ଭଞ୍ଜନଗର,୨ା୯(ଡି.ଏନ୍.ଏ.): ଭଞ୍ଜନଗର ଉତ୍ତର ଘୁମୁସର ବନଖଣ୍ଡ ଜଗନ୍ନାଥପ୍ରସାଦ ରେଞ୍ଜ ସଂରକ୍ଷିତ ଜଙ୍ଗଲରୁ ବୁଧବାର ରାତିରେ ବନ ବିଭାଗ କର୍ମଚାରୀ ବନ୍ଧୁକ ସହ ୨ ଜଣ ଶିକାରୀଙ୍କୁ ଗିରଫ କରିଛନ୍ତି। ସେମାନେ ହେଲେ ଜଗନ୍ନାଥପ୍ରସାଦର ସନ୍ତୋଷ ବେହେରା ଓ ଆଙ୍କୁଲକୁମ୍ପାର ଜଳନ୍ଧର ଜାନି। ସେମାନଙ୍କ ଠାରୁ ଗୋଟିଏ ଦେଶୀ ବନ୍ଧୁକ, ଦିଆସିଲି, ହେଡଲାଇଟ୍, ବାରୁଦ ଜବତ କରାଯାଇଛି। ଗୁରୁବାର ସେମାନଙ୍କୁ ଭଞ୍ଜନଗର କୋର୍ଟକୁ ଚାଲାଣ କରାଯାଇଛି।
ପ୍ରକାଶ ଯେ, ଅଭିଯୁକ୍ତମାନେ ବୁଧବାର ରାତିରେ ଅରୁଣାଞ୍ଚଳ କ୍ଷୁଦ୍ରଜଳସେଚନ ପ୍ରକଳ୍ପ ନିକଟରେ ବନ୍ୟଜନ୍ତୁ ଶିକାର ପାଇଁ ବନ୍ଧୁକ ଧରି ଘୂରି ବୁଲୁଥିଲେ । ଏନେଇ ଡିଏଫ୍ଓ ଅଭୟ କୁମାର ଦଳେଇଙ୍କ ପାଖରେ ଖବର ପହଞ୍ଚିଥିଲା। ଏହାପରେ ଆବଶ୍ୟକ ପଦକ୍ଷେପ ନେବା ପାଇଁ ଡିଏଫ୍ଓ ବିଭାଗୀୟ କର୍ମଚାରୀଙ୍କୁ ନିର୍ଦ୍ଦେଶ ଦେଇଥିଲେ। ରେଞ୍ଜର ଉମାକାନ୍ତ ଦାସ, ବନପାଳ ଇଶୁଆ ଗଣେଶ, ବନରକ୍ଷୀ ବିଦ୍ୟୁତ୍ଲତା ତ୍ରିପାଠୀ, ସଞ୍ଜୀବ ଗନ୍ତାୟତ, ଲମ୍ବୋଦର ଗୌଡ଼ ପ୍ରମୁଖ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ଦ୍ୱୟଙ୍କୁ ଗିରଫ କରିବାରେ ସକ୍ଷମ ହୋଇଥିଲେ ବୋଲି ଏସିଏଫ୍ ସୁଦର୍ଶନ ବାଦୀ ସୂଚନା ଦେଇଛନ୍ତି।