ଗାଜା ସିଟି/ଜେରୁଜେଲମ୍,୨୨ା୧୦: ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ବିଜୟ ପର୍ଯ୍ୟନ୍ତ ଯୁଦ୍ଧ ଜାରି ରହିବ ବୋଲି ଚେତାବନୀ ଦେଇଥିବାବେଳେ ଶୁକ୍ରବାର ହମାସ୍ ପକ୍ଷରୁ କାତାର ମଧ୍ୟସ୍ଥତାରେ ୨ ଆମେରିକୀୟ ପଣବନ୍ଦୀଙ୍କୁ ମୁକ୍ତ କରାଯାଇଛି। ହମାସ୍ ଆତଙ୍କବାଦୀମାନେ ଅକ୍ଟୋବର ୭ରୁ ୨୧୦ ଜଣଙ୍କୁ ପଣବନ୍ଦୀ ରଖିଥିବାବେଳେ ମାନବିକତା ଦୃଷ୍ଟିରୁ ଏହା ହେଉଛି ପ୍ରଥମ ମୁକ୍ତି। ୫୯ ବର୍ଷୀୟା ଜୁଧିଥ୍ ତାଇ ରାନନ୍ ଓ ତାଙ୍କ ଝିଅ ନାଟାଲିଏ (୧୭)ଙ୍କୁ ଦକ୍ଷିଣ ଇସ୍ରାଏଲରୁ ଅପହରଣ କରିନିଆଯାଇଥିଲା। ମୁକ୍ତ ହେବା ପରେ ଦୁହେଁ ନୂଆ ଜୀବନ ପାଇଥିବା କହିଛନ୍ତି। ଆମେରିକା ରାଷ୍ଟ୍ରପତି ଜୋ ବାଇଡେନ୍ ଏନେଇ ଖୁସି ବ୍ୟକ୍ତ କରିବା ସହ କାତାର ସରକାରଙ୍କୁ ଧନ୍ୟବାଦ ଜଣାଇଛନ୍ତି। ଏଥିସହ ମୁକ୍ତ ମହିଳା ଓ ତାଙ୍କ ସ୍ବଳ୍ପବୟସ୍କା ଝିଅଙ୍କ ସହ ଫୋନ୍ରେ କଥାହୋଇ ସବୁ ପ୍ରକାର ସହାୟତାର ପ୍ରତିଶ୍ରୁତି ଦେଇଛନ୍ତି। ଅନ୍ୟପକ୍ଷେ ଗାଜା ଷ୍ଟ୍ରିପ୍ ଉପରେ ଆକ୍ରମଣ ଜାରି ରହିଥିବା ଯାଏ ପଣବନ୍ଦୀ ଥିବା ଇସ୍ରାଏଲୀ ସୈନ୍ୟମାନଙ୍କ ଭାଗ୍ୟ ଉପରେ କୌଣସି ଆଲୋଚନା ହେବ ନାହିଁ ବୋଲି ଶନିବାର ହମାସ୍ ସ୍ପଷ୍ଟ କରିଛି।