କୋରୁକୋଣ୍ଡା ୧୬।୨(ଅବିନାଶ ବେହେରା): ମାଲକାନଗିରି ଜିଲା କୋରୁକୋଣ୍ଡା ବ୍ଲକ ନାକାମାମୁ ପଞ୍ଚାୟତ କେନ୍ଦୁଗୁଡ଼ା ଗାଁରେ ଏକ ଅଘଟଣ ଘଟିଛି। ବାଲିମେଳା ଜଳଭଣ୍ଡାରରେ ବୁଡି ୨ଶିଶୁ କନ୍ୟାଙ୍କ ମୃତ୍ୟୁ ଘଟିଛି। ସେମାନେ ହେଲେ ସନିୟା ମୁଦୁଲିଙ୍କ ଝିଅ ସାବିତ୍ରୀ ମୁଦୁଲି(୭) ଏବଂ ଧନୁ କାଡ଼ଙ୍ଗିଆଙ୍କ ଝିଅ ଦବିଲି କାଡ଼ଙ୍ଗିଆ(୭)।
ମିଳିଥିବା ସୂଚନା ମୁତାବକ, ଜଳଭଣ୍ଡାରକୁ ୪ଜଣ ଶିଶୁ କନ୍ୟା ଗାଧୋଇବାକୁ ଯାଇଥିଲେ। ସେତିକିବେଳେ ଜଳଭଣ୍ଡାରରେ ସାବିତ୍ରୀ ଏବଂ ଦବିଲି ପାଣିରେ ବୁଡି ଯାଇଥିଲେ। ଖବର ପାଇ ଗ୍ରାମବାସୀଙ୍କ ସହ ଚିତ୍ରକୋଣ୍ଡା ଅଗ୍ନିଶମ କର୍ମଚାରୀ ଏବଂ ପୋଲିସ ଖୋଜାଖୋଜି କରିଥିଲେ। ହେଲେ କୌଣସି ପତ୍ତା ମିଳି ନ ଥିଲା। ଶୁକ୍ରବାର ପୁଣି ଖୋଜାଖୋଜି ପରେ ଦୁଇ ଶିଶୁ କନ୍ୟାଙ୍କ ମୃତଦେହ ଉଦ୍ଧାର କରାଯାଇଥିଲା। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଏନେଇ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି।
