ଓ୍ବେଲିଂଟନ, ୧୧।୮: ୧୦୨ ଦିନ ପରେ ନ୍ୟୁଜିଲାଣ୍ଡରେ ମଙ୍ଗଳବାର ଚିହ୍ନଟ ହୋଇଛି ପ୍ରଥମ କରୋନା ଆକ୍ରାନ୍ତ। ଏହି କାରଣରୁ ପ୍ରଧାନମନ୍ତ୍ରୀ ଦେଶର ବୃହତ ସହର ଓ୍ବେଲିଂଟନର ଅଧିବାସୀଙ୍କୁ ଘରେ ଲକ୍ ଡାଉନ୍ରେ ରହିବାକୁ ନିର୍ଦ୍ଦେଶ ଜାରି କରିଛନ୍ତି। ଦେଶକୁ କରୋନା ମୁକ୍ତ ଘୋଷଣା କରିବା ପରେ ନ୍ୟୁଜିଲାଣ୍ଡ ପ୍ରଧାନମନ୍ତ୍ରୀ ଜେସିଣ୍ଡା ଆର୍ଡନଙ୍କୁ ଚାରିଆଡ଼ୁ ପ୍ରଶଂସା କରାଯାଇଥିଲା। କିନ୍ତୁ ମଙ୍ଗଳବାର ଗୋଟିଏ ପରିବାରରୁ ୪ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ଆର୍ଡନ ଏକ ଟିଭିକୁ ସାକ୍ଷାତ୍କାର ଦେଇ କହିଛନ୍ତି। ‘୧୦୨ ଦିନ ପରେ ପ୍ରଥମ କରୋନା ମାମଲା ସାମ୍ନାକୁ ଆସିଛି। ଏହି ପରିସ୍ଥିତିକୁ ରୋକିବା ଲାଗି ଆମେ ସମସ୍ତେ ଅଦ୍ଭୁତପୂର୍ବ ପରିଶ୍ରମ କରୁଛୁ’ ବୋଲି ଆର୍ଡନ ଏହି ଅବସରରେ ପ୍ରକାଶ କରିଛନ୍ତି। ଏଠାରେ ଉଲ୍ଲେଖଯୋଗ୍ୟ, ୨୨ ନିୟୁତ ଜନସଂଖ୍ୟା ବିଶିଷ୍ଟ ଦେଶ ନ୍ୟୁଜିଲାଣ୍ଡରେ କରୋନାରେ ମାତ୍ର ୨୨ ଜଣ ପ୍ରାଣ ହରାଇଛନ୍ତି। ମେ ୧ ପରେ ଏହି ଦେଶରେ ଆଉ କରୋନା ଆକ୍ରାନ୍ତ ଚିହ୍ନଟ ହୋଇ ନ ଥିଲେ। ଫସ୍ବେରୂପ ନ୍ୟୁଜିଲାଣ୍ଡବାସୀ ଏକ ସାଧାରଣ ଜୀବନ ଶୈଳୀକୁ ଉପଭୋଗ କରୁଥିଲେ। ଦେଶରେ କୌଣସି ସାମାଜିକ କଟକଣା ନ ଥିଲା। ଏପରିକି କ୍ରୀଡ଼ା ଓ ସାଂସ୍କୃତିକ କାର୍ଯ୍ୟକ୍ରମ ଲାଗି ଦର୍ଶକଙ୍କୁ ଅନୁମତି ପ୍ରଦାନ କରାଯାଇଥିଲା।
