ବ୍ରହ୍ମପୁର ଅଫିସ,୨୬।୬: ବ୍ରହ୍ମପୁର ବୈଦ୍ୟନାଥପୁର ଥାନାରେ କାର୍ଯ୍ୟରତ ୨ ଗୃହରକ୍ଷୀଙ୍କ ଦାଦାଗିରି ନେଇ ଅଭିଯୋଗ ହୋଇଛି। ଉକ୍ତ ଗୃହରକ୍ଷୀ ଦ୍ୱୟ ଗତ ୧୬ ତାରିଖ ବିଳମ୍ବିତ ରାତିରେ ଜୟଦୁର୍ଗାନଗରରେ ରହୁଥିବା ଜନୈକା ବିଧବା ମହିଳା ରଜନୀ ନାୟକଙ୍କ କବାଟ ଭାଙ୍ଗି ପଶି ତମ ପୁଅ କାହିଁ ବୋଲି ପଚାରିଥିଲେ। ଘଟଣା ସମ୍ପର୍କରେ ରଜନୀ ପଚାରିବାରୁ ଗୃହରକ୍ଷୀମାନେ ମହିଳାଙ୍କୁ ଜାତିଆଣ ମନ୍ତବ୍ୟ ଦେବା ସହ ତାଙ୍କୁ ଆକ୍ରମଣ ମଧ୍ୟ କରିଥିଲେ। ଘର ଆଲମିରାରେ ଥିବା ୨୫ ହଜାର ଟଙ୍କା ସେମାନେ ଲୁଟି ନେଇଥିଲେ। ମିଥ୍ୟା ମାମଲାରେ ତୁମକୁ ଗିରଫ କରି କୋର୍ଟ ଚାଲାଣ କରାଯିବ ବୋଲି ଗୃହରକ୍ଷୀ ଦ୍ୱୟ ରଜନୀଙ୍କୁ ଧମକ ଦେଇଥିଲେ। ଏ ନେଇ ମହିଳା ଜଣଙ୍କ ବୈଦ୍ୟନାଥପୁର ଥାନାରେ ଅଭିଯୋଗ କରିଥିଲେ। ଅଭିଯୋଗ ପରେ ମଧ୍ୟ ରଜନୀଙ୍କୁ ନ୍ୟାୟ ମିଳିନଥିଲା। ଏଣୁ ଶନିବାର ସେ ବ୍ରହ୍ମପୁର ଏସ୍ପିଙ୍କ ନିକଟରେ ଫେରାଦ ହୋଇ ଗୃହରକ୍ଷୀ ଦୀପକ ପାତ୍ର ଓ ଆଶିଷ ପାଣିଗ୍ରାହୀଙ୍କ ନାମରେ ଅଭିଯୋଗ କରିଛନ୍ତି। ମୁଁ ଜଣେ ବିଧବା, ମୋତେ ସୁରକ୍ଷା ଦିଆଯାଉ। ଉପରୋକ୍ତ ଘଟଣାର ଠିକ୍ ତଦନ୍ତ କରାଯାଉ ବୋଲି ସେ ଏସ୍ପିଙ୍କୁ ଜଣାଇଛନ୍ତି। ବ୍ରହ୍ମପୁର ଏସ୍ପି ଶ୍ରବଣା ବିବେକ ଏମ.କହିଛନ୍ତି, ଏନେଇ ଅଭିଯୋଗ ହୋଇଛି। ଏହାର ତଦନ୍ତ କରାଯାଉଛି, ପ୍ରମାଣ ମିଳିଲେ ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।