ନୂଆଦିଲ୍ଲୀ,୩।୫: ଆତଙ୍କବାଦୀ ନିରୋଧୀ ଅଭିଯାନ ବେଳେ ପାକିସ୍ତାନରୁ ତାଲିମ ନେଇ ଫେରିଥିବା ୧୭ ଜଣ କଶ୍ମୀରୀ ଯୁବକ ଏନ୍କାଉଣ୍ଟରେ ନିହତ ହେଲେଣି। ସେମାନଙ୍କ ମଧ୍ୟରୁ କେତେଜଣ ଅସ୍ତ୍ରଶସ୍ତ୍ର ତାଲିମ ନେଇଥିଲେ। ସେମାନେ ଉଚ୍ଚଶିକ୍ଷା ପାଇଁ ପାକିସ୍ତାନ ଯାଇ ସେଠାରୁ ଆତଙ୍କବାଦ ତାଲିମ ନେଇ ଫେରିିଥିଲେ।
ପାକିସ୍ତାନୀ ଗୋଇନ୍ଦା ସଂସ୍ଥା ଆଇଏସ୍ଆଇ ଦ୍ୱାରା ଏହି ୧୭ ଜଣଙ୍କୁ ଆତଙ୍କବାଦ ତାଲିମ ଦିଆଯାଇଥିଲା। ଜମ୍ମୁ-କଶ୍ମୀରରେ ସକ୍ରିୟ ଥିବା ସ୍ଲିପର ସେଲ୍ରେ ସେମାନେ ସାମିଲ ହୋଇଥିଲେ। ସୂଚନାଯୋଗ୍ୟ, ୨୦୧୫ରୁ ବହୁସଂଖ୍ୟାରେ କଶ୍ମୀରୀ ଯୁବକ ଉଚ୍ଚଶିକ୍ଷା, ସମ୍ପର୍କୀୟଙ୍କୁ ଭେଟିବା କିମ୍ବା ବିବାହ ଉଦ୍ଦେଶ୍ୟରେ ପାକିସ୍ତାନ ଯାଇ ଭାରତ ବିରୋଧୀ ତତ୍ତ୍ୱଙ୍କ ଦ୍ୱାରା ଭୁଲ୍ ରାସ୍ତାରେ ଯାଉଛନ୍ତି ଓ ଅଧିକାଂଶ ଆଇଏସ୍ଆଇ ପରିଚାଳକଙ୍କ ଦ୍ୱାରା ଆତଙ୍କବାଦ ତାଲିମ ନେଉଛନ୍ତି। ଜଣେ ହୁରିୟାତ ନେତା କଶ୍ମୀରୀ ଯୁବକମାନଙ୍କୁ ବିଭିନ୍ନ ମେଡିକାଲ କଲେଜରେ ନାମ ଲେଖାଇର ପ୍ରତିଶ୍ରୁତି ଦେଇ ସେମାନଙ୍କଠାରୁ ଟଙ୍କା ସଂଗ୍ରହ କରିଥାନ୍ତି। ଏହି ଅର୍ଥକୁ କଶ୍ମୀରରେ ଆତଙ୍କବାଦୀ କାର୍ଯ୍ୟରେ ବିନିଯୋଗ କରାଯାଉଥିବା ରାଜ୍ୟ ତଦନ୍ତକାରୀ ସଂସ୍ଥା କହିଛି।