ଭୁବନେଶ୍ୱର,୫ା୭(ବ୍ୟୁରୋ): ରାଜ୍ୟର ଉପକୂଳରେ ମୋଟ ୧୮ ସାମୁଦ୍ରିକ ଥାନା ପ୍ରତିଷ୍ଠା କରାଯାଇଛି। ବିଦେଶୀମାନଙ୍କ ଅନୁପ୍ରବେଶ ରୋକିବା ପାଇଁ ମୁଖ୍ୟତଃ ଏହି ଥାନାଗୁଡ଼ିକ ପ୍ରତିଷ୍ଠା କରାଯାଇଥିବା ରାଜ୍ୟ ସରକାର ସୂଚନା ଦେଇଛନ୍ତି। ସମସ୍ତ ସାମୁଦ୍ରିକ ଥାନା ପାଇଁ ମୋଟ ୭୩୮ଟି ବିଭିନ୍ନ ପଦବୀ ମଞ୍ଜୁର କରାଯାଇଛି। ପ୍ରତ୍ୟେକ ସାମୁଦ୍ରିକ ଥାନା ପାଇଁ ୧୫ ଜଣ ହିସାବରେ ମୋଟ ୨୭୦ ହୋମଗାର୍ଡଙ୍କୁ ମୁତୟନ ଲାଗି ସ୍ବୀକୃତି ପ୍ରଦାନ କରାଯାଇଥିବା ଗୃହ ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା କହିଛନ୍ତି।
ବିଧାୟକ ସଞ୍ଜୀବ କୁମାର ମଲିକ ବିଧାନସଭାରେ ପଚାରିଥିବା ତାରକା ପ୍ରଶ୍ନ ନମ୍ବର ୩୧ର ଉତ୍ତରରେ ମନ୍ତ୍ରୀ ବେହେରା କହିଛନ୍ତି, ଅବୈଧ ଅନୁପ୍ରବେଶ ଓ ଅସାମାଜିକ ବ୍ୟକ୍ତିଙ୍କ ଅନୁପ୍ରବେଶ ତଥା ଯେକୌଣସି ଆତଙ୍କବାଦୀ ଆକ୍ରମଣକୁ ପ୍ରତିହତ କରିବା ଲାଗି ସମୁଦ୍ର ଉପକୂଳରେ ପଇଁତରା ମାରିବା ପାଇଁ ସାମୁଦ୍ରିକ ଥାନାଗୁଡିକୁ ୧୫ଟି ଦ୍ରୁତ ଇଣ୍ଟରସେପ୍ଟର ଡଙ୍ଗା ଯୋଗାଇ ଦିଆଯାଇଛି। ସାମୁଦ୍ରିକ ଥାନା କର୍ମଚାରୀମାନଙ୍କୁ ମଧ୍ୟ ପର୍ଯ୍ୟାୟ କ୍ରମେ ପ୍ରଶିକ୍ଷଣ ଦିଆଯାଉଛି। ସମୁଦ୍ର ପଥରେ ଯାତାୟାତ କରୁଥିବା ଡଙ୍ଗା ଏବଂ ମାଛଧରା ଡଙ୍ଗାଗୁଡିକର ବ୍ୟାପକ ଯାଞ୍ଚ ଓ ତଥ୍ୟ ଜାଣିବା ଲାଗି ଭାରତୀୟ ତଟ ସୁରକ୍ଷା ବାହିନୀ ସହ ମିଳିତ ଭାବେ ସୁରକ୍ଷା ଯାଞ୍ଚ କରାଯାଉଛି। ଭବିଷ୍ୟତରେ ସାମୁଦ୍ରିକ ଥାନା ଓ ଡଙ୍ଗାଗୁଡ଼ିକୁ ଏଚ୍ଏଫ ଓ ଭିଏଚଏଫ ସେଟ୍ସ ଯୋଗାଇ ଦିଆଯିବ।