ଭାରତରୁ ଟିକ୍ଟକ୍ ବ୍ୟାନ୍ ହେବା ଖବର ଅନେକଙ୍କୁ ଆଘାତ ଦେଇଛି। ବିଶେଷକରି ଟିକ୍ଟକ ବ୍ୟବହାରକାରୀ ଏହାକୁ ସହଜରେ ଗ୍ରହଣ କରିପାରୁନାହାନ୍ତି। ଏହି ପ୍ଲାଟଫର୍ମ ଦ୍ୱାରା କିଛି ସାଧାରଣ ଚେହେରାରୁ ଷ୍ଟାର ପାଲଟିଥିଲେ। ହେଲେ ଏବେ ଟିକ୍ଟକ ବ୍ୟବହାର କରିବା ସେମାନଙ୍କପାଇଁ ସ୍ବପ୍ନ ପାଲଟିଛି। ଏହି ନିଷେଧାଦେଶକୁ ସହି ନ ପାରି ଦିଲ୍ଲୀ ବିଶ୍ୱବିଦ୍ୟାଳୟରେ ପଢ଼ୁଥିବା ଜଣେ ୧୮ ବର୍ଷୀୟ ଯୁବତୀ ଆତ୍ମହତ୍ୟା ଭଳି ଚରମ ପଦକ୍ଷେପ ନେଇଛନ୍ତି।
ସେ ହେଲେ ଟିକ୍ଟକ୍ ଷ୍ଟାର ସନ୍ଧ୍ୟା ଚୌହାନ। ଦିଲ୍ଲୀର ଗ୍ରୀନ ପାର୍କରେ ସେ ରହୁଥିବା ବେଳେ ଦିଲ୍ଲୀ ବିଶ୍ୱବିଦ୍ୟାଳୟରେ ପଢ଼ୁଥିଲେ। ଟିକଟକରେ ଯୁବତୀଜଣଙ୍କର ଲକ୍ଷ ଲକ୍ଷ ଫଲୋଅର୍ ଥିଲେ। ହେଲେ ଏହା ବ୍ୟାନ୍ ହେବା ପରେ ସେ ଆତ୍ମହତ୍ୟା କରିଥିବା ଜଣାପଡ଼ିଛି। ହେଲେ ତାଙ୍କ ଘରୁ କୌଣସି ସୁଇସାଇଡ୍ ନୋଟ୍ ଜବତ ହୋଇନାହିଁ।
ସନ୍ଧ୍ୟା ଆତ୍ମହତ୍ୟା କରିଥିବା ତାଙ୍କର ଜଣେ ସମ୍ପର୍କୀୟ ଦେଖିବାକୁ ପାଇଥିଲେ। ପରେ ସେ ପୋଲିସକୁ ଖବର ଦେଇଥିଲେ। ସେ ୨ରୁ ୩ ମାସ ହେବ ଅବସାଦଗ୍ରସ୍ତ ଥିବା ପରିବାର ପକ୍ଷରୁ କୁହାଯାଉଛି।
ଗତ ମାସରେ ଅଭିନେତା ସୁଶାନ୍ତ ସିଂ ରାଜପୁତ ଏବଂ ଅନ୍ୟ ଜଣେ ଟିକ୍ଟକ୍ ଷ୍ଟାର ସିୟା କକ୍କର ଆତ୍ମହତ୍ୟା କରିବାକୁ ନେଇ ଚର୍ଚ୍ଚାରେ ରହିଥିଲେ। ଏବେ ପୁଣି ସନ୍ଧ୍ୟାଙ୍କ ଆତ୍ମହତ୍ୟା ସମସ୍ତଙ୍କୁ ଚକିତ କରିଛି।