ସଜନାଗଡ଼, ୭।୬(ଡି.ଏନ.ଏ.)-ବାଲେଶ୍ୱର ଜିଲା ନୀଳଗିରି ଉପଖଣ୍ଡର କୁଲଡ଼ିହା ଅଭୟାରଣ୍ୟରେ ଗତ ୫ତାରିଖରେ ଏକ ଦନ୍ତାହାତୀର ମୃତଦେହ ମିଳିଥିଲା। ହାତୀର ମୃତ୍ୟୁକୁ ନେଇ ବନବିଭାଗ କୌଣସି ଟେର୍ ନ ପାଇବାରୁ ସାଧାରଣରେ ଅସନ୍ତୋଷ ଦେଖାଦେଇଥିଲା। ଏହି ପରିପ୍ରେକ୍ଷୀରେ ବନବିଭାଗର ଡିଏଫ୍ଓ ବିଶ୍ୱରାଜ ପଣ୍ଡା ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। କୁଲଡ଼ିହାର ଫରେଷ୍ଟର କିଶୋର ଭୂୟାଁ ଓ ଗାର୍ଡ଼ ଲାଲମୋହନ ସିଂଙ୍କୁ ନିଲମ୍ବନ କରାଯାଇଛି। ଏହାସହ କୁଲଡ଼ିହାର ଏସିଏଫ୍ଓ ଲକ୍ଷ୍ମଣ ପ୍ରଧାନଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି। କୁଲଡ଼ିହାରେ ରାତ୍ରି ପାଟ୍ରୋଲିଂ ବ୍ୟବସ୍ଥାକୁ କଡାକଡି କରାଯିବ ବୋଲି ଡିଏଫ୍ଓ ପଣ୍ଡା ସୂଚନା ଦେଇଛନ୍ତି।
ଗତ ୫ତାରିଖରେ କୁଲଡ଼ିହା ବନବିଭାଗର କର୍ମଚାରୀ ଅଭୟାରଣ୍ୟ ଭିତର ଭାଲୁବସା ନିକଟରେ ଏକ ହାତୀର ମୃତଦେହ ଉଦ୍ଧାର କରିଥିଲେ। ବନବିଭାଗର ସୂଚନାନୁସାରେ ଉଦ୍ଧାର ହାତୀର ଦୁଇଟିଯାକ ଦାନ୍ତ ନ ଥିବାବେଳେ ଦୁଇ ତିନି ଦିନ ପୂର୍ବରୁ ତା’ର ମୃତ୍ୟୁ ହୋଇଥିଲା। ଏହାପରେ ବନବିଭାଗର ଉଚ୍ଚପଦସ୍ଥ କର୍ମଚାରୀମାନେ ହାତୀ ମୃତ୍ୟୁକୁ ନେଇ ତଦନ୍ତ ଆରମ୍ଭ କରିଥିଲେ। ପରେ ପ୍ରାଣୀ ଚିକିତ୍ସାଧିକାରୀଙ୍କ ଉପସ୍ଥିତିରେ ମୃତ ହାତୀର ଶବ ବ୍ୟବଚ୍ଛେଦ କରାଯାଇ ପୋତି ଦିଆଯାଇଥିଲା।
