ପୁରୀ ଅଫିସ,୨୭ା୬: କରୋନା ଯୋଦ୍ଧାଙ୍କୁ କରୋନା। ପୁରୀ ଜିଲାର ୨ ଜଣ କରୋନା ଯୋଦ୍ଧାଙ୍କଠାରେ ପଜିଟିଭ ଚିହ୍ନଟ ହୋଇଛି। ଜଣେ ଟ୍ରାଫିକ କନଷ୍ଟେବଳ ଏବଂ ଅନ୍ୟଜଣେ ସିଆର୍ପିଏଫ୍ ଯବାନ। ସିଆରପିଏଫ୍ ଯବାନ ଜଣଙ୍କ ଜମ୍ମୁ କଶ୍ମୀରରେ କାର୍ଯ୍ୟରତ ଥିବାବେଳେ ଭଉଣୀ ବାହାଘର ପାଇଁ ଘରକୁ ଆସିଥିଲେ। ଗତ ୨୪ ତାରିଖରେ ଆର୍ୟୁବେଦ ମହାବିଦ୍ୟାଳୟ ପରିସରରେ ପୋଲିସଙ୍କ କରୋନା ଟେଷ୍ଟ କରାଯାଉଥିବାବେଳେ ତାଙ୍କର ମଧ୍ୟ ସ୍ବାବ୍ ସଂଗ୍ରହ କରାଯାଇଥିଲା। ତାଙ୍କର ପଜିଟିଭ ବାହାରିଛି। ସେହିପରି ଟ୍ରାଫିକ କନଷ୍ଟେବଳ ଜଣଙ୍କ ଘର ଡେଲାଙ୍ଗ ଅଞ୍ଚଳରେ। ସେ ପୁରୀ ଟ୍ରାଫିକ ଫାଣ୍ଡିରେ କାର୍ଯ୍ୟରତ ଥିଲେ। ସମ୍ପୃକ୍ତ ଟ୍ରାଫିକ କନଷ୍ଟେବଳ ପଜିଟିଭ ଜଣାପଡିବା ପରେ ଶୁକ୍ରବାର ଅପରାହ୍ନରେ ମେଡିକାଲ ଛକସ୍ଥିତ ଟ୍ରାଫିକ ଫାଣ୍ଡିକୁ ସିଲ୍ କରିଦିଆଯାଇଛି । ସମ୍ପୃକ୍ତ କନ୍ଷ୍ଟେବଳଙ୍କୁ ତୁରନ୍ତ ଭୁବନେଶ୍ୱରସ୍ଥିତ କୋଭିଡ୍ ହସ୍ପିଟାଲକୁ ପଠାଯାଇଛି। ତାଙ୍କ ସଂସ୍ପର୍ଶରେ ଆସିଥିବା ୩୩ଜଣଙ୍କୁ ଚିହ୍ନଟ କରାଯାଇଛି । ସମ୍ପୃକ୍ତ ଟ୍ରାଫିକ କନ୍ଷ୍ଟେବଳ ରିଜର୍ଭ ଅଫିସରେ ରହୁଥିବାରୁ ତାଙ୍କ ସଂଷ୍ପର୍ଶରେ ଆସିଥିବା ୮ ଜଣଙ୍କୁ ହୋମ୍ କ୍ବାରାଣ୍ଟାଇନରେ ପଠାଇ ଦିଆଯାଇଛି ।
