ବ୍ରୁସେଲସ୍,୨୧ ।୭: ୟୁରୋପରେ ଚଳିତ ବର୍ଷ ଗ୍ରୀଷ୍ମ ପ୍ରବାହ ରେକର୍ଡ ଭାଙ୍ଗିଛି । ବେଳକୁ ବେଳ ଗରମ ବଢିବାରେ ଲାଗିଥିବାରୁ ସାଧାରଣ ଜନ ଜୀବନ ଅସ୍ତବ୍ୟସ୍ତ ହୋଇ ପଡିଛି । କେଉଁଠି ଏୟାରପୋର୍ଟର ରନୱେର୍ ତରଳି ଯାଉଛି ତ ପୁଣି କେଉଁଠି ରେଲୱେ ଟ୍ରାକ ତରଳି ଯାଇଛି । ରାସ୍ତାରେ କାଁ ଭାଁ ଲୋକଙ୍କୁ ଦେଖିବାକୁ ମିଳୁଛି । ପ୍ରବଳ ଗ୍ରୀଷ୍ମ ପ୍ରବାହ ଯୋଗୁ ସ୍ପେନ ଓ ପର୍ତ୍ତୁଗାଲରେ ପ୍ରାୟ ୧୭୦୦ ଲୋକଙ୍କ ମୃତ୍ୟୁ ହୋଇଥିବା କୁହାଯାଇଛି । ତେବେ ଏହାକୁ ନେଇ ସୋସିଆଲ ମିଡିଆରେ ବହୁ ଭୁଲ ତଥ୍ୟ ପ୍ରଚାର କରାଯାଉଛି । ସୋସିଆଲ ମିଡିଆରେ ଏବେ ଏକ ଫଟୋ ଭାଇରାଲ ହେଉଛି ଯେଉଁଥିରେ ଟ୍ରେନ୍ ସିଗନଲ ତରଳି ଯାଉଥିବା ଦେଖାଯାଇଛି । ହେଲେ ଫଟୋଟି ୟୁରୋପର ନୁହେଁ ବୋଲି ଜଣାପଡିଛି । ଏହା ବ୍ରିଟେନର ସ୍ୟାଣ୍ଡି ସହରର । ଟ୍ରେନ ସିଗନଲ ତଳେ ନିଆଁ ଜଳୁଥିବାରୁ ଏହା ତରଳି ଯାଇଥିବା କୁହାଯାଇଛି ।
କିନ୍ତୁ ୟୁରୋପରେ ହେଉଥିବା ପ୍ରବଳ ଗ୍ରୀଷ୍ମ ପ୍ରବାହ ଏହାର ଟ୍ରେନ୍ ଚଳାଚଳକୁ ବାଧା ପହଞ୍ଚାଇଛି । ପରିବହନ ମନ୍ତ୍ରୀ କହିଛନ୍ତି, ୟୁରୋପର ରେଲୱେ ନେଟୱର୍କ ଅତ୍ୟଧିକ ଗରମକୁ ସାମ୍ନା କରିପାରିବ ନାହିଁ । ବଢୁଥିବା ତାପମାତ୍ରା ଯୋଗୁ ସେଠାକାର ରେଲୱେ ଟ୍ରାକ୍ର ପାରା ୫୦ରୁ ୬୦ ତ ପୁଣି ୭୦ ଡିଗ୍ରୀ ପର୍ଯ୍ୟନ୍ତ ପହଞ୍ଚି ଯାଉଛି । ଫଳରେ ଟ୍ରେନ୍ ଟ୍ରାକ୍ ତରଳି ଯାଉଛି ।
ଅନ୍ୟପଟେ ଦକ୍ଷିଣ ୟୁରୋପରେ ଥିବା ଜଙ୍ଗଲରେ ନିଆଁ ଲାଗିଥିବାରୁ ଏହା ତାପମାତ୍ରାକୁ ଆହୁରି ବଢାଇ ଦେଉଛି । ଏବେ ହେଲିକପ୍ଟର ମାଧ୍ୟମରେ ଜଙ୍ଗଲ ନିଆଁକୁ କାବୁ କରିବାକୁ ଚେଷ୍ଟା କରାଯାଉଛି ।