ଉମରକୋଟ,୨୧।୧: ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ନବରଙ୍ଗପୁର ଜିଲା ଉମରକୋଟ ବ୍ଲକ ସିଂସାରୀ ଓ ଭଣ୍ଡାରିଗୁଡ଼ା ପଞ୍ଚାୟତର ଗ୍ରାମ ରୋଜଗର ସହାୟକ (ଜିଆର୍ଏସ୍) ହିମାଂଶୁ ବାଘଙ୍କ ଘର ଓ ଅଫିସରେ ଭିଜିଲାନ୍ସ ପକ୍ଷରୁ ଚଢ଼ାଉ କରାଯାଇଛି। ଉମରକୋଟ ଭଗବତୀ ନଗରସ୍ଥିତ ୨ଟି ବାସଭବନ, ସିଂସାରୀ ଓ ଭଣ୍ଡାରିଗୁଡ଼ା ପଞ୍ଚାୟତରେ ଥିବା ଅଫିସରେ ଏହି ଚଢ଼ାଉ ହୋଇଛି। ତାଙ୍କ ଘରୁ ୧୭ ଲକ୍ଷ ୮୩ ହଜାର ଟଙ୍କା, ଗୋଟିଏ କାର୍ ଓ ଦୁଇଟି ବାଇକ୍ ଜବତ ହୋଇଛି। ଭଗବତୀ ନଗରରେ ଆଉ ଏକ ବାସ ଭବନ ରହିଥିବା ତଦନ୍ତ ବେଳେ ଜଣାପଡିଥିଲା। ତାଙ୍କର ବ୍ୟାଙ୍କ, ମାଇକ୍ରୋଫାଇନାନ୍ସ ଓ ପୋଷ୍ଟାଲ ପାସ୍ବୁକ୍ରେ ୨ଲକ୍ଷ ୨୯ ହଜାର ଟଙ୍କା ରହିଛି ବୋଲି ଭିଜିଲାନ୍ସ ପକ୍ଷରୁ କୁହାଯାଇଛି। ମାଲକାନଗିରି ଭିଜିଲାନ୍ସ ଡିଏସ୍ପି ସୁଶାନ୍ତ କୁମାର ବିଶ୍ବାଳଙ୍କ ତତ୍ତ୍ୱାବଧାନରେ ନବରଙ୍ଗପୁର,କଳାହାଣ୍ଡି, ଜୟପୁର, ମାଲକାନଗିରି ଓ ନୂଆପଡ଼ାର ୩ଟି ଟିମ୍ ସାମିଲ ହୋଇଛନ୍ତି। ସୁଶାନ୍ତ ବିଶ୍ୱାଳଙ୍କ ସମେତ ଜୟପୁର ଡିଭିଜନ୍ ଡିଏସ୍ପି କେ.କେ. ପାତ୍ର ନବରଙ୍ଗପୁର ଭିଜିଲାନ୍ସ ଇନ୍ସପେକ୍ଟର କଳାବତୀ ବାଘ, ବିନସେନ ପୂଜାରୀ, କଳାହାଣ୍ଡି ଇନ୍ସପେକ୍ଟର ପ୍ରମିଳା ସ୍ବାଇଁ, ଜୟପୁର ଇନ୍ସପେକ୍ଟର ସୂର୍ଯ୍ୟକାନ୍ତି ଟାକରି, ନୂଆପଡ଼ା ଇନ୍ସପେକ୍ଟର ଦୀନବନ୍ଧୁ ବେହେରା ପ୍ରମୁଖ ଉପସ୍ଥିତ ଥିଲେ। ଚଢ଼ାଉରେ ୨୬ ଜଣ ସାମିଲ ହୋଇଥିଲେ।
