ବ୍ରହ୍ମପୁର ଅଫିସ, ୯।୪: ଅବକାରୀ ଗୁଇନ୍ଦା ଟିମ୍ ରବିବାର ଦୁଇଟି ସ୍ଥାନରେ ଚଢାଉ କରି ୧୭୪୦ ଲିଟର ବେଆଇନ ସ୍ପିରିଟ ଜବତ କରିଛି। ଅନ୍ୟପକ୍ଷେ ୨ଟି ମାମଲାରେ ୩ ଜଣଙ୍କୁ ଗିରଫ କରାଯାଇଛି। ବ୍ରହ୍ମପୁର ସହର ଏବଂ ଆଖପାଖ ଅଞ୍ଚଳରେ ପ୍ରସ୍ତୁତ ହେଉଥିବା ନକଲି ବିଦେଶୀ ମଦ ତିଆରି ପାଇଁ ଏହି ସ୍ପିରିଟ ବ୍ୟବହାର କରାଯାଉଥିବା ଜଣାପଡିଛି।
ନକଲି ମଦ ପ୍ରସ୍ତୁତ ପାଇଁ ବେଆଇନ ସ୍ପିରିଟ ଚାଲାଣ ହେଉଥିବା ନେଇ ଅବକାରୀ ବିଭାଗକୁ ଖବର ମିଳିଥିଲା। ଏନେଇ ରବିବାର ଅବକାରୀ ଡେପୁଟି ସୁପେରିଟେଣ୍ଡେଣ୍ଟ କୁବେର ସେଠୀଙ୍କ ନେତୃତ୍ୱରେ ଏକ ଟିମ୍ କାଳୁଆ ଛକ ନିକଟରେ ଗାଡି ଯାଞ୍ଚ କରାଯାଉଥିଲା। ସେତିକିବେଳେ ଏକ ସ୍କୁଟିକୁ ଅଟକାଇ ଯାଞ୍ଚ କରାଯାଇଥିଲା। ଯାଞ୍ଚ ବେଳେ ୪୦ ଲିଟର ବେଆଇନ ସ୍ପିରିଟ ଅବକାରୀ ଟିମ୍ ଜବତ କରଥିଲା। ଏହି ସଂକ୍ରାନ୍ତରେ ଜଣେ ଯୁବକଙ୍କୁ ଗିରଫ କରାଯାଇଥିଲା। ସେ ହେଉଛନ୍ତି ଗୋପାଳପୁର ଥାନା ଅଧୀନ ଭଞ୍ଜବିହାର ଅଞ୍ଚଳର ସିବାଶିଷ ଡାକୁଆ(୨୦) । ସେ ନକଲି ବିଦେଶୀ ମଦ ପ୍ରସ୍ତୁତ ପାଇଁ ଉକ୍ତ ସ୍ପିରିଟ ନେଉଥିଲେ ବୋଲି ଜେରା ବେଳେ ଅବକାରୀ ଟିମ୍କୁ କହିଛନ୍ତି।
ସେହିପରି ସେ ଉକ୍ତ ସ୍ପିରିଟ ବ୍ରହ୍ମପୁରରୁ ଆଣିଥିବା କହିଥିଲେ। ତାଙ୍କ ବୟାନକୁ ଆଧାର କରି ଅବକାରୀ ଟିମ୍ ସିବାଶିଷଙ୍କୁ ଧରି ବଡ଼ଖେମୁଣ୍ଡି ସାହିରେ ଥିବା ଏକ ଗୋଦାମରେ ଚଢାଉ କରିଥିଲା। ଚଢାଉ ବେଳେ ସେଠାରୁ ୧୫୭ କାର୍ଟୁନରେ ଥିବା ୩୭୬୮ ବୋତଲରେ ସ୍ପିରିଟ ଜବତ କରାଯାଇଥିଲା। ଉକ୍ତ ବୋତଲରେ ୧୭ ଶହ ଲିଟର ବେଆଇନ ସ୍ପିରିଟ ରହିଥିବା ଜଣାପଡିଛି। ଏପରିକି ସମ୍ପୃକ୍ତ କାରବାରରେ ଲିପ୍ତ ଥିବା ୨ଜଣଙ୍କୁ ଟିମ୍ ଗିରଫ କରିଛି। ସେମାନେ ହେଲେ ଏହି କାରବାରର ମୁଖିଆ ଫାସିଗୁଡା ଅଞ୍ଚଳର ଶଙ୍କର ପ୍ରଧାନ(୨୭) ଓ ଅନ୍ୟଜଣେ କର୍ମଚାରୀ ସଂଜୀବ କୁମାର ପ୍ରଧାନ(୨୧)। ଜବତ ସ୍ପିରିଟ ଓ ଗାଢ଼ିର ମୂଲ୍ୟ ୧୦ ଲକ୍ଷ ଟଙ୍କା ହେବ ବୋଲି ଡେପୁଟି ସୁପେରଟେଣ୍ଡେଣ୍ଟ ସେଠୀ କହିଛନ୍ତି।
ମାମଲା(ନମ୍ବର ୧୬/୨୩-୨୪)ରେ ସିବାଶିଷ ଡାକୁଆଙ୍କୁ ଗିରଫ କରାଯାଇଥିବା ବେଳେ ମାମଲା(ନଂ୧୭/୨୩-୨୪)ରେ ଶଙ୍କର ଓ ସଂଜୀବଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି। ଚଢଉରେ ଅନ୍ୟମାନଙ୍କ ମଧ୍ୟରେ ଇନ୍ସପେକ୍ଟର ଗୀତାଞ୍ଜଳି ସାହୁ, ଏଏସ୍ଆଇ ସୁଶାନ୍ତ ମହାଙ୍କୁଡ, ବସନ୍ତ ବାରିକ, କନେଷ୍ଟେବଳ ବଳରାମ ସ୍ବାଇଁ ଓ ବିଶ୍ୱନାଥ ପେଣ୍ଠି ପ୍ରମୁଖ ସାମିଲ ଥିଲେ।