ମୁମ୍ବାଇ,୧୨ ।୩: ମାର୍ଚ୍ଚ ୧୨, ୧୯୯୩ ମୁମ୍ବାଇ ପାଇଁ ଥିଲା କଳା ଶୁକ୍ରବାର ବା ବ୍ଲାକ ଫ୍ରାଇଡେ । ବମ୍ବେ ଷ୍ଟକ ଏକ୍ସଚେଞ୍ଜରେ ପ୍ରତିଦିନ ଭଳି ସାଧାରଣ ଭାବେ କାମ ଚାଲିଥିଲା, ହେଲେ ଦିନ ପ୍ରାୟ ୧ଟା ୩୦ରେ ଏକ୍ସଚେଞ୍ଜର ୨୮ ମହଳା ବିଲଡିଂର ବେସମେଣ୍ଟରେ ଏକ ବଡ ଧରଣର ବିସ୍ଫୋରଣ ହୋଇଥିଲା, ଯେଉଁଥିରେ ସମ୍ପୂର୍ଣ୍ଣ ବିଲଡିଂଟି ଦୋହଲି ଯାଇଥିଲା । ଏଥିରେ ୫୦ ଲୋକଙ୍କ ମୃତ୍ୟୁ ହୋଇଥିଲା । ହେଲେ ଏହା କେବଳ ଆରମ୍ଭ ମାତ୍ର ଥିଲା । ଏହାର ଅଧଘଣ୍ଟା ପରେ ଦ୍ୱିତୀୟ ବିସ୍ଫୋରଣ ଖୁବଜୋରରେ ଏକ କାରରେ ହୋଇଥିଲା । ଆଉ ଏହା ପରେ ଗୋଟିଏ ପରେ ଗୋଟିଏ ବିସ୍ଫୋରଣ ଆରମ୍ଭ ହୋଇଯାଇଥିଲା । ସମ୍ପୂର୍ଣ୍ଣ ମୁମ୍ବାଇରେ ୧୨ଟି ସ୍ଥାନରେ ୧୩ ବିସ୍ଫୋରଣ ହୋଇଥିଲା ।
ଏହି ସିରିଏଲ ବୋମା ବିସ୍ଫୋରଣରେ ୨୫୭ ଲୋକଙ୍କ ମୃତ୍ୟୁ ହୋଇଥିବା ବେଳେ ୭୧୩ ଆହତ ହୋଇଥିଲେ । ଆଜିବି ମୁମ୍ବାଇବାସୀଙ୍କ ମନରେ ସେଦିନର ସେହି ବିସ୍ଫୋରଣର ଚିତ୍ର ତାଜା ହୋଇ ରହିଛି ।
ଏହି ବିସ୍ଫୋରଣ ମୁମ୍ବାଇରେ ହୋଇଥିବା ଦଙ୍ଗାର କିଛି ସମୟ ପରେ ହୋଇଥିବାରୁ ଏହା ଦଙ୍ଗାର ପ୍ରତିଶୋଧ ବୋଲି କୁହାଯାଇଥିଲା । ଏହି ସିରିଏଲ ବିସ୍ଫୋରଣରେ ମୁମ୍ବାଇ ସମ୍ପୂର୍ଣ୍ଣ ଭାବେ ଦୋହଲି ଯାଇଥିଲା । ପୋଲିସ କହିଥିଲା ଏହି ବିସ୍ଫୋରଣ ଭାରତ ବାହାରେ ଥିବା ଆତଙ୍କବାଦୀ ଦାଉଦ ଇବ୍ରାହିମ କରାଇଥିଲେ । ବ୍ଲାଷ୍ଟର ପ୍ଲାନ ଟାଇଗର ମେମନ କରିଥିଲେ, ହେଲେ ଏମାନଙ୍କୁ ଆଜି ପର୍ଯ୍ୟନ୍ତ ଧରା ଯାଇନାହିଁ । ଏହି ମାମଲାରେ ତଳ କୋର୍ଟ ୧୨ ଅଭିଯୁକ୍ତଙ୍କୁ ଫାଶି ଦଣ୍ଡାଦେଶ ଦେଇଛନ୍ତି । ଏଥିରେ ୟାକୁବ ମେମନ ବି ଥିଲେ, ଯାହାଙ୍କୁ ୨୦୧୫ରେ ଫାଶି ଦିଆଯାଇଥିଲା । ୟାକୁବ ମେମନ ମୁଖ୍ୟ ଅଭିଯୁକ୍ତ ଟାଇଗରର ଭାଇ ଥିଲେ ।
ଏହି ବିସ୍ଫୋରଣରେ ଯେତେବେଳେ ବଲିଉଡ ଅଭିନେତା ସଞ୍ଜୟ ଦତ୍ତଙ୍କ ନାମ ସାମ୍ନାକୁ ଆସିଥିଲା, ସେତେବେଳେ ଲୋକେ ବିଶ୍ୱାସ କରିପାରି ନ ଥିଲେ । ସଞ୍ଜୟ ଦତ୍ତଙ୍କୁ ୨୦୦୬ରେ ମୁ୍ମ୍ବାଇର ଟାଡା କୋର୍ଟ ଏକେ-୫୬ ରଖିଥିବା ଅପରାଧରେ ଦୋଷୀ ସାବ୍ୟସ୍ତ କରିଥିଲେ, ହେଲେ ଅନ୍ୟ ଅଭିଯୁକ୍ତମାନେ ଖଲାସ ହୋଇଯାଇଥିଲେ ।