ଦଶମନ୍ତପୁର, ୩୦।୮( ଡି.ଏନ୍.ଏ.):କୋରାପୁଟ ଜିଲା ଦଶମନ୍ତପୁର ବ୍ଲକ ଅଧୀନ ଚିକମ୍ ପଞ୍ଚାୟତର ଉପର ଗୋଦଳା ଉଚ୍ଚ ପ୍ରାଥମିକ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ମଧ୍ୟରେ ୧୦୫ ଜଣ ଛାତ୍ରୀଛାତ୍ର ପଢ଼ନ୍ତି। ସେମାନଙ୍କ ପାଇଁ ୩ଜଣ ଶିକ୍ଷକ ଅଛନ୍ତି। କିନ୍ତୁ ଏଠାରେ ମାତ୍ର ୨ଟି କୋଠରି ରହିଛି। ଗୋଟାଏ କୋଠରିରେ ୧ମରୁ ୫ମ ଶ୍ରେଣୀ ଓ ଅନ୍ୟଟିରେ ୬ଷ୍ଠରୁ ୮ମ ଶ୍ରେଣୀ ଛାତ୍ରୀଛାତ୍ରଙ୍କୁ ପଢ଼ାଯାଉଛି।
୨ଟି ଶ୍ରେଣୀଗୃହରେ ୮ଟି ଶ୍ରେଣୀର ପିଲାଙ୍କୁ ବସି ପଢ଼ାଯାଉଥିବାରୁ ସେମାନଙ୍କୁୁ ବିଭିନ୍ନ ଅସୁବିଧାର ସମ୍ମୁଖୀନ ହେବାକୁ ପଡୁଛି। ପାଠ ବୁଝିବା ଏବଂ ଶୁଣିବାରେ ସମସ୍ୟା ଉପୁଜୁଛି ବୋଲି ଛାତ୍ରୀଛାତ୍ରମାନେ ଅଭିଯୋଗ କରିଛନ୍ତି। ଏଭଳି ସମସ୍ୟା ମଧ୍ୟରେ ପରୀକ୍ଷାରେ କିଭଳି ପାସ୍ କରିବୁ ସେ ନେଇ କୁନିକୁନି ଛାତ୍ରୀଛାତ୍ର ପ୍ରଶ୍ନ କରିଛନ୍ତି। ଏହାକୁ ନେଇ ଅଭିଭାବକମାନେ ମଧ୍ୟ ଅସନ୍ତୋଷ ବ୍ୟକ୍ତ କରିଛନ୍ତି। ଆବଶ୍ୟକ ଶ୍ରେଣୀଗୃହ ନ ଥିବାରୁ ପାଠ ଆମକୁ ପଢ଼ାଇବା ଏବଂ ପିଲାମାନଙ୍କୁ ପାଠ ବୁଝିବାରେ ଅସୁବିଧା ହେଉଛି ବୋଲି ଶିକ୍ଷକ କୃପାସିନ୍ଧୁ ଖରା କହିଛନ୍ତି। ସମସ୍ୟାଟି ଦୀର୍ଘ ଦିନର। ଅସୁବିଧା ସମ୍ପର୍କରେ ବାରମ୍ବାର ବିଭାଗୀୟ ଅଧିକରୀ ଓ ଲୋକ ପ୍ରତିନିଧିଙ୍କୁ ମୌଖିକ ଏବଂ ଲିଖିତଭାବେ ଜଣାଇ ଆସୁଥିଲେ ହେଁ ତାହାର କୌଣସି ସୁଫଳ ମିଳୁନି ବୋଲି ପ୍ରଧାନ ଶିକ୍ଷକ ରାମଚନ୍ଦ୍ର ଗରଡ଼ା କହିଛନ୍ତି। ଖୁବ୍ଶୀଘ୍ର ଆବଶ୍ୟକ କୋଠରି ନିର୍ମାଣ କରା ନ ଗଲେ ପିଲାଙ୍କୁ ଧରି ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେବେ ବୋଲି ଅଭିଭାବକମାନେ ଚେତାବନୀ ଦେଇଛନ୍ତି। ଏ ସମ୍ପର୍କରେ ବିଇଓ ଦୟାସିନ୍ଧୁ ବାଘଙ୍କୁ ଯୋଗାଯୋଗ କରିବାରୁ ଏ ବିଷୟରେ ଉପରିସ୍ଥ ଅଧିକାରୀଙ୍କୁ ଜଣାଇବେ ବୋଲି ସେ କହିଛନ୍ତି।
