ ପାଇଁ ଅଭିଶପ୍ତ ଜୀବନ ପାଲଟିଛି ା ଏ ସଂକ୍ରାନ୍ତରେ ସରକାର ତୁରନ୍ତ ପଦକ୍ଷେପ ଗ୍ରହଣ କରିବାକୁ ଗ୍ରାମବାସୀ ଦାବି କରିଛନ୍ତି ା