ନୂଆଦିଲ୍ଲୀ,୭।୭: ଗତ ମେ’ ମାସରୁ ଭାରତ-ଚାଇନା ସୀମା ବିବାଦକୁ ନେଇ ଉଭୟ ଦେଶ ମଧ୍ୟରେ ତୁତୁମେମେ ଚାଲିଥିବା ବେଳେ ନିକଟରେ ଚାଇନା ସେନା ଗଲଓ୍ବାନ ଘାଟିରୁ କିଛି କିଲୋମିଟର ପଛକୁ ଘୁଞ୍ଚି ଯାଇଥିବା ଖବର ରହିଛି। ହେଲେ ଏବେ ୧୫ ଜୁଲାଇ, ୧୯୬୨ ମସିହାରେ ପ୍ରକାଶିତ ଏକ ଖବର କାଗଜର ହେଡ୍ ଲାଇନ୍ସ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ହେଡ ଲାଇନ୍ସଟି ହେଉଛି, ‘Chinese Troops Withdraw from Galwan Post’ ଅର୍ଥାତ୍ ଚାଇନା ସେନା ଗଲଓ୍ବାନ ପୋଷ୍ଟଠାରୁ ପଛକୁ ଚାଲିଯାଇଛନ୍ତି। ହେଲେ ଏବେ ଚାଇନା ସେନା ସମାନ ଢଙ୍ଗରେ ପଛକୁ ଘୁଞ୍ଚି ଯାଇଥିବା ବେଳେ ଭାରତୀୟ ସେନା କିନ୍ତୁ ଏ ସମ୍ପର୍କରେ କୌଣସି ତଥ୍ୟ ଦେବାକୁ ସାମାନ୍ୟ କୁଣ୍ଠାବୋଧ କରୁଥିବା ଦେଖାଯାଇଛି। ତେବେ ଭାରତୀୟ ସେନା ପକ୍ଷରୁ କୁହାଯାଇଛି କି ଚାଇନା ପଛକୁ ଘୁଞ୍ଚିବା ଏକ ଛୋଟିଆ କଥା। ତେଣୁ ଆମକୁ ସବୁ ପରିସ୍ଥିତିରେ ସଜାଗ ରହିବାକୁ ପଡିବ। କାରଣ ଚାଇନା ଉପରେ ବିଶ୍ୱାସ କରାଯାଇ ନ ପାରେ। ଏହାର ଆଉ ଏକ କାରଣ ୧୫ ଜୁଲାଇ, ୧୯୬୨ରେ ଟାଇମ୍ସ ଅଫ୍ ଇଣ୍ଡିଆର ରବିବାର ଖବର କାଗଜର ଶୀର୍ଷକ। କାରଣ ଏହାର ଠିକ୍ ୯୬ ଦିନ ପରେ ଅର୍ଥାତ୍ ୨୦ ଅକ୍ଟୋବରରେ ଭାରତ-ଚାଇନା ମଧ୍ୟରେ ଯୁଦ୍ଧ ଆରମ୍ଭ ହୋଇଯାଇଥିଲା। ତାହାପୁଣି ଗଲଓ୍ବାନ ଘାଟିରେ। ସୂଚନାଯୋଗ୍ୟ, ଜୁଲାଇ ୧୫, ୧୯୬୨ରେ ଉକ୍ତ ଖବର କାଗଜର ଏକ ରିପୋର୍ଟରେ ଦାବି କରାଯାଇଥିଲା କି ଗଲଓ୍ବାନ ପୋଷ୍ଟରେ ଚାଇନା ସେନା ୨୦୦ ମିଟର ପଛକୁ ଘୁଞ୍ଚି ଯାଇଛନ୍ତି। ହେଲେ ଏହାପରେ ସେ ପୁଣି ଫେରି ଆସିଥିଲେ ଓ ଭାରତ-ଚାଇନା ମଧ୍ୟରେ ଯୁଦ୍ଧ ହୋଇଥିଲା। ନାୟକ ସୁବେଦାର ଜଙ୍ଗ ବାହାଦୂରଙ୍କ ନେତୃତ୍ୱରେ ଗୋରଖାମାନେ ସେମାନଙ୍କ ସ୍ଥାନ ଛାଡି ନ ଥିଲେ ଓ ଏହା ଭାରତୀୟ ସେନା ଇତିହାସରେ କିମ୍ବଦନ୍ତୀ ପାଲଟି ଯାଇଥିଲା। ଏଥିରେ ପାଖାପାଖି ୩୬ ଭାରତୀୟ ଯବାନ ଶହୀଦ ହୋଇଥିଲେ।