ନୂଆଦିଲ୍ଲୀ,୧୪।୭: ଆଲ୍କହଲ ହ୍ୟାଣ୍ଡ ସାନିଟାଇଜର ଉପରେ ୧୮% ଜିଏସ୍ଟି ଲାଗୁ ହେବ। ଏହା ଅତ୍ୟାବଶ୍ୟକ ସାମଗ୍ରୀ ତାଲିକାରେ ଆସୁଥିଲେ ମଧ୍ୟ ଏହା ଉପରେ ଉଚ୍ଚ ହାରର ଜିଏସ୍ଟି ଲାଗିବ ବୋଲି ଜଣାପଡ଼ିଛି। ଜିଏସ୍ଟି ବ୍ୟବସ୍ଥାରେ ଅଥରିଟି ଅଫ୍ ଆଡଭାନ୍ସ ରୁଲିଂସ(ଏଏଆର୍)ର ଗୋଆ ବେଞ୍ଚ ଏଭଳି ନିର୍ଦ୍ଦେଶ ଦେଇଛନ୍ତି। ସ୍ଥାନୀୟ କମ୍ପାନୀଗୁଡିକ ଦ୍ୱାରା ଏହା ପ୍ରସ୍ତୁତ ହେଉଥିଲେ ଏଭଳି ଟିକସ ଲାଗୁ କରିବାକୁ ଏଏଆର୍ ନିର୍ଦ୍ଦେଶରେ କହିଛନ୍ତି। ସ୍ପ୍ରିଙ୍ଗଫିଲ୍ଡ ଇଣ୍ଡିଆ ଡିଷ୍ଟିଲେରି ପକ୍ଷରୁ ଏ ପ୍ରସଙ୍ଗରେ ଏକ ଆବେଦନ କରାଯାଇଥିଲା। ଏଥିରେ କୁହାଯାଇଥିଲା ଯେ, କମ୍ପାନୀ ପକ୍ଷରୁ ପ୍ରସ୍ତୁତ ସାନିଟାଇଜର କେଉଁ ବର୍ଗରେ ଆସିବ। ଏହା ଉପରେ ଟିକସ ଛାଡ ହୋଇପାରିବ କି ନାହିଁ। ମାମଲା ଉପରେ ଏଏଆର୍ ସ୍ପଷ୍ଟ କରିବା ସହ ୧୮% ଜିଏସ୍ଟି ଲାଗୁ କରିବା ଲାଗି ନିର୍ଦ୍ଦେଶ ଦେଇଛନ୍ତି। ଏଭଳି ଉତ୍ପାଦ ୧୨% ଟିକସ ବର୍ଗରେ ଆସୁଛି। ଏହା ଅତ୍ୟାବଶ୍ୟକ ସାମଗ୍ରୀ ବର୍ଗରେ ଆସୁଥିବାରୁ ଏହା ଉପରେ ଟିକସ ଛାଡ଼ ହେବ କି ନାହିଁ ତା’ ଉପରେ ସ୍ପଷ୍ଟ କରିବା ଲାଗି ଆବେଦନରେ କୁହାଯାଇଥିଲା।