ରାୟପୁର,୨୬।୯: ଛତିଶଗଡ଼ରେ ପିଅନ ନିଯୁକ୍ତି ପାଇଁ ରବିବାର ୬୫୭ ସେଣ୍ଟରରେ କରାଯାଇଥିବା ଲିଖିତ ପରୀକ୍ଷାରେ ଆଶାୟୀଙ୍କ ଲମ୍ବା ଲାଇନ୍ ଦେଖିବାକୁ ମିଳିଛି। ୯୧ ପିଅନ ପଦ ପାଇଁ ୨.୨୫ ଲକ୍ଷ ପିଲା ଆବେଦନ କରିଥିବା ଜଣାପଡ଼ିଛି।
ପଦ ପାଇଁ ପ୍ରକାଶ ପାଇଥିବା ବିଜ୍ଞପ୍ତି ଅନୁସାରେ ଅଷ୍ଟମ ପାସ୍, ସାଇକେଲ ଚଲାଇପାରୁଥିବା ଏବଂ ଲେଖାପଠା ଜାଣିଥିବା ବ୍ୟକ୍ତିବିଶେଷ ହିଁ ଏହି ପଦ ପାଇଁ ଆବେଦନ କରିପାରିବେ। କିନ୍ତୁ ଏହି ପଦ ପାଇଁ ଅନେକ ଇଞ୍ଜିନିୟର, ସ୍ନାତକୋତ୍ତର ଏବଂ ଉଚ୍ଚଶିକ୍ଷିତ ଯୁବପିଢ଼ି ଆବେଦନ କରିଛନ୍ତି। ମନୋଜ କୁମାର ପଟେଲ ନାମକ ଜଣେ ବିଏସ୍ସି ପାସ୍ କରିଥିବା ଯୁବକ ଭବିଷ୍ୟତରେ ଜଣେ ଉପଜିଲାପାଳ ହେବାର ସ୍ବପ୍ନ ଦେଖିଥିଲେ। କିନ୍ତୁ ରାଜ୍ୟରେ ବେକାରି ସମସ୍ୟା ବଢ଼ିବା ଯୋଗୁ ସେ ଏବେ ପିଅନ ପଦ ପାଇଁ ଆବେଦନ କରିଛନ୍ତି। ଅଗଷ୍ଟରେ ରାଜ୍ୟ ସରକାରଙ୍କ ପକ୍ଷରୁ ଜାରି ଡାଟା ଅନୁସାରେ ଦେଶରେ ମୋଟ ବେକାରି ହାର ୮.୩% ରହିଥିବାବେଳେ ଛତିଶଗଡରେ ୦.୪% ଯୁବପିଢ଼ି ବେକାର ଅଛନ୍ତି।]
ରାଜ୍ୟରେ ବଢ଼ିଥିବା ବେକାରି ସମସ୍ୟା ନେଇ ବିରୋଧୀ ଭାଜପା ଶାସକ କଂଗ୍ରେସ ଦଳକୁ ସମାଲୋଚନା କରିଛି। ସରକାର ମିଛ ପ୍ରଘଟ କରିବା ଛଡ଼ା ଆଉ କିଛି କରୁ ନ ଥିବା ଭାଜପା ନେତା ଅଜୟ ଚନ୍ଦ୍ରକାର କହିଛନ୍ତି। ଭାଜପାକୁ ପାଲଟା ଜବାବ୍ ଦେଇ ବରିଷ୍ଠ ମନ୍ତ୍ରୀ ଅମରଜିତ ଭଗତ କହିଛନ୍ତି, ରାଜ୍ୟରେ ୨ କୋଟି ଯୁବପିଢ଼ିଙ୍କୁ ଚାକିରି ଯୋଗାଇ ଦେବା ଲାଗି ନିର୍ବାଚନ ବେଳେ ଭାଜପା ଯେଉଁ ପ୍ରତିଶ୍ରୁତି ଦେଇଥିଲା ସେଥିରେ ସେ ଫେଲ୍ ମାରିଛି।