ବ୍ରହ୍ମପୁର ଅଫିସ,୧୦ା୨: ଅବକାରୀ ଗୁଇନ୍ଦା ବିଭାଗର ଏକ ଟିମ୍ ଦୁଇ ଦିନ ତଳେ ଲାଞ୍ଜିପଲ୍ଲୀ ବାଇପାସରେ କଟକ ଅଭିମୁଖେ ଯାଉଥିବା ଏକ ବସ୍ରୁ ଗଞ୍ଜେଇ ଯାଞ୍ଚ କରିବା ବେଳେ ଜଣେ ଯାତ୍ରୀଙ୍କ ବ୍ୟାଗରୁ ୧୮ଲକ୍ଷ ଟଙ୍କା ଜବତ କରିଥିଲା। କାହା ପାଖରୁ ଏତେ ପରିମାଣର ଟଙ୍କା ଆଣିଛନ୍ତି ତା’ର ଠିକ୍ ସୂଚନା ଦେଇପାରୁ ନାହାନ୍ତି ଅଟକ ଯୁବକ। ତେଣୁ ଅବକାରୀ ବିଭାଗ ତରଫରୁ ଏ ନେଇ ଆୟକର ବିଭାଗକୁ ଖବର ଦିଆଯାଇଥିଲା। ଶୁକ୍ରବାର ଆୟକର ବିଭାଗର ଏକ ଟିମ୍ ଅବକାରୀ ଗୁଇନ୍ଦା ବିଭାଗର କାର୍ଯ୍ୟାଳୟରେ ଖୋଳତାଡ଼ ଆରମ୍ଭ କରିଛି। ଟଙ୍କା କେଉଁ ବ୍ୟବସାୟର, କାହା ପାଖରୁ ଆସିଥିଲା, କାହା ପାଖକୁ ଯାଉଥିଲା, ଏଭଳି ବିଭିନ୍ନ ଦିଗକୁ ଆୟକର ବିଭାଗ ତଦନ୍ତ ଜାରି ରଖିଛି। ସୂଚନାଯୋଗ୍ୟ, ଟଙ୍କା ନେଇ ଯାଉଥିବା ଯାଜପୁର ଅଞ୍ଚଳର ସଞ୍ଜୟ ସାହୁ ଯାଜପୁରର ଜଣେ ଚିନାବାଦାମ ବ୍ୟବସାୟୀଙ୍କ ନିକଟରେ କାମ କରୁଛନ୍ତି। ମାଲିକଙ୍କ କହିବା ଅନୁସାରେ ସେ ବ୍ରହ୍ମପୁର ଆସି ୩ଜଣ ବେପାରୀଙ୍କ ଠାରୁ ଚିନାବାଦାମ ପଠାଇବା ବାବଦ ଟଙ୍କା ଆଦାୟ କରି ଫେରୁଥିଲେ ବୋଲି କହଛନ୍ତି। ହେଲେ ସେ ଏ ନେଇ ସେ କୌଣସି କାଗଜପତ୍ର ଦେଖାଇ ପାରି ନଥିଲେ।