ନୂଆଦିଲ୍ଲୀ,୧୬।୧୧: ଦେଶରେ ଗତ ୨୦ ବର୍ଷ ମଧ୍ୟରେ ୧,୮୮୮ ହାଜତ ମୃତ୍ୟୁ ଘଟଣା ଘଟିଛି। ତେବେ ଏସବୁ ଘଟଣାରେ ମାତ୍ର ୨୬ ଜଣ ପୋଲିସ ଦୋଷୀ ସାବ୍ୟସ୍ତ ହୋଇଛନ୍ତି। ନ୍ୟାଶନାଲ କ୍ରାଇମ୍ ରେକର୍ଡ ବ୍ୟୁରୋ (ଏନ୍ସିଆର୍ବି) ବାର୍ଷିକ ରିପୋର୍ଟରେ ଏସମ୍ପର୍କରେ ଉଲ୍ଲେଖ କରାଯାଇଛି।
ସେହିପରି ହାଜତ ମୃତ୍ୟୁ ଘଟଣାରେ ୮୯୩ ମାମଲା ରୁଜୁ ହୋଇଛି। ଅପରପକ୍ଷରେ ୩୫୮ ଅଭିଯୋଗ ପତ୍ର ମଧ୍ୟ ଦାଖଲ କରାଯାଇଛି। ଏନ୍ସିଆର୍ବି ପକ୍ଷରୁ କୁହାଯାଇଛି ଯେ, ୨୦୦୬ରେ ସର୍ବାଧିକ ୧୧ ଜଣ ପୋଲିସଙ୍କ ବିରୋଧରେ ହାଜତ ମୃତ୍ୟୁ ମାମଲା ରୁଜୁ ହୋଇଥିଲା। ୨୦୨୦ରେ ଗୁଜରାଟରେ ସର୍ବାଧିକ ୧୫ ହାଜତ ମୃତ୍ୟୁ ଘଟଣା ଘଟିଥିଲା।
ଏଭଳି ଘଟଣା ଆନ୍ଧ୍ରପ୍ରଦେଶ, ବିହାର, ଆସାମ, ଛତିଶଗଡ଼, ହରିୟାଣା, କର୍ନାଟକ, ମଧ୍ୟପ୍ରଦେଶ, କେରଳ, ମହାରାଷ୍ଟ୍ର, ଓଡ଼ିଶା, ପଞ୍ଜାବ ରାଜସ୍ଥାନ, ତାମିଲନାଡୁ, ତେଲେଙ୍ଗାନାରେ ମଧ୍ୟ ଘଟିଛି। ତେବେ ୨୦୨୦ରେ କୌଣସି ପୋଲିସ ଏସବୁ ଘଟଣାରେ ଦୋଷୀ ସାବ୍ୟସ୍ତ ହୋଇ ନାହାନ୍ତି।
୨୦୦୧ଠାରୁ ବିନା ରିମାଣ୍ଡରେ ୧,୧୮୫ ଜଣଙ୍କ ହାଜତ ମୃତ୍ୟୁ ଘଟିଥିବାବେଳେ ରିମାଣ୍ଡ ଘଟଣାରେ ୭୦୩ ଜଣଙ୍କ ମୃତ୍ୟୁ ଘଟିଥିବା ରିପୋର୍ଟରେ ଦର୍ଶାଯାଇଛି।