ନୂଆଦିଲ୍ଲୀ: ସୋମବାରଠାରୁ ୧୯ କୋଇଲା ବ୍ଲକ ନିଲାମ ଆରମ୍ଭ ହେଉଛି। ବାଣିିଜି୍ୟକ ଖଣି ଅଧୀନରେ ଏହି ନିଲାମ ପ୍ରକ୍ରିୟା ସମ୍ପାଦନ ହେବ। ଏହି ବର୍ଗରେ ଏହା ପ୍ରଥମ ନିଲାମ ହୋଇଥିବା ବେଳେ ବେଦାନ୍ତ, ଜିନ୍ଦଲ ଷ୍ଟିଲ ଆଣ୍ଡ ପାଓ୍ବାର ଲିମିଟେଡ, ଆଦାନୀ ଏଣ୍ଟରପ୍ରାଇଜେସ, ହିଣ୍ଡାଲକୋ ଏବଂ ଜେଏସ୍ଡବ୍ଲ୍ୟୁ ଷ୍ଟିଲ ଭଳି କମ୍ପାନୀ ଏଥିରେ ଭାଗ ନେବେ ବୋଲି ଜଣାପଡିଛି। ଏହି ପ୍ରକ୍ରିୟା ୮ ଦିନ ଧରି ଚାଲିବ। କୋଇଲା ମନ୍ତ୍ରଣାଳୟର ସଦ୍ୟମ ଇ-ନିଲାମ କ୍ୟାଲେଣ୍ଡର ଅନୁସାରେ ନଭେମ୍ବର ୯ ଯାଏ ଏହା ଚାଲିବ ବୋଲି ସୂଚନା ମିଳିଛି। ସୋମବାର ଚକଲା, ଝାଡଖଣ୍ଡ, ମାରକୀ-ମଙ୍ଗଳୀ-୨, ମହାରାଷ୍ଟ୍ର, ରାଧିକାପୁର(ପଶ୍ଚିମ), ଓଡିଶା, ଟାକଲୀ ଜେନା ବେଲୋରା ଉତ୍ତର ଏବଂ ଦକ୍ଷିଣ(ମହାରାଷ୍ଟ୍ର) , ଉତ୍ତରଣ, ମଧ୍ୟପ୍ରଦେଶ ଭଳି କୋଇଲା ବ୍ଲକର ନିଲାମ ହେବ। ଓଡିଶାର ରାଧିକାପୁର ପଶ୍ଚିମ ବ୍ଲକ ଲାଗି ଜେଏସ୍ପିଏଲ୍ ଏବଂ ବେଦାନ୍ତ ଲିମିଟେଡ ରେସ୍ରେ ରହିଥିବା ଜଣାପଡିଛି। ସେହିଭଳି ଝାଡଖଣ୍ଡର ଚକଲା ବ୍ଲକ ଲାଗି ହିଣ୍ଡାଲ୍କୋ ଏବଂ ଆଦାନୀ ନଜରରେ ରହିଛନ୍ତି। ୪୧ ବାଣିଜି୍ୟକ କୋଇଲା ଖଣିର ନିଲାମ ପ୍ରକ୍ରିୟାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁଭାରମ୍ଭ କରିଥିଲେ। ଏହା ଦ୍ୱାରା ପ୍ରାୟ ୩୩ ହଜାର କୋଟି ଟଙ୍କାର ରାଜସ୍ବ ଆଦାୟ ଲାଗି ସରକାର ଯୋଜନା ରଖିଛନ୍ତି।