ନୂଆଦିଲ୍ଲୀ,୨।୪: ପାକିସ୍ତାନର ବାମହାତୀ ସ୍ପିନର ଫୈସଲ ଅକ୍ରମଙ୍କୁ ଏବେ ମାତ୍ର ୧୭ ବର୍ଷ। ହେଲେ କ୍ରିକେଟ ପଡ଼ିଆରେ ଉଲ୍ଲେଖନୀୟ ପ୍ରଦର୍ଶନ କରି ସେ ପ୍ରଶଂସିତ ହେଉଛନ୍ତି। ଏହି ଯୁବ କ୍ରିକେଟର ପାକିସ୍ତାନ କ୍ରିକେଟର ଭବିଷ୍ୟତ ବୋଲି ଅନେକ କହୁଛନ୍ତି। ଏହାଛଡ଼ା ନିକଟରେ ଦକ୍ଷିଣ ଆଫ୍ରିକା ଗସ୍ତରେ ଯିବା ପୂର୍ବରୁ ପାକିସ୍ତାନ ଦଳ ଫୈସଲଙ୍କୁ ପ୍ରଶିକ୍ଷଣ ଶିବିରକୁ ଡକାଇଥିଲା। ସେଠାରେ ସେ ଦଳର ଅଧିନାୟକ ତଥା ବିଶ୍ୱର ଅନ୍ୟତମ ସର୍ବଶ୍ରେଷ୍ଠ ବ୍ୟାଟ୍ସମ୍ୟାନ୍ ବାବର ଆଜମଙ୍କ ଉଇକେଟ ନେଇ ସମସ୍ତଙ୍କୁ ଚମକାଇ ଦେଇଥିଲେ।
ଫୈସଲ ଏକ ବର୍ଷ ପାଇଁ ୧୬ ବର୍ଷରୁ କମ୍ କ୍ରିକେଟ ଖେଳିଥିଲେ। ଏଥିରେ ସର୍ବାଧିକ ଉଇକେଟ ନେବା ପରେ ତାଙ୍କୁ ଅଣ୍ଡର-୧୯ ଦଳରେ ସୁଯୋଗ ମିଳିଥିଲା। ନିକଟରେ ସେ ଏହାର ଦିନିକିଆ ସିରିଜର ୧୦ ମ୍ୟାଚ୍ରେ ୨୭ ଉଇକେଟ ନେଇଥିଲେ। ହେଲେ ତାଙ୍କ କ୍ୟାରିୟରର ସବୁଠାରୁ ବଡ଼ ଉଇକେଟ ତାଙ୍କୁ ଗତ ସପ୍ତାହରେ ମିଳିଛି। କାରଣ ସେ ତାଙ୍କର ପ୍ରିୟ ବ୍ୟାଟ୍ସମ୍ୟାନ୍ ବାବର ଆଜମଙ୍କୁ ଏଲ୍ବିଡବ୍ଲୁ କରିବାରେ ସଫଳ ହୋଇଛନ୍ତି। ଏହାପରେ ଅକ୍ରମ କହିଛନ୍ତି, ବାବର ବିଶ୍ୱସ୍ତରୀୟ ଖେଳାଳି। ଏଣୁ ମୋ ଉପରେ ପ୍ରଥମରୁ ଚାପ ଥିଲା। ମାତ୍ର ୟୁନିସ୍ ମନରେ ବିଶ୍ୱାସ ଆଣିବାକୁ ପରାମର୍ଶ ଦେଇଥିଲେ। ଶେଷରେ ଆଜମଙ୍କ ଉଇକେଟ ନେବା ପରେ ମନରେ ବିଶ୍ୱାସ ବହୁତ ବଢ଼ି ଯାଇଥିଲା ବୋଲି ଅକ୍ରମ କହିଛନ୍ତି।
ଭାରତୀୟ କ୍ରିକେଟ ପ୍ରଶଂସକ ଅକ୍ରମଙ୍କୁ ଭଲ ଭାବେ ଜାଣିନାହାନ୍ତି। ହେଲେ ଆଗାମୀ ଦିନରେ ବିଶ୍ୱ ତାଙ୍କ ନାମ ମନେ ରଖିବ ବୋଲି ଆଶା କରାଯାଉଛି। କାରଣ ବିରାଟ କୋହଲିଙ୍କ ଉଇକେଟ ନେବାକୁ ତାଙ୍କର ସ୍ବପ୍ନ। ଏହାଛଡ଼ା ହାର୍ଦ୍ଦିକ ପାଣ୍ଡ୍ୟା ତାଙ୍କ ପାଇଁ ଏକ ବ୍ୟାଟ୍ ସ୍ପନ୍ସର କରିଥିବା ସେ କହିଛନ୍ତି।