ଅନୁଗୋଳ ଅଫିସ, ୨୨।୩ – ଆମ୍ବୁଲାନ୍ସ ଭିତରେ ଛଟପଟ ହେଉଥିବା ରୋଗୀଟିଏ ପାଇଁ ସମୟର ମୂଲ୍ୟ କାହାକୁ ଅଛପା ନାହିଁ। କେସହିପରି ସମ୍ପୃକ୍ତ ରୋଗୀଙ୍କ ଜୀବନର ଗୁରୁତ୍ୱ ପରିବାର ଓ ସମ୍ପର୍କୀୟଙ୍କ ପାଇଁ କେତେ ମହତ୍ତ୍ୱପୂର୍ଣ୍ଣ ତାହା ବୁଝାଇବାକୁ ପଡ଼ିବ ନାହିଁ। ହେଲେ ଏସବୁ ଜାଣି ମଧ୍ୟ ନିଦାବିଷ୍ଣୁ ଭଳି ବସିରହିଛି ତାଳଚେର ଉପଖଣ୍ଡ ଓ ଅନୁଗୋଳ ଜିଲା ପ୍ରଶାସନ। ଫଳରେ ଜୀବନ ବଞ୍ଚାଇବାକୁ ତାଳଚେର ହାଣ୍ଡିଧୁଆ ଲେଭଲ୍ କ୍ରସିଂ ଛକରେ ଦୈନିକ ସମୟ ସହ ସଂଘର୍ଷ କରିବାକୁ ପଡ଼ୁଛି ଅଟକୁଥିବା ଆମ୍ବୁଲାନ୍ସ ଭିତରର ରୋଗୀଙ୍କୁ। ଜଣେ ଗୁରୁତର ହୃଦ୍ରୋଗୀଙ୍କୁ ନେଇ ଯାଉଥିବା ୧୦୮ ଆମ୍ବୁଲାନ୍ସ ଗତ ଶନିବାର ସକାଳେ ଏହି ଲେଭଲ୍କ୍ରସିଂରେ ଦୀର୍ଘ ୧୮ ମିନିଟ୍ ଅଟକି ରହିବା ଜିଲାବାସୀଙ୍କୁ କେବଳ ଚକିତ କରିନାହିଁ, ବରଂ ଜୀବନ ଓ ସମୟର ମୂଲ୍ୟ ବୁଝିବାକୁ ବାଧ୍ୟ କରିଛି ପ୍ରଶାସନକୁ।
କଳାହୀରାର ସହର ତାଳଚେରର ମୁଖ୍ୟ ରାସ୍ତାରେ ହାଣ୍ଡିଧୁଆ ଲେଭଲ କ୍ରସିଂ ଥିବାରୁ ଏଠାରେ ସର୍ବଦା ଭିଡ଼ ଲାଗି ରହୁଛି। ବିଭିନ୍ନ ଶିଳ୍ପାଞ୍ଚଳକୁ ଏହି ଲେଭଲ୍କ୍ରସିଂ ଦେଇ ବହୁ କୋଇଲା ବୋଝେଇ ଟ୍ରେନ୍ ଚଳାଚଳ କରୁଥିବାରୁ ଦୈନିକ ଘଣ୍ଟା ଘଣ୍ଟା ଫାଟକ ପଡ଼ିରହୁଛି। ଫଳରେ ଜନସାଧାରଣଙ୍କ ସହ ମୁଖ୍ୟ ରାସ୍ତାରେ ଯାତାୟାତ କରୁଥିବା ଆମ୍ବୁଲାନ୍ସଗୁଡ଼ିକୁ ମଧ୍ୟ ଏଠାରେ ଅଟକି ରହିବାକୁ ପଡ଼ୁଛି। ତେଣୁ ଆବଶ୍ୟକତାକୁ ଦୃଷ୍ଟିରେ ରଖି ଏଠାରେ ଓଭରବ୍ରିଜ୍ ପାଇଁ ଦୀର୍ଘବର୍ଷ ତଳେ ଭିତ୍ତିପ୍ରସ୍ତର ସ୍ଥାପନ ହୋଇଥିଲା। ୨୦୧୬ରେ ନିର୍ମାଣ ଆରମ୍ଭ ହୋଇଥିବା ବେଳେ ୨୦୧୮ରେ ଶେଷ କରାଯିବାର ଲକ୍ଷ୍ୟ ସ୍ଥିର ହୋଇଥିଲା। କିନ୍ତୁ ଧାର୍ଯ୍ୟ ଅବଧିର ୨ ବର୍ଷ ପରେ ବି ଓଭରବ୍ରିଜ୍ ନିର୍ମାଣ ଆଗେଇପାରି ନାହିଁ। ଏ ନେଇ ଅସନ୍ତୋଷ ପ୍ରକାଶ ପାଇଲେ ପ୍ରଶାସନ ପକ୍ଷରୁ କେବଳ ବୈଠକ କରାଯାଉଛି ସିନା ହେଲେ ତ୍ୱରିତ ପଦକ୍ଷେପ ଗ୍ରହଣ କରାଯାଉ ନାହିଁ। ଗତ ୧୫ ଦିନ ତଳେ ଏପରି ଏକ ଗୁରୁତ୍ୱପୂର୍ଣ୍ଣ ବୈଠକ ବସିଥିଲା। ଜନପ୍ରତିନିଧିଙ୍କ ଉପସ୍ଥିତିରେ ଏହି ବୈଠକରେ ଓଭରବ୍ରିଜ୍ ଶେଷ କରାଯିବା ନେଇ ଆଲୋଚନା ହୋଇଥିଲା। କଛପ ଗତିରେ ଚାଲୁଥିବା କାର୍ଯ୍ୟ ମାର୍ଚ୍ଚ ୩୧ ସୁଦ୍ଧା ତ୍ୱରିତ ବେଗରେ କରା ନ ଗଲେ ଠିକାଦାର ବଦଳାଯିବା ଉପରେ ଚର୍ଚ୍ଚା ହୋଇଥିଲା। କିନ୍ତୁ ଏପରି ବୈଠକ ଓ ନିଷ୍ପତ୍ତି କେବଳ କୁମ୍ଭୀର କାନ୍ଦଣା ବୋଲି ସହରବାସୀ ମତ ଦେଉଛନ୍ତି। ସେମାନେ କହିଛନ୍ତି, ଏମିତି ବୈଠକ କେତେଥର ବସିଲାଣି। ହେଲେ ତାହା କେବଳ ପ୍ରହସନ ଛଡ଼ା କିଛି ନୁହେଁ। ପ୍ରଶାସନ, ଜନପ୍ରତିନିଧି ଯଦି କଠୋର ଆଭିମୁଖ୍ୟ ରଖୁଥାନ୍ତେ ତା’ହେଲେ ଶନିବାର ୧୮ ମିନିଟ୍ ଧରି ଆମ୍ବୁଲାନ୍ସ ଅଟକି ନ ଥାନ୍ତା। ତେଣୁ ଯୁଦ୍ଧକାଳୀନ ଭିତ୍ତିରେ ଓଭରବ୍ରିଜ୍ ନର୍ମାଣ ଶେଷ କରିବାକୁ ସହରବାସୀ ଦାବି କରିଛନ୍ତି।
କେହି କର୍ଣ୍ଣପାତ କରୁନାହାନ୍ତି
ଲେଭଲ୍ କ୍ରସିଂରେ ଓଭରବ୍ରିଜ୍ ନିର୍ମାଣ ଶେଷ ହେଉନାହିଁ। ଠିକା ସଂସ୍ଥା ଓ ଏମ୍ସିଏଲ୍ କର୍ତ୍ତୃପକ୍ଷଙ୍କୁ ମଧ୍ୟ ଡାକି ଆଲୋଚନା କରିଛୁ। କାର୍ଯ୍ୟ ଶେଷ କରିବାକୁ ଅନୁରୋଧ ଓ ତାଗିଦ୍ ମଧ୍ୟ କରାଯାଉଛି। ହେଲେ ସେମାନେ କର୍ଣ୍ଣପାତ କରୁନାହାନ୍ତି। ଅବଧି ସମୟ ବଢ଼ାଇବାକୁ କହୁଛନ୍ତି। ଏ ନେଇ ଜିଲାପାଳଙ୍କୁ ଅବଗତ କରାଯିବ।
-ରଜନୀକାନ୍ତ ସ୍ବାଇଁ, ତାଳଚେର ଉପଜିଲାପାଳ
ପ୍ରଶାସନକୁ ଭୟ ନାହିଁ
ଠିକା ସଂସ୍ଥା କର୍ତ୍ତୃପକ୍ଷ ପ୍ରଶାସନକୁ ଭୟ କରୁନାହାନ୍ତି। ସେଥିପାଇଁ ଦୀର୍ଘବର୍ଷ ହେଲା ନିର୍ମାଣ କାର୍ଯ୍ୟ କଚ୍ଛପ ଗତିରେ ଚାଲୁଛି। ଏଥିଯୋଗୁ ଜନସାଧାରଣଙ୍କ ସହ ଆମ୍ବୁଲାନ୍ସରେ ଯାଉଥିବା ରୋଗୀମାନେ ଅସୁବିଧାରେ ପଡ଼ୁଛନ୍ତି। ପ୍ରଶାସନ କଠୋର ହେଲେ କାର୍ଯ୍ୟ ଶୀଘ୍ର ଶେଷ ହୋଇପାରନ୍ତା।
-ଆଶୁତୋଷ ଦାସ, ତାଳଚେର ବାସିନ୍ଦା
ଜୀବନହାନି ହେଲେ କିଏ ଦାୟୀ
ଓଭରବ୍ରିଜ୍ ନିର୍ମାଣ ଶେଷ ହେଉ ନ ଥିବାରୁ ଏହି ଲେଭଲ୍ କ୍ରସିଂ ପାର ହେବାରେ ସମସ୍ୟା ହେଉଛି। ଦୈନିକ ଘଣ୍ଟା ଘଣ୍ଟା ଧରି ଲୋକେ ଅପେକ୍ଷା କରୁଥିବା ବେଳେ ଆମ୍ବୁଲାନ୍ସ ଅଟକି ରହିବା ରୋଗୀ ଓ ସମ୍ପର୍କୀୟଙ୍କୁ ଚିନ୍ତାରେ ପକାଉଛି। ଯଦି ଜୀବନହାନି ଘଟେ ସେଥିପାଇଁ କାହାକୁ ଦାୟୀ କରାଯିବ।
-କବିତା ରଣା, ତାଳଚେର
ଦୀର୍ଘବର୍ଷ ତଳୁ ଓଭରବ୍ରିଜ୍ ହେବା ଶୁଣି ଆସୁଛୁ
ହାଣ୍ଡିଧୂଆରେ ଲେଭଲ୍ କ୍ରସିଂରେ ଓଭରବ୍ରିଜ୍ ହେବ ବୋଲି ଦୀର୍ଘ ବର୍ଷ ତଳୁ ଶୁଣିଆସୁଛୁ। ହେଲେ କେବେ ଏହା ଶେଷ ହେବ ତାହା ନା ଠିକାଦାର ଜାଣିଛନ୍ତି ନା ପ୍ରଶାସନ। ତେଣୁ ଏଥିପ୍ରତି କାହାରି ଆନ୍ତରିକତା ନ ଥିବା ଜଣାପଡ଼ୁଛି। ତୁରନ୍ତ ଏମ୍ସିଏଲ କର୍ତ୍ତୃପକ୍ଷ ଓ ପ୍ରଶାସନ ତପତ୍ରତା ପ୍ରକାଶ କରିବା ଦରକାର।
-ପ୍ରଭାକର ସାହୁ, ତାଳଚେର