କାତାର ଫିଫା ଫୁଟ୍ବଲ ବିଶ୍ୱକପ୍ ପାଇଁ ମଙ୍ଗଳବାର ଅଷ୍ଟ୍ରେଲିଆ ଫୁଟ୍ବଲ ଦଳ ଘୋଷଣା କରାଯାଇଛି। ପ୍ରଫେସନାଲ ଅଭିଜ୍ଞତା ନ ଥିବା ସତ୍ତ୍ୱେ ମୁଖ୍ୟ କୋଚ୍ ଗ୍ରାହମ ଆର୍ନୋଲ୍ଡ ୧୮ ବର୍ଷୀୟ ଫରଓ୍ବାର୍ଡ ଗରଙ୍ଗ କୁଓଲ୍ଙ୍କୁ ମନୋନୀତ କରିଛନ୍ତି। କିନ୍ତୁ ଘୋଷଣା କରାଯାଇଥିବା ୨୬ ଜଣିଆ ଦଳରୁ ଭେଟେରାନ ଗୋଲ୍କିପର ମିଚ୍ ଲାଙ୍ଗରାକ୍ ବାଦ୍ ପଡ଼ିଛନ୍ତି। ଗୋଲ୍କିପର ମାଥ୍ୟୁ ର଼୍ୟାନ ଓ ଓ୍ବିଙ୍ଗର ମାଥ୍ୟୁ ଲେକି ତୃତୀୟ ଥର ବିଶ୍ୱକପ୍ ଖେଳିବାକୁ ଯାଉଛନ୍ତି। କାତାରରେ ର଼୍ୟାନ୍ ଫୁଟ୍ବଲ ଦଳର ନେତୃତ୍ୱ ନେବେ। କୁଓଲଙ୍କ ସମେତ ୧୭ ଖେଳାଳି ପ୍ରଥମ ଥର ବିଶ୍ୱକପ୍ ପାଇଁ ମନୋନୀତ ହୋଇଛନ୍ତି। ସେପ୍ଟେମ୍ବରରେ ନ୍ୟୁଜିଲାଣ୍ଡ ବିପକ୍ଷ ଏକ ବନ୍ଧୁତ୍ୱପୂର୍ଣ୍ଣ ମ୍ୟାଚରେ ସେ ଅତିରିକ୍ତ ଖେଳାଳି ରହିଥିଲେ। ଆମନ୍ତ୍ରିତ ବାର୍ସିଲୋନା ଟିମ୍ ବିପକ୍ଷରେ ପ୍ରଭାବୀ ପ୍ରଦର୍ଶନ ଦ୍ୱାରା ସେ ଆର୍ନୋଲ୍ଡଙ୍କ ଦୃଷ୍ଟି ଆକର୍ଷଣ କରିଥିଲେ। କୁଓଲ ଭବିଷ୍ୟତରେ ଜଣେ ଷ୍ଟାର ଖେଳାଳି ହୋଇପାରନ୍ତି ବୋଲି କୋଚ୍ଙ୍କ ମନରେ ଧାରଣା ସୃଷ୍ଟି ହୋଇଥିଲା। କୁଓଲ ଇଜିପ୍ଟରେ ଜନ୍ମଗ୍ରହଣ କରିଛନ୍ତି। ତାଙ୍କ ମାତାପିତା ହେଉଛନ୍ତି ସୁଦାନିଜ୍। ବାଲ୍ୟକାଳରୁ ସେ ମାତାପିତାଙ୍କ ସହ ଅଷ୍ଟ୍ରେଲିଆ ଚାଲିଆସିଥିଲେ। ଅଷ୍ଟ୍ରେଲିଆର ଏ’ ଲିଗ୍ରେ ସେ ଜଣେ ଅତିରିକ୍ତ ଖେଳାଳି ହିସାବରେ ସେଣ୍ଟ୍ରାଲ କୋଷ୍ଟ ମାରିନର୍ସ ତରଫରୁ ୭ଥର ଖେଳି ୪ଗୋଲ୍ ସ୍କୋର କରିଥିଲେ। ଆସନ୍ତାବର୍ଷ ପ୍ରିମିୟର ଲିଗ୍ରେ ସେ ନ୍ୟୁକ୍ୟାସେଲରେ ଯୋଗଦାନ କରିବେ। ବିଶ୍ୱକପ୍ରେ ଅଷ୍ଟ୍ରେଲିଆ ଗ୍ରୁପ୍ ଡି’ରେ ଗତଥରର ଚାମ୍ପିୟନ ଫ୍ରାନ୍ସକୁ ନଭେମ୍ବର ୨୨ରେ ଭେଟିବ।
ଅଷ୍ଟ୍ରେଲିଆ ଫୁଟ୍ବଲ ଦଳ: ଗୋଲକିପର- ମ୍ୟାଟ୍ ର଼୍ୟାନ, ଆଣ୍ଡ୍ର୍ୟୁ ରେଡମେନ୍, ଡାନି ଭିକୋଭିଚ୍। ଡିଫେଣ୍ଡର-ନାଥାନ ଆଟକିନ୍ସନ, ଅଜିଜ ବେହିଚ୍, ମିଲୋସ ଡିଜେନେକ୍, ଥୋମାସ ଡେଙ୍ଗ୍, ଫାନ୍ କାର୍ସିକ, ଜୋଏଲ୍ କିଙ୍ଗ୍, କି’ ରୋଲ୍ସ, ହ୍ୟାରି ସାଉଟର,ବେଲି ରାଇଟ୍। ମିଡ୍ଫିଲ୍ଡର- କିନୁ ବେକାଶ, କାମେରନ ଡେଭଲିନ୍, ଆଜ୍ଦିନ୍ ହ୍ରଷ୍ଟିକ୍, ଜ୍ୟାକସନ ଇର୍ଭିନେ, ରିଲେ ମ୍ୟାକ୍ଗ୍ରି, ଆରୋନ ମୁଇ। ଫରଓ୍ବାର୍ଡ-ମାର୍ଟିନ ବୟଲି, ଜାସନ କୁମିନ୍ସ, ମିଚେଲ ଡ୍ୟୁକ୍, କ୍ରେଗ୍ ଗୁଡ୍ଓ୍ବିନ, ଗରଙ୍ଗ କୁଓଲ, ମାଥ୍ୟୁ ଲେକି, ଆଓ୍ବେର ମାବିଲ୍ ଓ ଜେମି ମ୍ୟାକଲରେନ।