ଭୁବନେଶ୍ୱର,୧୫।୨(ବ୍ୟୁରୋ): ଶହୀଦନଗର ଥାନା ଅନ୍ତର୍ଗତ ଖଡୱାଲି ମନ୍ଦିର ନିକଟ ବିଡିଏ ପାର୍କ ସାମ୍ନାରେ ସ୍କୁଲ ବସ୍କୁ ଭଙ୍ଗାରୁଜା କରି ଡ୍ରାଇଭରଙ୍କୁ ଆକ୍ରମଣ କରିବା ସହ ପିଲାଙ୍କୁ ଭୟଭିତ କରିବା ଘଟଣାରେ ସମ୍ପୃକ୍ତ୨ଯୁବକଙ୍କୁ ପୋଲିସ ଗିରଫ କରିଛି। ଗିରଫ ଅଭିଯୁକ୍ତଦ୍ୱୟ ହେଲେ ସ୍ଥାନୀୟ ଥାନା ଶାନ୍ତିପଲ୍ଲୀ ବସ୍ତିରେ ରହୁଥିବା ଲିପୁନ ବିଶ୍ୱାଳ ଓରଫ ଲିପୁ (୧୯) ଓ ଶହୀଦନଗର ହାଇ ସ୍କୁଲ ପାଖରେ ରହୁଥିବା ରକି ବେହେରା (୧୯)। ଉଭୟଙ୍କୁ କୋର୍ଟ ଚାଲାଣ କରାଯିବା ପରେ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ତେବେ ଏହି ମାମଲାରେ ସମ୍ପୃକ୍ତ ଥିବା ଅନ୍ୟ ଅଭିଯୁକ୍ତଙ୍କୁ ଗିରଫ କରିବାକୁ ଖୋଜା ଚାଲିଥିବା ପୋଲିସ ପକ୍ଷରୁ କୁହାଯାଇଛି।
ସୂଚନାଯୋଗ୍ୟ, ସୋମବାର ଅପରାହ୍ନ ପ୍ରାୟ ୨ଟା ୩୦ରେ ଜାଭିୟର ଛକ ନିକଟ ଲୟୋଲା ସ୍କୁଲର ମିନି ବସ୍ ଛାତ୍ରୀଛାତ୍ରଙ୍କୁ ଛାଡ଼ିବାକୁ ଯାଉଥିଲା। ଏହି ସମୟରେ ବିଡିଏ ପାର୍କ ସମ୍ମୁଖ ରାସ୍ତାରେ ୭ରୁ ୮ଜଣ ଯୁବକ ଭିଡିଓ ଶୁଟ୍ କରୁଥିଲେ। ଉକ୍ତ ବସ୍ରେ ଥିବା ପିଲାମାନେ ସେମାନଙ୍କୁ ଦେଖି ହସିଥିଲେ। ହେଲେ ପିଲାମାନେ କମେଣ୍ଟ କରୁଥିବା ଭାବି ଯୁବକମାନେ ବସ୍କୁ ଅଟକାଇଥିଲେ। ପରେ ସେମାନେ ବସ୍ ଭିତରକୁ ଯାଇ ପିଲାମାନଙ୍କୁ ଧମକ ଦେଇ ଭୟଭୀତ କରାଇଥିଲେ। ଏହାକୁ ଗାଡ଼ିର ଡ୍ରାଇଭର ପ୍ରତିବାଦ କରିବାରେ ଯୁବକମାନେ ତାଙ୍କ ମାଡ଼ ମାରିଥିଲେ। ଫଳରେ ତାଙ୍କର କାନମୁଣ୍ଡା ନିକଟରେ ଫାଟିଯାଇ ରକ୍ତସ୍ରାବ ହୋଇଥିଲା। ସ୍ଥାନୀୟ ଲୋକେ ଘଟଣାସ୍ଥଳକୁ ଆସି ଯୁବକଙ୍କ କବଳରୁ ଡ୍ରାଇଭରଙ୍କୁ ଉଦ୍ଧାର କରିବା ସହ ଥାନାକୁ ଖବର ଦେଇଥିଲେ। ଡ୍ରାଇଭରଙ୍କ ଅଭିଯୋଗକ୍ରମେ ପୋଲିସ ଏକ ମାମଲା (ନଂ.୬୬/୨୦୨୩) ରୁଜୁ କରି ତଦନ୍ତ ଆରମ୍ଭ କରିଥିଲା।
