ନୂଆଦିଲ୍ଲୀ,୧୬ା୬: ହଜ୍ ଯାତ୍ରାରେ ସାଉଦି ଆରବ ଆସିଥିବା ଅନୂ୍ୟନ ୧୯ ତୀର୍ଥଯାତ୍ରୀଙ୍କର ମୃତ୍ୟୁ ଘଟିଛି। ସେମାନେ ଜୋର୍ଡାନ ଏବଂ ଇରାନରୁ ଆସିଥିଲେ। ଜୋର୍ଡାନ ବହିର୍ବ୍ୟାପାର ମନ୍ତ୍ରଣାଳୟର ଘୋଷଣା ଅନୁଯାୟୀ ହଜ୍ ଯାତ୍ରା ବେଳେ ତାଙ୍କ ଦେଶର ୧୪ ଯାତ୍ରୀଙ୍କ ମୃତ୍ୟୁ ଘଟିବା ସହ ଅନ୍ୟ ୧୭ ଜଣ ନିଖୋଜ ଅଛନ୍ତି। ଅତ୍ୟଧିକ ଗ୍ରୀଷ୍ମପ୍ରବାହ ଯୋଗୁ ଅଂଶୁଘାତରେ ସେମାନଙ୍କ ମୃତ୍ୟୁ ଘଟିଥିବା ଜୋର୍ଡାନ୍ ସ୍ପଷ୍ଟ କରିଛି।
ସେହିପରି ମକ୍କା ଓ ମଦିନାରେ ଇରାନର ୫ ହଜ୍ଯାତ୍ରୀଙ୍କ ମୃତ୍ୟୁ ଘଟିଥିବା ଇରାନୀୟ ରେଡ୍ କ୍ରିସେଣ୍ଟ ମୁଖ୍ୟ କହିଛନ୍ତି। ଚଳିତ ବର୍ଷ ହଜ୍ ଯାତ୍ରା ବେଳେ ସାଉଦି ଆରବର ୪୦ ଡିଗ୍ରୀରୁ ଅଧିକ ତାପମାତ୍ରା ଅନୁଭୂତ ହୋଇଥିଲା। ପ୍ରାୟ ୧୮ ଲକ୍ଷ ମୁସଲମାନ ଯାତ୍ରୀ ହଜ୍ରେ ଭାଗ ନେଇଥିଲେ।