ବାଳକାଟୀ,୨।୧୧(ଡି.ଏନ୍.ଏ.): ରାଜଧାନୀ ଉପକଣ୍ଠ ବାଳକାଟୀ ଫାଣ୍ଡି ପରିସରଭୁକ୍ତ ଭାର୍ଗବୀ ସେତୁ ନିକଟରୁ ମଙ୍ଗଳବାର ମଧ୍ୟାହ୍ନ ୧୨ଟାରେ ଦୁଇଜଣ ବ୍ରାଉନ ସୁଗାର ବେପାରୀଙ୍କୁ ବାଲିଅନ୍ତା ପୋଲିସ ଉଠାଇନେଇଛି। ଏମାନଙ୍କଠାରୁ ପୋଲିସ ଟଙ୍କା ଓ ଲକ୍ଷାଧିକ ଟଙ୍କାର ବ୍ରାଉନସୁଗାର ଜବତ କରିଛି। ଅଟକ ଥିବା ବ୍ରାଉନ ସୁଗାର ବେପାରୀ ବାଳକାଟୀ ନୂଆପାଟଣା ଓ ନନ୍ଦୀ ସାହି ଗ୍ରାମର ବୋଲି ଜଣାପଡିଛ।
ବାଳକାଟୀ ଏବେ ନିଶା ବେପାରୀଙ୍କ ଭୂସ୍ବର୍ଗ ପାଲଟିଛି. ଉପକଣ୍ଠ ଅଞ୍ଚଳ ହୋଇଥିବାରୁ ପୋଲିସ ପାଟ୍ରୋଲିଂ ପ୍ରତି ସେତେଟା ଗୁରୁତ୍ୱ ଦେଉ ନ ଥିବାରୁ ଅସାମାଜିକ ବ୍ୟକ୍ତିମାନେ ବେଧଡ଼କ ନିଶା କାରବାର ଚଳାଇଛନ୍ତି। ଧରାଯାଇଥିବା ଦୁଇ ନିଶା ବେପାରୀ ବାଳକାଟୀରେ ଅବାଧରେ ବ୍ରାଉନସୁଗାର କାରବାର କରିଆସୁଥିଲେ। ତେବେ ବାଲିଅନ୍ତା ପୋଲିସର ଏକ ସାଦା ପୋଷାକଧାରୀ ଟିମ୍ ମଙ୍ଗଳବାର ବାଳକାଟୀ ଭାର୍ଗବୀ ସେତୁ ନିକଟରେ ଏହି ଦୁଇ ବେପାରୀଙ୍କୁ ଧରିବା ପାଇଁ ଜାଲ ବିଛାଇଥିଲେ। ନୂଆପାଟଣା ଗ୍ରାମର ଓ ନନ୍ଦୀ ସାହି ଗ୍ରାମର ଏହି ବ୍ରାଉନସୁଗାର ବେପାରୀଦ୍ୱୟ ଏକ ବାଇକ୍ରେ ବ୍ରାଉନସୁଗାର ପୁଡିଆ ନେଇ ବଜାରରୁ ଭାର୍ଗବୀ ସେତୁ ଆଡକୁ ଯାଉଥିଲେ। ଏହି ସମୟରେ ନୂଆପାଟଣା ସ୍କୁଲ ଗଡା ନିକଟରେ ଜଗି ରହିଥିବା ପୋଲିସ ମାଡି ବସିଥିଲେ। ପୋଲିସ ଧରିବାବେଳେ ବେପାରୀଦ୍ୱୟ ରଖିଥିବା ଟଙ୍କା ଓ ବ୍ରାଉନସୁଗାର ପ୍ୟାକେଟକୁ ରାସ୍ତା ତଳେ ଥିବା ଖାଲକୁ ଫୋପାଡ଼ି ଦେଇଥିଲେ। ପୋଲିସ ବେପାରୀଦ୍ୱୟଙ୍କୁ କାବୁ କରିବା ସହ ତଳକୁ ଯାଇ ଟଙ୍କା ଓ ବ୍ରାଉନସୁଗାର ପ୍ୟାକେଟକୁ ଖାଲରୁ ଉଦ୍ଧାର କରି ଜବତ କରିଥିଲା। ଘଟଣାସ୍ଥଳରେ ସ୍ଥାନୀୟ ଲୋକଙ୍କ ଭିଡ଼ ହୋଇଯିବାରୁ ଅଘଟଣ ଆଶଙ୍କାରେ ପୋଲିସ ନିକଟରେ ଥିବା ଘର ଉପରେ ଚଢ଼ାଉ ନ କରି ସେମାନଙ୍କୁ ଥାନାକୁ ନେଇଯାଇଥିଲା। ଏ ସମ୍ପର୍କରେ ବାଲିଅନ୍ତା ଥାନାଧିକାରୀ ଯୁବରାଜ ସ୍ବାଇଁଙ୍କୁ ପଚାରିବାରେ ପୂର୍ବରୁ ଖବରପାଇ ଦୁଇ ଜଣ ବ୍ରାଉନସୁଗାର ବେପାରୀଙ୍କୁ ଧରିଛୁ। ସେମାନଙ୍କୁ ପଚରାଉଚରା ସହ ତଦନ୍ତ ଚାଲିଛି ବୋଲି କହି କଥା ଏଡ଼ାଇ ଯାଇଥିଲେ। ହେଲେ ପୋଲିସ ଏ ନେଇ ମାମଲା ରୁଜୁ ନ କରି ପଛଘୁଞ୍ଚା ଦେଉଛି। ଏପରିକି ଅଟକ ବ୍ରାଉନସୁଗାର ବେପାରୀଙ୍କଠାରୁ ଟଙ୍କା ଓ ବ୍ରାଉନସୁଗାର ଜବତ ହୋଇଥିଲେ ମଧ୍ୟ ଗିରଫ କରୁ ନାହିଁ। ତେବେ ଜଣେ ରାଜନେତା ଏହି ମାମଲାକୁ ରଫାଦଫା କରିବାକୁ ଉଦ୍ୟମ କରୁଥିବା ଚର୍ଚ୍ଚା ହେଉଛି।