ତ୍ରିନିଦାଦ,୪/୮: ଭାରତ ଓ ଓ୍ବେଷ୍ଟଇଣ୍ଡିଜ୍ ମଧ୍ୟରେ ୫ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ର ପ୍ରଥମ ମ୍ୟାଚକୁ ୪ ରନ୍ରେ ଜିତି ନେଇଛି ଘରୋଇ ଦଳ। ପ୍ରଥମେ ବ୍ୟାଟିଂ କରି େଓଷ୍ଟେଇଣ୍ଡିଜ୍ ୨୦ ଓଭରରେ ୬ ଉଇକେଟ ହରାଇ ୧୪୯ ରନ୍ ସଂଗ୍ରହ କରିଥିଲା। ଦଳ ପକ୍ଷରୁ ରୋଭମାନ ପାଓ୍ବେଲ ୪୮ ଓ ନିକୋଲାସ ପୁରନ ୪୧ ରନ୍ କରିଥିଲେ। ଜବାବରେ ଭାରତ ନିର୍ଦ୍ଧାରିତ ଓଭରରେ ୯ ଉଇକେଟ ହରାଇ ୧୪୫ ରନ୍ କରିଥିଲା। ଓ୍ବେଷ୍ଟଇଣ୍ଡିଜ୍ ବୋଲର ଚମତ୍କାର ବୋଲିଂ କରିବା ସହିତ ଭାରତ ହାତରୁ ମ୍ୟାଚ୍ ଛଡାଇ ନେଇଥିଲେ। ଭାରତ ପକ୍ଷରୁ ଏହି ମ୍ୟାଚ୍ରେ ଆଇପିଏଲ୍ ସେନସେସନ୍ ତିଳକ ବର୍ମା ଓ ମୁକେଶ କୁମାର ଟି ୨୦ ପଦାର୍ପଣ କରିଥିଲେ।
ପ୍ରଥମ ଉଇକେଟରେ ଓ୍ବେଷ୍ଟଇଣ୍ଡିଜର ଦୁଇ ଓପନର ବ୍ରାଣ୍ଡନ କିଙ୍ଗ ଓ କାଇଲ ମେୟର୍ସ ୨୯ ରନ୍ ଯୋଡିଥିଲେ। ବ୍ରାଣ୍ଡନ୍ କିଙ୍ଗ ଧୂଆଁଧାର ବ୍ୟାଟିଂ କରିବା ସହ ୧୯ ବଲ୍ରୁ ୪ ଚୌକା ଓ ୧ ଛକା ସହ ୨୮ ରନ୍ କରିଥିଲେ। ୫ମ ଓଭରରେ ୟୁଜବେନ୍ଦ୍ର ଚହଲ ଉଭୟ ଓପନରଙ୍କୁ ପ୍ୟାଭିଲିୟନ୍ ପଠାଇଥିଲେ। ନିକୋଲାସ ପୁରନ୍ ଦ୍ରୁତ ୪୧ ରନ୍ ସ୍କୋର କରିଥିବା ବେଳେ ଅଧିନାୟକ ରୋଭମାନ୍ ପାଓ୍ବେଲ(୪୮)ଙ୍କ ସହ ୩୮ ରନ୍ ଯୋଡିଥିଲେ। ୨୮ ବଲ୍ ଖେଳି ପୁରନ୍ ଦୁଇଟି ଲେଖାଏ ଛକା ଓ ଚୌକା ମାରିଥିଲେ। ଅଧିନାୟକ ରୋଭମାନ ପାଓ୍ବେଲ ୩୨ ବଲ୍ ଖେଳି ୪୮ ରନ୍ ସ୍କୋର କରିଥିଲେ। ତାଙ୍କ ଇନିଂସରେ ୩ ଚୌକା ଓ ୩ ଛକା ସାମିଲ ଥିଲା। ଭାରତ ପକ୍ଷରୁ ୟୁଜବେନ୍ଦ୍ର ଚହଲ ଓ ଅର୍ଶଦୀପ ସିଂ ୨ଟି ଲେଖାଏ ଉଇକେଟ ନେଇଥିଲେ। ଭାରତ ପାଇଁ ୧୫୦ ରନ୍ର ଲକ୍ଷ୍ୟ ସହଜ ହେବା ନେଇ ଆଶା କରାଯାଉଥିଲା। ତେବେ ଡେବ୍ୟୁଟାଣ୍ଟ ତିଲକ ବର୍ମାଙ୍କୁ ଛାଡି ଅନ୍ୟ କୌଣସି ବ୍ୟାଟର ଦ୍ରୁତ ରନ୍ କରି ପାରିନଥିଲେ। ତିଲକ ୨୨ ବଲ୍ ଖେଳି ୨ ଚୌକା ଓ ୩ ଛକା ସହିତ ୩୯ ରନ୍ କରିଥିଲେ। ସୂର୍ଯ୍ୟକୁମାର ଯାଦବ ୨୧, ହାର୍ଦ୍ଦିକ ପାଣ୍ଡ୍ୟା ୧୯ ଓ ସଞ୍ଜୁ ସାମସନ୍ ୧୨ ରନ୍ କରିଥିଲେ। ଜାସନ୍ ହୋଲ୍ଡର, ଓବେଡ ମ୍ୟାକୟ ଓ ରୋମାରିଓ ଶେଫର୍ଡ ଦୁଇଟି ଲେଖାଏ ଉଇକେଟ ନେଇଥିଲେ।
