ମାଲକାନଗିରି,୨୯ା୭(ଡି.ଏନ୍.ଏ.): ମାଲକାନଗିରି ଜିଲା ମୁଦୁଲିପଡ଼ା ଏବଂ ମାଲକାନଗିରି ପୋଲିସ ଦୁଇଟି ଘଟଣାରେ ୭୬୨କେଜି ଗଞ୍ଜେଇ ଜବତ କରିବା ସହ ଦୁଇ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିବା ସୂଚନା ଦେଇଛି। ଖଇରପୁଟ ବ୍ଲକ ମୁଦୁଲିପଡ଼ା ଥାନା ପୋଲିସ ଏକ ବୋଲେରୋ ଓଡି ଜିରୋ ୨ ଆର୍ ୩୮୫୬ ଏବଂ ଏକ ମୋଟରସାଇକେଲ ଓଡି ୩୦ ୨୭୭୨ରେ ୭୨୦ କେଜି ଗଞ୍ଜେଇ ଥିବା ଜାଣି ଉଭୟ ଗାଡ଼ି ଏବଂ ଜଣଙ୍କୁ ଗିରଫ୍ କରିଛି। ବଣ୍ଡା ଘାଟିରୁ ଖଇରପୁଟ ଅଭିମୁଖେ ଯାଉଥିବା ଧନିଗୁଡ଼ା ପୋଲିସ ଯାଞ୍ଚ ବେଳେ ଧରିଥିଲା।
ଏନେଇ ମୁଦୁଲିପଡ଼ା ଥାନାରେ କେସ୍ ନମ୍ବର ୫୪/୨୧ ଅନୁଯାୟୀ ଏକ ମାମଲା ରୁଜୁ କରାଯାଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି। ଏହି ଚଢ଼ାଉରେ ମୁଦୁଲିପଡ଼ା ଥାନାଧିକାରୀ କେକେ. ବି କହ୍ନର, ତ୍ରିନାଥ ଗୌଡ଼, ସୀତାଂଶୁ ପାତ୍ର, ମାଧବ ଭୂବନ ଶଙ୍କର ପ୍ରମୁଖ ପୋଲିସ କର୍ମଚାରୀ ସାମିଲ ଥିଲେ। ସେହିପରି ବୁଧବାର ରାତିରେ ମାଲକାନଗିରି ଆଇଆଇସି ରାମପ୍ରସାଦ ନାଗଙ୍କ ନେତୃତ୍ୱରେ ଏକ ଟିମ୍ ମାଲକାନଗିରି ସୁକୁମା ମୁଖ୍ୟ ରାସ୍ତା ଚାଲାଣଗୁଡ଼ାଠାରେ ଗାଡ଼ି ଯାଞ୍ଚ କରିବା ସମୟରେ ୪୨ କେଜି ୬୦୦ ଗ୍ରାମ ଗଞ୍ଜେଇ ଜବତ କରିଥିଲା। ଏଥିରେ ସଂପୃକ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।
