ଭୁବନେଶ୍ୱର,୧୯।୯(ବ୍ୟୁରୋ): ଟେଲିକମ୍ କମ୍ପାନୀର ଭିଆଇପି ନମ୍ବର ବିଶିଷ୍ଟ ସିମ୍କୁ ବେଆଇନ ଭାବେ ସ୍ବାଇପ୍ କରି ଅନ୍ୟ ଲୋକଙ୍କୁ ବିକ୍ରି କରିବା ଘଟଣାରେ ୨ଜଣ ଅଭିଯୁକ୍ତଙ୍କୁ ଇନ୍ଫୋସିଟି ଥାନା ପୋଲିସ ଗିରଫ କରିଛି। ଗିରଫ ଅଭିଯୁକ୍ତଦ୍ୱୟ ହେଲେ ମଞ୍ଚେଶ୍ୱର ଥାନା ଅନ୍ତର୍ଗତ ଗାଡ଼କଣ ଅଞ୍ଚଳର କେଶବ ଚନ୍ଦ୍ର ଧୀର୍(୨୭) ଓ ରସୁଲଗଡ଼ ନୂଆସାହିର ସଞ୍ଜତ କୁମାର ପଣ୍ଡା(୨୬)। ଏମାନେ ଏକ ଟେଲିକମ୍ କମ୍ପାନୀର ପୂର୍ବତନ କର୍ମଚାରୀ। ଏନେଇ ପୋଲିସ ଏକ ମାମଲା ରୁଜୁକରି ଅଭିଯୁକ୍ତଦ୍ୱୟଙ୍କୁ ଶନିବାର କୋର୍ଟ ଚାଲାଣ କରିଛି। ଅଭିଯୁକ୍ତଙ୍କୁ ରିମାଣ୍ଡରେ ଆଣି ଅଧିକ ତଥ୍ୟ ହାସଲ କରାଯିବା ନେଇ ଭୁବନେଶ୍ୱର ଡିସିପି ଉମାଶଙ୍କର ଦାଶ ସୂଚନା ଦେଇଛନ୍ତି।
ସୂଚନା ମୁତାବକ, ୩୫ ଜଣ ଭିଆଇପି ଗ୍ରାହକଙ୍କ ମୋବାଇଲ ନମ୍ବର ଡିଆକ୍ଟିଭ୍ କରାଯାଇ ଅନ୍ୟ ସିମ୍କାର୍ଡକୁ ସ୍ବାଇପ୍ କରାଯାଇଥିବା ନେଇ ଏକ ଘରୋଇ ଟେଲିକମ୍ କମ୍ପାନୀ ଇନ୍ଫୋସିଟି ଥାନାରେ ଅଭିଯୋଗ କରିଥିଲେ। ଅଭିଯୋଗ ଆଧାରରେ ପୋଲିସ ଏକ ମାମଲା ରୁଜୁ କରିଥିଲା। ପରେ ସ୍ପେଶାଲସ୍କ୍ବାଡ୍ ଏହି ମାମଲାର ତଦନ୍ତ କରିଥିଲା। ଗିରଫ ଅଭିଯୁକ୍ତ ହେଉଛନ୍ତି ଏକ ଟେଲିକମ୍ କମ୍ପାନୀର ୨ଜଣ ପୁରୁଣା କର୍ମଚାରୀ । ସେମାନେ କମ୍ପାନୀ ଆପ୍ଲିକେଶନର ୟୁଜର ଆଇଡି ଏବଂ ପାସ୍ୱାର୍ଡ ରଖିଥିଲେ। ଚାକିରି ଛାଡ଼ିବା ପରେ ଏହାକୁ ବେଆଇନ ଭାବେ ବ୍ୟବହାର କରିଥିବା ତଦନ୍ତ ସମୟରେ ଜାଣିବାକୁ ମିଳିଛି।
ବିଭିନ୍ନ ଲୋକଙ୍କ ଫେକ୍ ଡକ୍ୟୁମେଣ୍ଟ ସଂଗ୍ରହ କରି ୩୫ ଜଣ ଭିଆଇପି ଗ୍ରାହକଙ୍କ ୪ ଅଙ୍କ ନମ୍ବର ସିରିଜ୍ ହେଲେ ପରବର୍ତ୍ତୀ ୬ଟି ନମ୍ବର ୧୧୧୧୧୧ ବା ୨୨୩୩୪୪ ଅଥବା ୫୫୫୬୬୬ସିମ୍କୁ ସ୍ବାଇପ୍ କରି ଅନ୍ୟ ଟେଲିକମ୍ ନେଟ୍ୱାର୍କକୁ ପରିବର୍ତ୍ତନ କରୁଥିଲେ। ପରେ ଏହି ସିମ୍କୁ ୫୦ରୁ ୬୦ହଜାର ଟଙ୍କାରେ ଲୋକଙ୍କୁ ବିକ୍ରି କରିଥିଲେ। ଏ ସମ୍ପର୍କରେ ଜାଣିବା ପରେ ଶୁକ୍ରବାର ବିଳମ୍ବିତ ରାତିରେ ଅଭିଯୁକ୍ତଦ୍ୱୟଙ୍କ ଘରେ ଚଢ଼ାଉ କରି ପୋଲିସ ସେମାନଙ୍କୁ ଗିରଫ କରିଥିଲା। ପରେ ସେମାନଙ୍କ ଠାରୁ ୫ଟି ମୋବାଇଲ ଜବତ କରାଯାଇଛି। ଏହାସହ ସିମ୍କାର୍ଡ କିଣିଥିବା ବ୍ୟକ୍ତିଙ୍କୁ ପଚରାଉଚରା କରାଯିବ ବୋଲି ଡିସିପି କହିଛନ୍ତି।