କଟକ ଅଫିସ,୯ା୮: ଏସ୍ସିବି ମେଡିକାଲରେ ଶନିବାର ଏକାଥରକେ ଜନ୍ମ ହୋଇଥିବା ୪ ଶିଶୁକନ୍ୟାଙ୍କ ମଧ୍ୟରୁ ରବିବାର ୨ ଜଣଙ୍କ ମୃତ୍ୟୁ ଘଟିଛି। ନବଜାତ ଶିଶୁ ପରିପକ୍ୱ ନ ଥିବାରୁ ସ୍ବାସ୍ଥ୍ୟାବସ୍ଥା ଗୁରୁତର ହୋଇପଡିଥିଲା। ସେମାନଙ୍କୁ କଟକ ଶିଶୁଭବନକୁ ସ୍ଥାନାନ୍ତର କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ୨ ଜଣଙ୍କର ମୃତ୍ୟୁ ଘଟିଥିବା ଶିଶୁଭବନ ସୁପରିଣ୍ଟେଣ୍ଡେଣ୍ଟ ଜ୍ଞାନେନ୍ଦ୍ର ବେହେରା କହିଛନ୍ତି ।
ଭଞ୍ଜନଗର ଡିହପଡ଼ା ଅଞ୍ଚଳର ଛବିତା ନାୟକ ଗର୍ଭବତୀ ଥିବାରୁ ପ୍ରସବ ନିମନ୍ତେ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ଅଲଟ୍ରାସାଉଣ୍ଡ କରାଯିବା ପରେ ଗର୍ଭରେ ୪ ସନ୍ତାନ ଥିବା ଜଣାପଡିଥିଲା। ମହିଳାଙ୍କ ଜଣ୍ଡିସ୍ ସହ ଅନେକ ରୋଗ ରହିଥିଲା। ସ୍ବାସ୍ଥ୍ୟାବସ୍ଥା ଗୁରୁତର ହେବାରୁ ଏସ୍ସିବି ମେଡିକାଲକୁ ସ୍ଥାନାନ୍ତର କରାଯାଇଥିଲା। ଗତ ବୁଧବାର ଏସ୍ସିବିର ସ୍ତ୍ରୀ ଓ ପ୍ରସୂତି ବିଭାଗରେ ସେ ଭର୍ତ୍ତି ହୋଇଥିଲେ। ଶନିବାର ଅପରାହ୍ନରେ ପ୍ରସବ ଯନ୍ତ୍ରଣା ହେବାରୁ ତାଙ୍କୁ ଲେବର ରୁମ୍କୁ ନିଆଯାଇଥିଲା। ସେଠାରେ ବିଭାଗୀୟ ମୁଖ୍ୟ ପ୍ରଫେସର ତୁଷାର କରଙ୍କ ନେତୃତ୍ୱରେ ଡାକ୍ତରୀ ଦଳ ତାଙ୍କର ପ୍ରସବ କରାଇଥିଲେ। ପରେ ମହିଳା ୪ ଶିଶୁକନ୍ୟା ଜନ୍ମ ଦେଇଥିଲେ। ସେମାନ ଓଜନ ଭିନ୍ନଭିନ୍ନ ରହିଥିଲା। ଜନ୍ମ ପରେ ସ୍ବାସ୍ଥ୍ୟବସ୍ଥା ଗୁରୁତର ହେବାରୁ ସେମାନଙ୍କୁ ଶିଶୁଭବନକୁ ସ୍ଥାନାନ୍ତର କରାଯାଇଥିଲା। ସେଠାରେ ଆଇସିୟୁରେ ରହି ଚିକିତ୍ସିତ ହେଉଥିବାବେଳେ ୨ ଜଣଙ୍କ ମୃତ୍ୟୁ ଘଟିଛି। ଛବିତା ଭଞ୍ଜନଗର ହସ୍ପିଟାଲରେ ଥିବାବେଳେ ଚିକିତ୍ସା ପାଇଁ ଅର୍ଥାଭାବ ଦେଖାଦେଇଥିଲା। ଏ ନେଇ ତାଙ୍କ ଭାଇ ଅରୁଣ ଟୁଇଟ୍ କରିଥିଲେ। ଏହାକୁ ଅଭିନେତା ସବ୍ୟସାଚୀ ମିଶ୍ର ଦେଖିବା ପରେ ଅରୁଣଙ୍କ ସହ ଯୋଗାଯୋଗ କରିଥିଲେ। ପରେ ସବ୍ୟସାଚୀ ଏକ ପ୍ରାଇଭେଟ୍ ଆମ୍ବୁଲାନ୍ସରେ ଛବିତାଙ୍କୁ ଭଞ୍ଜନଗର ମେଡିକାଲରୁ ଏସ୍ସିବି ମେଡିକାଲକୁ ଆଣିଥିଲେ।